سیدنا عبداللہ بن عباس رضی اللہ عنہما بیان کرتے ہیں کہ ایک مرتبہ نبی اکرم صلی اللہ علیہ وسلم خطبہ دے رہے تھے، اسی دوران آپ صلی اللہ علیہ وسلم نے ایک شخص کو دھوپ میں کھڑے ہوئے دیکھا تو اس کے بارے میں دریافت فرمایا، لوگوں نے بتایا: یہ ابواسرائیل ہے، اس نے یہ نذر مانی ہے کہ دھوپ میں کھڑا رہے گا اور بیٹھے گا نہیں اور سائے میں نہیں آئے گا اور کسی سے بات نہیں کرے گا اور (نفلی) روزہ ترک نہیں کرے گا۔ نبی اکرم صلی اللہ علیہ وسلم نے فرمایا: ”اس سے کہو کہ یہ بیٹھ جائے، سائے میں آ جائے، بات چیت بھی کرے، (نفلی) روزہ رکھ بھی لے اور چھوڑ بھی لے۔“ [صحیح ابن حبان/كتاب النذور/حدیث: 4385]

سیدنا عبداللہ بن بریدہ رضی اللہ عنہما اپنے والد کا یہ بیان نقل کرتے ہیں کہ نبی اکرم صلی اللہ علیہ وسلم کسی غزوے سے واپس آ رہے تھے، ایک سیاہ فام لڑکی آئی اور اس نے یہ عرض کی: یا رسول اللہ صلی اللہ علیہ وسلم ! میں نے یہ نذر مانی تھی کہ اگر اللہ تعالیٰ آپ صلی اللہ علیہ وسلم کو سلامت واپس لے آیا تو میں آپ صلی اللہ علیہ وسلم کے قریب دف بجاؤں گی۔ نبی اکرم صلی اللہ علیہ وسلم نے فرمایا: ”اگر تم نے نذر مانی تھی، تو ایسا کر لو، ورنہ نہ کرو۔“ اس نے عرض کی: میں نے نذر مانی تھی، تو نبی اکرم صلی اللہ علیہ وسلم تشریف فرما ہوئے اور اس نے دف بجائی۔ [صحیح ابن حبان/كتاب النذور/حدیث: 4386]

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”جو شخص اللہ تعالیٰ کی فرمانبرداری کرنے کی نذر مانتا ہے اسے اس کی فرمانبرداری کرنی چاہیے اور جو شخص اللہ تعالیٰ کی نافرمانی کی نذر مانتا ہے اسے اس کی نافرمانی نہیں کرنی چاہیے۔“ [صحیح ابن حبان/كتاب النذور/حدیث: 4387]

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”جو شخص یہ نذر مانتا ہے کہ وہ اللہ تعالیٰ کی فرمانبرداری کرے گا تو اسے اس کی فرمانبرداری کرنی چاہیے اور جو شخص یہ نذر مانتا ہے کہ وہ اللہ تعالیٰ کی نافرمانی کرے گا تو اسے اس کی نافرمانی نہیں کرنی چاہیے۔“ [صحیح ابن حبان/كتاب النذور/حدیث: 4388]

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”جو شخص یہ نذر مانتا ہے وہ اللہ تعالیٰ کی فرمانبرداری کرے گا اسے اس کی فرمانبرداری کرنی چاہیے اور جو شخص یہ نذر مانتا ہے وہ اللہ تعالیٰ کی نافرمانی کرے گا تو اسے اس کی نافرمانی نہیں کرنی چاہیے۔“ [صحیح ابن حبان/كتاب النذور/حدیث: 4389]

سیدہ عائشہ صدیقہ رضی اللہ عنہا، نبی اکرم صلی اللہ علیہ وسلم کا یہ فرمان نقل کرتی ہیں: ”جو شخص یہ نذر مانتا ہے کہ وہ اللہ تعالیٰ کی نافرمانی کرے گا، تو اسے اس کی نافرمانی نہیں کرنی چاہیے۔“ [صحیح ابن حبان/كتاب النذور/حدیث: 4390]

سیدنا عمران بن حصین رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”گناہ کے بارے میں نذر کو پورا نہیں کیا جائے گا اور ایسی چیز کے بارے میں نذر کو پورا نہیں کیا جائے گا، جس کا بندہ مالک نہ ہو (راوی کو شک ہے شاید یہ الفاظ ہیں) جس کا ابن آدم مالک نہ ہو۔“ [صحیح ابن حبان/كتاب النذور/حدیث: 4391]

سیدنا عمران بن حصین رضی اللہ عنہ بیان کرتے ہیں کہ ایک مسلمان خاتون کو مشرکین نے قیدی بنا لیا، ان لوگوں نے نبی اکرم صلی اللہ علیہ وسلم کی ایک اونٹنی کو اس سے پہلے پکڑ لیا تھا، اس عورت نے ان لوگوں کو غفلت کا شکار دیکھا تو اس نے یہ نذر مانی کہ اگر اللہ تعالیٰ نے اسے اس اونٹنی پر سوار ہو کر نجات عطا کر دی تو وہ اس اونٹنی کو قربان کر دے گی۔ راوی بیان کرتے ہیں کہ اس عورت کو نجات مل گئی، وہ مدینہ منورہ آئی اور پھر اس اونٹنی کو قربان کرنے لگی تو لوگوں نے اسے اس سے روک دیا، اس بات کا تذکرہ نبی اکرم صلی اللہ علیہ وسلم سے کیا گیا تو نبی اکرم صلی اللہ علیہ وسلم نے ارشاد فرمایا: ”تم نے اسے بہت برا بدلہ دیا ہے“، پھر آپ صلی اللہ علیہ وسلم نے ارشاد فرمایا: ”انسان کے لیے ایسی نذر کو پورا کرنا لازم نہیں ہے، جو گناہ کے بارے میں ہو، یا اس چیز کے بارے میں ہو، جس کا وہ مالک نہیں ہے“۔ [صحیح ابن حبان/كتاب النذور/حدیث: 4392]

سیدنا عبداللہ بن عباس رضی اللہ عنہما بیان کرتے ہیں کہ سیدنا سعد بن عبادہ رضی اللہ عنہ نے نبی اکرم صلی اللہ علیہ وسلم سے مسئلہ دریافت کیا، انہوں نے عرض کی: میری والدہ کا انتقال ہو گیا ہے اور ان کے ذمے ایک نذر تھی جسے انہوں نے پورا نہیں کیا، تو نبی اکرم صلی اللہ علیہ وسلم نے فرمایا: ”ان کی طرف سے تم اسے پورا کر دو۔“ [صحیح ابن حبان/كتاب النذور/حدیث: 4393]

سیدنا عبداللہ بن عباس رضی اللہ عنہما بیان کرتے ہیں کہ سیدنا سعد بن عبادہ رضی اللہ عنہ نے نبی اکرم صلی اللہ علیہ وسلم سے اس نذر کا مسئلہ دریافت کیا جو ان کی والدہ نے مانی تھی اور پھر اسے پورا کرنے سے پہلے ان کا انتقال ہو گیا، تو نبی اکرم صلی اللہ علیہ وسلم نے ارشاد فرمایا: ”ان کی طرف سے تم اسے پورا کر دو۔“ [صحیح ابن حبان/كتاب النذور/حدیث: 4394]