سیدنا عبداللہ بن عمر رضی اللہ عنہما بیان کرتے ہیں: نبی اکرم صلی اللہ علیہ وسلم نے ”نذر (ماننے) سے منع کیا ہے“۔ [صحیح ابن حبان/كتاب النذور/حدیث: 4375]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”تم لوگ نذر نہ مانو، کیونکہ نذر تقدیر کی کسی چیز کو نہیں بدلتی ہے، اس کے ذریعے کنجوس سے مال نکلوایا جاتا ہے۔“ [صحیح ابن حبان/كتاب النذور/حدیث: 4376]

سیدنا عبداللہ بن عمر رضی اللہ عنہما سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”نذر کسی چیز کو ختم نہیں کرتی ہے، اس کے ذریعے کنجوس سے مال نکلوایا جاتا ہے۔“ [صحیح ابن حبان/كتاب النذور/حدیث: 4377]

سعید بن حارث بیان کرتے ہیں: میں سیدنا عبداللہ بن عمر رضی اللہ عنہما کے پاس موجود تھا، اسی دوران ایک شخص ان کے پاس آیا اور بولا: اے ابوعبدالرحمن! میرا ایک بیٹا فارس کی سرزمین پر موجود تھا، وہاں طاعون پھیل گیا، میں نے نذر مانی کہ اگر اللہ تعالیٰ نے میرے بیٹے کو نجات عطا کر دی تو وہ خانہ کعبہ تک پیدل چل کر جائے گا، پھر میرا بیٹا (زندہ سلامت) آ گیا، لیکن اس کا انتقال ہو گیا، تو سیدنا عبداللہ بن عمر رضی اللہ عنہما نے اس سے فرمایا: تم اپنی نذر کو پورا کرو، تو اس شخص نے ان سے کہا: میں نے یہ نذر مانی تھی کہ میرا بیٹا پیدل جائے گا، میرے بیٹے کا تو انتقال ہو گیا ہے، تو سیدنا عبداللہ بن عمر رضی اللہ عنہما غصے میں آ گئے اور بولے: کیا تم لوگوں کو نذر ماننے سے منع نہیں کیا گیا؟ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”بے شک نذر کسی بھی چیز کو آگے یا پیچھے نہیں کرتی ہے بلکہ اللہ تعالیٰ اس کے ذریعے کنجوس سے مال الگ کر دیتا ہے۔“ (راوی بیان کرتے ہیں) جب میں نے یہ صورت حال دیکھی تو میں نے اس شخص سے کہا: تم سعید بن مسیب رحمہ اللہ کے پاس جاؤ اور ان سے اس مسئلے کے بارے میں دریافت کرو، وہ ان کے پاس گیا اور ان سے یہ مسئلہ دریافت کیا، پھر وہ واپس آیا تو میں نے دریافت کیا: انہوں نے تمہیں کیا جواب دیا ہے؟ تو اس نے بتایا: انہوں نے یہ کہا ہے تم اپنے بیٹے کی طرف سے پیدل چل کر جاؤ، اس نے دریافت کیا: کیا یہ میرے لیے جائز ہو گا؟ تو سعید بن مسیب رحمہ اللہ نے کہا: تمہاری کیا رائے ہے اگر تمہارے بیٹے کے ذمے قرض ہوتا اور تم اسے ادا کر دیتے تو کیا اس کی طرف سے ادا ہو جاتا؟ میں نے جواب دیا: جی ہاں، تو انہوں نے فرمایا: تم اپنے بیٹے کی طرف سے پیدل چل کر جاؤ۔ [صحیح ابن حبان/كتاب النذور/حدیث: 4378]

سیدنا عبداللہ بن عمر رضی اللہ عنہما بیان کرتے ہیں کہ سیدنا عمر رضی اللہ عنہ نے زمانہ جاہلیت میں یہ نذر مانی تھی کہ وہ مسجد حرام میں ایک رات کا اعتکاف کریں گے، تو نبی اکرم صلی اللہ علیہ وسلم نے ان سے فرمایا: ”تم اپنی نذر کو پورا کرو۔“ [صحیح ابن حبان/كتاب النذور/حدیث: 4379]

سیدنا عبداللہ بن عمر رضی اللہ عنہما بیان کرتے ہیں کہ سیدنا عمر رضی اللہ عنہ نے عرض کی: یا رسول اللہ صلی اللہ علیہ وسلم ! تعالیٰ آپ صلی اللہ علیہ وسلم پر درود نازل کرے، میں نے زمانہ جاہلیت میں یہ نذر مانی تھی کہ میں مسجد حرام میں ایک رات کا اعتکاف کروں گا، تو نبی اکرم صلی اللہ علیہ وسلم نے ارشاد فرمایا: ”تم اپنی نذر کو پورا کرو۔“ [صحیح ابن حبان/كتاب النذور/حدیث: 4380]

سیدنا عبداللہ بن عمر رضی اللہ عنہما بیان کرتے ہیں: سیدنا عمر رضی اللہ عنہ نے یہ بات بیان کی ہے کہ جب نبی اکرم صلی اللہ علیہ وسلم حنین سے واپس تشریف لائے، تو سیدنا عمر رضی اللہ عنہ نے نبی اکرم صلی اللہ علیہ وسلم سے اس نذر کے بارے میں دریافت کیا جو انہوں نے زمانہ جاہلیت میں ایک دن کا اعتکاف کرنے کے بارے میں مانی تھی، تو نبی اکرم صلی اللہ علیہ وسلم نے انہیں اسے پورا کرنے کا حکم دیا۔ سیدنا عمر رضی اللہ عنہ بیان کرتے ہیں: وہ نبی اکرم صلی اللہ علیہ وسلم کے آگے روانہ ہو گئے۔ سیدنا عمر رضی اللہ عنہ بیان کرتے ہیں: نبی اکرم صلی اللہ علیہ وسلم نے میرے ہمراہ ایک کنیز بھیجی تھی جو حنین کے قیدیوں میں سے تھی۔ سیدنا عمر رضی اللہ عنہ بیان کرتے ہیں: میں نے اسے دیہاتیوں کے گھروں میں ٹھہرا دیا یہاں تک کہ جب میں نے پڑاؤ کیا تو میرے سامنے حنین کے کچھ قیدی آئے جو دوڑتے ہوئے باہر نکلے تھے اور یہ کہہ رہے تھے: ”اللہ کے رسول صلی اللہ علیہ وسلم نے ہمیں آزاد کر دیا ہے“، تو سیدنا عمر رضی اللہ عنہ نے سیدنا عبداللہ رضی اللہ عنہ سے فرمایا: ”تم جاؤ اور اس کنیز کو آزاد کر دو“۔ سیدنا عبداللہ رضی اللہ عنہ بیان کرتے ہیں: تو میں گیا اور میں نے اسے آزاد کر دیا۔ (امام ابن حبان رحمہ اللہ فرماتے ہیں:) روایت کے الفاظ میں سیدنا عبداللہ بن عمر رضی اللہ عنہما نے اس بات کی صراحت کی ہے کہ سیدنا عمر رضی اللہ عنہ نے ایک رات کا اعتکاف کرنے کی نذر مانی تھی اور یہ بات صرف اسی روایت میں منقول ہے، کیونکہ اس روایت کے الفاظ یہ ہیں: سیدنا عمر رضی اللہ عنہ نے ایک دن کا اعتکاف کرنے کی نذر مانی تھی، تو اگر یہ الفاظ مستند طور پر ثابت ہو جائیں، تو اس بات کا احتمال موجود ہو گا کہ یہاں دن سے مراد یہ ہے: اس دن کی رات کے ہمراہ (اعتکاف کیا جائے) اور جہاں رات کا لفظ استعمال ہوا اس سے مراد یہ ہو کہ اس کا دن ہمراہ ہو گا، اس طرح ان دونوں روایتوں کے درمیان کوئی تضاد باقی نہیں رہے گا۔ [صحیح ابن حبان/كتاب النذور/حدیث: 4381]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم کا گزر ایک شخص کے پاس سے ہوا جو دو آدمیوں کے درمیان سہارا لے کر چل رہا تھا، نبی اکرم صلی اللہ علیہ وسلم نے اس کے بارے میں دریافت کیا تو لوگوں نے بتایا: اس نے یہ نذر مانی ہے کہ وہ پیدل چل کر جائے گا (راوی کہتے ہیں: یعنی خانہ کعبہ تک پیدل چل کر جائے گا) تو نبی اکرم صلی اللہ علیہ وسلم نے ارشاد فرمایا: ”اللہ تعالیٰ اس شخص کے اپنے آپ کو تکلیف دینے سے بے نیاز ہے۔“ نبی اکرم صلی اللہ علیہ وسلم نے اس شخص کو یہ ہدایت کی کہ وہ سوار ہو جائے۔ لیث، ہقل اور اوزاعی یہ سب ایک ہی زمانے سے تعلق رکھتے ہیں۔ عبدالرحمن بن یمان، یحییٰ بن سعید اور حمید ایک زمانے سے تعلق رکھتے ہیں، انہوں نے ایک دوسرے سے روایات نقل کی ہوئی ہیں، یہ بات شیخ نے بیان کی ہے۔ [صحیح ابن حبان/كتاب النذور/حدیث: 4382]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک شخص کو دیکھا جو دو آدمیوں کے درمیان سہارا لے کر جا رہا تھا۔ نبی اکرم صلی اللہ علیہ وسلم نے دریافت کیا: ”اس کا کیا معاملہ ہے؟“ لوگوں نے بتایا: اس نے پیدل چل کر حج کے لیے جانے کی نذر مانی ہے تو نبی اکرم صلی اللہ علیہ وسلم نے ارشاد فرمایا: ”اللہ تعالیٰ اس کے پیدل چلنے سے بے نیاز ہے، اسے سوار ہو جانا چاہیے۔“ [صحیح ابن حبان/كتاب النذور/حدیث: 4383]

سیدنا عبداللہ بن عباس رضی اللہ عنہما بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے عرض کی: میری بہن نے اپنے ذمے یہ نذر مانی ہے کہ وہ پیدل حج کے لیے جائے گی۔ نبی اکرم صلی اللہ علیہ وسلم نے فرمایا: ”تم اسے کہو کہ وہ سوار ہو جائے اور کفارہ دے دے۔“ (امام ابن حبان رحمہ اللہ فرماتے ہیں:) اس بات کا احتمال موجود ہے کہ اس عورت نے پیدل چل کر حج کے لیے جانے کی یا تو قسم اٹھائی تھی یا نذر مانی تھی، تاہم نذر میں کفارہ نہیں ہوتا۔ [صحیح ابن حبان/كتاب النذور/حدیث: 4384]