سیدنا انس بن مالک رضی اللہ عنہ بیان کرتے ہیں کہ انہوں نے نبی اکرم صلی اللہ علیہ وسلم کے دست مبارک میں ایک دن سونے کی انگوٹھی دیکھی تو لوگوں نے بھی انگوٹھیاں بنوا لیں۔ نبی اکرم صلی اللہ علیہ وسلم نے اسے اتار دیا۔ آپ صلی اللہ علیہ وسلم نے ارشاد فرمایا: ”میں اسے اب کبھی نہیں پہنوں گا۔“ [صحیح ابن حبان/كتاب الزينة والتطييب/حدیث: 5492]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے انگوٹھی بنوائی اور آپ صلی اللہ علیہ وسلم نے اسے پہنا، پھر آپ صلی اللہ علیہ وسلم نے ارشاد فرمایا: ”آج اس نے مجھے تمہاری طرف سے مشغول کر دیا۔“ پھر آپ صلی اللہ علیہ وسلم نے اسے اتار دیا۔ [صحیح ابن حبان/كتاب الزينة والتطييب/حدیث: 5493]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سونے کی انگوٹھی بنوائی، لوگوں نے بھی سونے کی انگوٹھیاں بنوا لیں، پھر نبی اکرم صلی اللہ علیہ وسلم نے اسے اپنے ہاتھ سے اتار دیا اور آپ صلی اللہ علیہ وسلم نے ارشاد فرمایا: ”اب میں اسے کبھی نہیں پہنوں گا۔“ پھر آپ صلی اللہ علیہ وسلم نے چاندی کی انگوٹھی بنوائی، آپ صلی اللہ علیہ وسلم اس کا نگینہ ہتھیلی کی سمت میں رکھتے تھے، آپ صلی اللہ علیہ وسلم نے اس میں «مُحَمَّدٌ رَّسُولُ اللّٰهِ» ”محمد رسول اللہ“ نقش کروایا تھا، یہ انگوٹھی آپ صلی اللہ علیہ وسلم کے دستِ اقدس میں رہی، یہاں تک کہ آپ صلی اللہ علیہ وسلم کا وصال ہو گیا۔ [صحیح ابن حبان/كتاب الزينة والتطييب/حدیث: 5494]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سونے کی انگوٹھی بنوائی، آپ صلی اللہ علیہ وسلم اس کا نگینہ ہتھیلی کی سمت میں رکھتے تھے۔ لوگوں نے بھی انگوٹھیاں بنوا لیں، تو نبی اکرم صلی اللہ علیہ وسلم نے اسے اتار دیا، پھر آپ صلی اللہ علیہ وسلم نے ارشاد فرمایا: ”میں اسے کبھی نہیں پہنوں گا“ پھر آپ صلی اللہ علیہ وسلم نے چاندی کی انگوٹھی بنوائی۔ وہ آپ صلی اللہ علیہ وسلم کے دستِ اقدس میں رہی، پھر سیدنا ابوبکر رضی اللہ عنہ کے ہاتھ میں رہی، پھر سیدنا عمر رضی اللہ عنہ کے ہاتھ میں رہی، پھر سیدنا عثمان رضی اللہ عنہ کے ہاتھ میں رہی، یہاں تک کہ وہ ان سے بئرِ اریس میں گر گئی۔ [صحیح ابن حبان/كتاب الزينة والتطييب/حدیث: 5495]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم کی انگوٹھی کا نقش تین سطروں میں تھا، لفظ «مُحَمَّدٌ» ایک سطر میں تھا، لفظ «رَسُولُ» ایک سطر میں تھا اور لفظ «اللهِ» ایک سطر میں تھا۔ [صحیح ابن حبان/كتاب الزينة والتطييب/حدیث: 5496]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”میں نے انگوٹھی بنوائی ہے، کوئی شخص اس کے نقش کے مطابق نقش نہ بنوائے۔“ [صحیح ابن حبان/كتاب الزينة والتطييب/حدیث: 5497]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے انگوٹھی بنوائی اور آپ صلی اللہ علیہ وسلم نے ارشاد فرمایا: ”ہم نے انگوٹھی بنوائی ہے اور اس میں ایک نقش بنوایا ہے، کوئی شخص اس نقش کے مطابق نقش نہ بنوائے۔“ [صحیح ابن حبان/كتاب الزينة والتطييب/حدیث: 5498]

سیدنا عبداللہ بن عمر رضی اللہ عنہما بیان کرتے ہیں: نبی اکرم صلی اللہ علیہ وسلم نے سونے کی انگوٹھی بنوائی۔ آپ نے اسے اپنے دائیں ہاتھ میں پہنا۔ آپ اس کا نگینے والا رخ ہتھیلی کی سمت میں رکھتے تھے۔ پھر آپ نے اسے اتار دیا اور آپ نے چاندی کی انگوٹھی بنوا لی۔ [صحیح ابن حبان/كتاب الزينة والتطييب/حدیث: 5499]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سونے کی انگوٹھی بنوائی، آپ صلی اللہ علیہ وسلم نے اس کا نگینہ ہتھیلی کی سمت میں رکھا، لوگوں نے بھی سونے کی انگوٹھیاں بنوا لیں، نبی اکرم صلی اللہ علیہ وسلم نے ایک دن اسے اتار دیا، لوگوں نے بھی اپنی انگوٹھیاں اتار دیں، اس کے بعد نبی اکرم صلی اللہ علیہ وسلم نے چاندی کی انگوٹھی بنوائی، آپ صلی اللہ علیہ وسلم اس کے ذریعے مہر لگاتے تھے، آپ صلی اللہ علیہ وسلم اسے پہنتے نہیں تھے۔ [صحیح ابن حبان/كتاب الزينة والتطييب/حدیث: 5500]

سیدنا علی بن ابوطالب رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اپنے دائیں ہاتھ میں انگوٹھی پہنی تھی۔ [صحیح ابن حبان/كتاب الزينة والتطييب/حدیث: 5501]