سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”پانچ چیزیں فطرت ہیں: ختنہ کرنا، زیر ناف بال صاف کرنا، بغلوں کے بال صاف کرنا، مونچھیں چھوٹی کرنا اور ناخن تراشنا۔“ [صحیح ابن حبان/كتاب الزينة والتطييب/حدیث: 5482]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم ہمارے گھر ہم سے ملنے کے لیے آئے، آپ صلی اللہ علیہ وسلم نے ایک شخص کو بکھرے ہوئے بالوں کے ساتھ دیکھا تو آپ صلی اللہ علیہ وسلم نے دریافت فرمایا: ”کیا یہ کوئی ایسی چیز نہیں پاتا جس کے ذریعے یہ اپنے بالوں کو سنوارے؟“ پھر نبی اکرم صلی اللہ علیہ وسلم نے ایک شخص کو دیکھا جس نے میلے کپڑے پہنے ہوئے تھے، آپ صلی اللہ علیہ وسلم نے دریافت فرمایا: ”کیا یہ کوئی ایسی چیز نہیں پاتا جس کے ذریعے اپنے کپڑوں کو دھو لے؟“ [صحیح ابن حبان/كتاب الزينة والتطييب/حدیث: 5483]

سیدنا عبداللہ بن مغفل رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”(روزانہ) کنگھی کرنے سے منع کیا ہے، البتہ ایک دن کے وقفے کے ساتھ کی جا سکتی ہے۔“ [صحیح ابن حبان/كتاب الزينة والتطييب/حدیث: 5484]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم پہلے اپنے بال پیچھے کی طرف لے جایا کرتے تھے، جبکہ مشرکین مانگ نکالا کرتے تھے، اور اہل کتاب بھی اپنے بال پیچھے کی طرف لے جایا کرتے تھے۔ نبی اکرم صلی اللہ علیہ وسلم کو ہر اس چیز کے بارے میں اہل کتاب کی موافقت کرنا پسند تھا جس کے بارے میں آپ پر کوئی (خاص) حکم نازل نہ ہوا ہو، اس کے بعد نبی اکرم صلی اللہ علیہ وسلم نے مانگ نکالنا شروع کر دی۔ [صحیح ابن حبان/كتاب الزينة والتطييب/حدیث: 5485]

سیدنا عقبہ بن عامر جہنی رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اپنے گھر والوں کو زیور اور ریشم استعمال کرنے سے منع کیا تھا اور آپ صلی اللہ علیہ وسلم یہ فرماتے تھے: ”اگر تم جنت کے زیور کو اور اس کے ریشم کو پسند کرتے ہو تو اسے دنیا میں نہ پہنو۔“ شیخ (یعنی امام ابن حبان رحمہ اللہ) فرماتے ہیں: ابوعشانہ نامی راوی کا نام حی بن یؤمن ہے۔ [صحیح ابن حبان/كتاب الزينة والتطييب/حدیث: 5486]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”نبی اکرم صلی اللہ علیہ وسلم نے سونے کی انگوٹھی (پہننے سے) منع کیا ہے۔“ [صحیح ابن حبان/كتاب الزينة والتطييب/حدیث: 5487]

سیدنا عبداللہ بن بریدہ اپنے والد (سیدنا بریدہ رضی اللہ عنہ) کا یہ بیان نقل کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے لوہے کی انگوٹھی پہنی ہوئی تھی، نبی اکرم صلی اللہ علیہ وسلم نے فرمایا: ”کیا وجہ ہے میں تم پر اہل جہنم کا زیور دیکھ رہا ہوں؟“ اس شخص نے اسے اتار دیا، پھر وہ آپ صلی اللہ علیہ وسلم کی خدمت میں حاضر ہوا تو اس نے شبہ (پیتل) کی انگوٹھی پہنی ہوئی تھی، نبی اکرم صلی اللہ علیہ وسلم نے فرمایا: ”کیا وجہ ہے مجھے تم سے بتوں کی بو آ رہی ہے؟“ اس نے عرض کی: یا رسول اللہ صلی اللہ علیہ وسلم ! میں کس چیز کی انگوٹھی پہنوں؟ نبی اکرم صلی اللہ علیہ وسلم نے فرمایا: ”چاندی کی اور تم اس کی ایک مثقال پوری نہ کرنا (یعنی اس سے کم وزن کی ہو)۔“ [صحیح ابن حبان/كتاب الزينة والتطييب/حدیث: 5488]

سیدنا ابوسعید خدری رضی اللہ عنہ بیان کرتے ہیں کہ نجران سے ایک شخص نبی اکرم صلی اللہ علیہ وسلم کی خدمت میں حاضر ہوا، اس نے سونے کی انگوٹھی پہنی ہوئی تھی۔ نبی اکرم صلی اللہ علیہ وسلم نے اس سے منہ پھیر لیا اور آپ نے اس شخص سے کوئی بات نہیں کی۔ وہ شخص اپنی بیوی کے پاس واپس گیا اور اسے اس بارے میں بتایا تو اس نے کہا: تمہارے ساتھ ضرور کوئی معاملہ ہوا ہے، تم واپس نبی اکرم صلی اللہ علیہ وسلم کی خدمت میں جاؤ اور انگوٹھی اتار دو۔ جب اس شخص نے اندر آنے کی اجازت مانگی تو نبی اکرم صلی اللہ علیہ وسلم نے اسے اجازت دے دی۔ اس نے نبی اکرم صلی اللہ علیہ وسلم کو سلام کیا تو نبی اکرم صلی اللہ علیہ وسلم نے سلام کا جواب بھی دیا۔ اس شخص نے عرض کی: یا رسول اللہ صلی اللہ علیہ وسلم ! پہلے آپ نے مجھ سے کیوں منہ پھیر لیا تھا؟ نبی اکرم صلی اللہ علیہ وسلم نے ارشاد فرمایا: ”جب تم میرے پاس آئے تھے تو تمہارے ہاتھ میں آگ کا انگارہ تھا۔“ اس نے عرض کی: یا رسول اللہ صلی اللہ علیہ وسلم ! پھر تو میں بہت سے انگارے لے کر آیا ہوں۔ وہ شخص بحرین سے کئی زیورات لے کر آیا تھا۔ نبی اکرم صلی اللہ علیہ وسلم نے ارشاد فرمایا: ”تم کوئی ایسی چیز نہیں لے کر آئے جس کے بغیر ہمارا گزارا نہ ہو سکتا ہو، تاہم یہ دنیاوی زندگی کا ساز و سامان ہے۔“ اس شخص نے عرض کی: آپ میری معذرت قبول فرمائیں تاکہ آپ کے اصحاب یہ نہ سمجھیں کہ آپ کسی حوالے سے مجھ پر ناراض ہیں، تو نبی اکرم صلی اللہ علیہ وسلم کھڑے ہوئے، آپ نے اس کی معذرت قبول کرنے کا اعلان کیا اور یہ بات بتائی کہ آپ کی ناراضگی صرف اس کی انگوٹھی کی وجہ سے تھی۔ [صحیح ابن حبان/كتاب الزينة والتطييب/حدیث: 5489]

سیدنا انس بن مالک رضی اللہ عنہ بیان کرتے ہیں: ایک مرتبہ انہوں نے نبی اکرم صلی اللہ علیہ وسلم کو چاندی کی انگوٹھی پہنے ہوئے دیکھا تو لوگوں نے بھی چاندی کی انگوٹھیاں بنوا کر پہن لیں۔ نبی اکرم صلی اللہ علیہ وسلم نے اپنی انگوٹھی اتار دی تو لوگوں نے بھی انگوٹھیاں اتار دیں۔ [صحیح ابن حبان/كتاب الزينة والتطييب/حدیث: 5490]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سونے کی انگوٹھی بنوائی، آپ صلی اللہ علیہ وسلم نے اسے پہنا تو لوگوں نے بھی سونے کی انگوٹھیاں بنوا لیں، پھر نبی اکرم صلی اللہ علیہ وسلم کھڑے ہوئے اور ارشاد فرمایا: ”میں نے یہ انگوٹھی پہنی تھی، اب میں اسے کبھی نہیں پہنوں گا“، پھر آپ صلی اللہ علیہ وسلم نے اسے اتار دیا تو لوگوں نے بھی اپنی انگوٹھیاں اتار دیں۔ [صحیح ابن حبان/كتاب الزينة والتطييب/حدیث: 5491]