سیدنا علی رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”مجھے «الْقَسِّيَّ» (قسی) اور «الْمَيْثَرَةَ» (میثرہ) (یعنی مخصوص قسم کے کپڑے استعمال کرنے) اور شہادت کی انگلی اور درمیانی انگلی میں انگوٹھی پہننے سے منع کیا ہے“۔ [صحیح ابن حبان/كتاب الزينة والتطييب/حدیث: 5502]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”نظر لگنا حق ہے“ اور نبی اکرم صلی اللہ علیہ وسلم نے (جسم کو) گودنے سے منع کیا ہے۔ [صحیح ابن حبان/كتاب الزينة والتطييب/حدیث: 5503]

علقمہ رحمہ اللہ بیان کرتے ہیں کہ بنو اسد سے تعلق رکھنے والی ایک خاتون سیدنا عبداللہ بن مسعود رضی اللہ عنہ کے پاس آئی اور وہ بولی: مجھے یہ پتہ چلا ہے کہ آپ یہ کہتے ہیں کہ ”گودنے والی اور گدوانے والی، بال نوچنے والی اور بال نچوانے والی عورت پر لعنت کی گئی ہے“ حالانکہ میں نے پورا قرآن پڑھا ہے اور مجھے اس میں وہ چیز نہیں ملی جو آپ بیان کرتے ہیں، تو سیدنا عبداللہ بن مسعود رضی اللہ عنہ نے فرمایا: ”اگر تم اسے پڑھتیں تو وہ تمہیں مل جانی تھی“، اس نے دریافت کیا: وہ کیا ہے؟ تو سیدنا عبداللہ بن مسعود رضی اللہ عنہ نے فرمایا: کیا تم نے یہ آیت نہیں پڑھی: ﴿وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانتَهُوا﴾ [سورة الحشر: 7] ”رسول تمہیں جو (حکم) دیں اسے حاصل کر لو اور جس چیز سے وہ تمہیں منع کرتے ہیں باز آ جاؤ۔“ اس عورت نے جواب دیا: جی ہاں، تو سیدنا عبداللہ بن مسعود رضی اللہ عنہ نے فرمایا: ”اس سے مراد یہی ہے۔“ اس عورت نے کہا: میرا یہ خیال ہے کہ آپ کی ایک زوجہ محترمہ بھی اس طرح کا کوئی کام کرتی ہیں، تو سیدنا عبداللہ بن مسعود رضی اللہ عنہ نے فرمایا: ”تم گھر کے اندر جاؤ اور اسے دیکھ لو۔“ وہ عورت گھر کے اندر گئی، اس نے جائزہ لیا تو اسے ایسی کوئی چیز نظر نہیں آئی، سیدنا عبداللہ بن مسعود رضی اللہ عنہ نے اس عورت سے دریافت کیا: ”کیا تم نے کوئی ایسی چیز دیکھی ہے؟“ اس نے جواب دیا: جی نہیں، سیدنا عبداللہ بن مسعود رضی اللہ عنہ نے فرمایا: ”اگر تم اس میں سے کوئی چیز دیکھ لیتی تو وہ (یعنی ایسا کام کرنے والی بیوی) میرے ساتھ نہ رہتی۔“ [صحیح ابن حبان/كتاب الزينة والتطييب/حدیث: 5504]

علقمہ بیان کرتے ہیں کہ سیدنا عبداللہ بن مسعود رضی اللہ عنہ نے یہ بات بیان کی کہ نبی اکرم صلی اللہ علیہ وسلم نے ”جسم گودنے والی اور گدوانے والی عورت اور بال باریک کرنے والی عورت اور خوبصورتی کے لیے دانتوں میں خلا پیدا کرنے والی عورتوں پر، جو اللہ کی تخلیق کو تبدیل کر دیتی ہیں، لعنت کی ہے۔“ راوی بیان کرتے ہیں کہ اس بات کی اطلاع بنو اسد سے تعلق رکھنے والی ایک خاتون ام یعقوب کو ملی، وہ قرآن کی عالمہ تھیں، وہ سیدنا عبداللہ بن مسعود رضی اللہ عنہ کی خدمت میں حاضر ہوئیں۔ انہوں نے کہا: مجھے یہ پتا چلا ہے کہ آپ جسم گودنے والی اور گدوانے والی عورتوں، بال اکھیڑنے والی عورتوں اور خوبصورتی کے لیے دانتوں میں خلا پیدا کرنے والی عورتوں پر لعنت کرتے ہیں جو اللہ تعالیٰ کی تخلیق میں تغیر پیدا کر دیتی ہیں۔ سیدنا عبداللہ بن مسعود رضی اللہ عنہ نے فرمایا: ”میں اس پر کیوں لعنت نہ کروں جس پر نبی اکرم صلی اللہ علیہ وسلم نے لعنت کی ہے اور یہ حکم اللہ کی کتاب میں بھی ہے۔“ وہ عورت بولی: میں نے پورا قرآن پڑھ لیا ہے، مجھے اس میں یہ حکم نہیں ملا۔ سیدنا عبداللہ بن مسعود رضی اللہ عنہ نے فرمایا: ”اللہ کی قسم! اگر تم نے واقعی اسے پڑھا ہوتا تو تمہیں اس میں مل جاتا۔“ پھر انہوں نے یہ آیت تلاوت کی: ﴿وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانتَهُوا﴾ [سورة الحشر: 7] ”اور رسول تمہیں جو (حکم) دیں اسے حاصل کر لو اور جس چیز سے تمہیں منع کریں اس سے باز آ جاؤ۔“ وہ عورت بولی: میں نے آپ کی ایک اہلیہ میں ان میں سے کچھ چیزیں دیکھی ہیں، تو سیدنا عبداللہ بن مسعود رضی اللہ عنہ نے فرمایا: ”تم جاؤ اور جا کر جائزہ لے لو۔“ وہ عورت سیدنا عبداللہ بن مسعود رضی اللہ عنہ کے گھر چلی گئی، اسے ایسی کوئی چیز نظر نہیں آئی، پھر وہ سیدنا عبداللہ بن مسعود رضی اللہ عنہ کے پاس آئی اور بتایا کہ میں نے ایسی کوئی چیز نہیں دیکھی تو سیدنا عبداللہ بن مسعود رضی اللہ عنہ نے فرمایا: ”اگر ایسا ہوتا (یعنی میری بیوی نے اس طرح کا کام کیا ہوتا) تو میں اس کے ساتھ نہ رہتا۔“ [صحیح ابن حبان/كتاب الزينة والتطييب/حدیث: 5505]

سیدنا عبداللہ بن عمر رضی اللہ عنہما بیان کرتے ہیں کہ میں نے نبی اکرم صلی اللہ علیہ وسلم کو «القَزَعِ» ”قزع“ سے منع کرتے ہوئے سنا ہے۔ راوی بیان کرتے ہیں کہ میں نے دریافت کیا: قزع سے مراد کیا ہے؟ تو عبیداللہ نامی راوی نے بتایا: جب بچے کا سر مونڈ دیا جائے تو یہاں کچھ بال رہنے دیے جائیں اور یہاں کچھ بال رہنے دیے جائیں۔ عبیداللہ نامی راوی نے اپنی پیشانی اور سر کے ایک طرف اشارہ کر کے یہ بات کہی۔ عبیداللہ سے دریافت کیا گیا کہ کیا اس بارے میں لڑکی اور لڑکے دونوں کا حکم برابر ہے؟ انہوں نے فرمایا: مجھے نہیں معلوم۔ انہوں نے (یعنی میرے استاد نے) یہ روایت اسی طرح بیان کی تھی۔ [صحیح ابن حبان/كتاب الزينة والتطييب/حدیث: 5506]

سیدنا عبداللہ بن عمر رضی اللہ عنہما بیان کرتے ہیں: نبی اکرم صلی اللہ علیہ وسلم نے ” «اَلْقَزَعِ» (قزع) سے منع کیا ہے“ (راوی کہتے ہیں:) اس سے مراد یہ ہے: سر مونڈ دیا جائے اور اس کے کچھ بال چھوڑ دیے جائیں۔ [صحیح ابن حبان/كتاب الزينة والتطييب/حدیث: 5507]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ایک بچے کو دیکھا جس کے کچھ بال مونڈ دیے گئے تھے اور کچھ چھوڑ دیے گئے تھے تو نبی اکرم صلی اللہ علیہ وسلم نے اس سے منع کر دیا اور فرمایا: ”اس کے پورے سر کو مونڈ دو یا پورے سر کو رہنے دو۔“ [صحیح ابن حبان/كتاب الزينة والتطييب/حدیث: 5508]

سیدنا معاویہ بن ابوسفیان رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”دھوکہ دینے (یعنی نقلی بال لگانے)“ سے منع کیا ہے۔ [صحیح ابن حبان/كتاب الزينة والتطييب/حدیث: 5509]

سیدنا معاویہ رضی اللہ عنہ نے منبر پر یہ بات بیان کی، ان کے ہاتھ میں نقلی بالوں کا گچھا تھا، آپ نے فرمایا: خواتین کو کیا ہے وہ اپنے سر میں یہ استعمال کرتی ہیں۔ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو بھی عورت اپنے سر میں دوسری کے بال استعمال کرتی ہے یہ چیز فریب ہو گی۔“ شیخ بیان کرتے ہیں: تمام روایات میں لفظ «زُور» (یعنی دھوکہ) ہے لیکن درست یہ ہے یہ لفظ «زُور» ہے جس میں زیر پیش پڑھی جائے گی۔ [صحیح ابن حبان/كتاب الزينة والتطييب/حدیث: 5510]

سعید بن مسیب بیان کرتے ہیں کہ سیدنا معاویہ رضی اللہ عنہ مدینہ منورہ آئے اور ہمیں خطبہ دیا۔ انہوں نے نقلی بالوں کا گچھا نکالا اور بولے: ”میرا یہ خیال ہے یہ عمل صرف یہودی کرتے ہیں۔ نبی اکرم صلی اللہ علیہ وسلم کو اس بارے میں اطلاع ملی تھی، تو آپ صلی اللہ علیہ وسلم نے اسے ”دھوکہ دہی“ کا نام دیا تھا۔“ [صحیح ابن حبان/كتاب الزينة والتطييب/حدیث: 5511]