سیدنا عوف بن مالک رضی اللہ عنہ بیان کرتے ہیں: ہم لوگ زمانہ جاہلیت میں دم کیا کرتے تھے، ہم نے عرض کی: یا رسول اللہ صلی اللہ علیہ وسلم ! آپ اس بارے میں کیا کہتے ہیں؟ نبی اکرم صلی اللہ علیہ وسلم نے فرمایا: ”تم اپنے دم کے الفاظ میرے سامنے پیش کرو، ایسے دم میں کوئی حرج نہیں ہے جس میں شرکیہ الفاظ نہ ہوں۔“ [صحیح ابن حبان/كتاب الرقى والتمائم/حدیث: 6094]

سیدہ میمونہ رضی اللہ عنہا کے بھتیجے روایت کرتے ہیں کہ سیدہ میمونہ رضی اللہ عنہا نے مجھ سے کہا: اے میرے بھتیجے! کیا میں تمہیں وہ دم نہ کروں جو نبی اکرم صلی اللہ علیہ وسلم کیا کرتے تھے؟ میں نے جواب دیا: جی ہاں۔ سیدہ میمونہ رضی اللہ عنہا نے یہ پڑھا: «بِاسْمِ اللّٰهِ أَرْقِيكَ، وَاللّٰهُ يَشْفِيكَ مِنْ كُلِّ دَاءٍ فِيكَ، أَذْهِبِ الْبَاسَ رَبَّ النَّاسِ، اشْفِ وَأَنْتَ الشَّافِي، لَا شَافِيَ إِلَّا أَنْتَ» ”اللہ تعالیٰ کے نام سے برکت حاصل کرتے ہوئے میں تمہیں دم کرتی ہوں، اللہ تعالیٰ تمہیں شفاء عطا فرمائے ہر اس بیماری سے جو تمہیں لاحق ہے۔ اے لوگوں کے پروردگار! تکلیف کو دور کر دے، شفاء عطا فرما، تو ہی شفاء عطا کرنے والا ہے، تیرے علاوہ اور کوئی شفاء عطا کرنے والا نہیں ہے۔“ (امام ابن حبان رحمہ اللہ فرماتے ہیں:) درست یہ ہے کہ راوی کا نام اظہر بن سعد ہے، اظہر بن سعید نہیں ہے۔ [صحیح ابن حبان/كتاب الرقى والتمائم/حدیث: 6095]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم دم کیا کرتے تھے: «أَذْهِبِ الْبَاسَ رَبَّ النَّاسِ، بِيَدِكَ الشِّفَاءُ، لَا كَاشِفَ لَهُ إِلَّا أَنْتَ» ”اے لوگوں کے پروردگار! تو تکلیف کو دور کر دے، شفا تیرے دستِ قدرت میں ہے، اس تکلیف کو صرف تو ہی دور کر سکتا ہے۔“ [صحیح ابن حبان/كتاب الرقى والتمائم/حدیث: 6096]

سیدنا جابر رضی اللہ عنہ بیان کرتے ہیں: نبی اکرم صلی اللہ علیہ وسلم نے دم کرنے سے منع کیا، عرض کی گئی: یا رسول اللہ صلی اللہ علیہ وسلم ! آپ صلی اللہ علیہ وسلم نے دم کرنے سے منع کر دیا ہے۔ نبی اکرم صلی اللہ علیہ وسلم نے ارشاد فرمایا: ”تم میں سے جو شخص اپنے بھائی کو کوئی فائدہ پہنچا سکتا ہو اسے ایسا کر لینا چاہیے۔“ [صحیح ابن حبان/كتاب الرقى والتمائم/حدیث: 6097]

سیدہ عائشہ صدیقہ رضی اللہ عنہا بیان کرتی ہیں کہ ایک مرتبہ نبی اکرم صلی اللہ علیہ وسلم ان کے ہاں تشریف لائے تو ایک خاتون سیدہ عائشہ رضی اللہ عنہا کا علاج کر رہی تھی (راوی کو شک ہے شاید یہ الفاظ ہیں) ان پر دم کر رہی تھی، تو نبی اکرم صلی اللہ علیہ وسلم نے ارشاد فرمایا: ”تم اللہ کی کتاب کے مطابق اس کا علاج کرنا۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”تم اللہ کی کتاب کے مطابق اس کا علاج کرنا“ اس کے ذریعے آپ صلی اللہ علیہ وسلم کی مراد یہ تھی کہ تم ایسے طریقے سے اس کا علاج کرنا جسے اللہ کی کتاب نے مباح قرار دیا ہو؛ کیونکہ پہلے لوگ زمانہ جاہلیت میں ایسے الفاظ کے ذریعے دم کیا کرتے تھے جن میں شرک پایا جاتا تھا، تو نبی اکرم صلی اللہ علیہ وسلم نے ان الفاظ میں دم کرنے سے ان لوگوں کو منع کر دیا، البتہ جس چیز کو اللہ کی کتاب نے مباح قرار دیا ہو اور جس میں شرک نہ ہو اس کا حکم مختلف ہے۔ [صحیح ابن حبان/كتاب الرقى والتمائم/حدیث: 6098]

سیدہ عائشہ صدیقہ رضی اللہ عنہا بیان کرتی ہیں کہ جب نبی اکرم صلی اللہ علیہ وسلم کی خدمت میں کوئی بیمار لایا جاتا تو آپ صلی اللہ علیہ وسلم یہ دعا کرتے تھے: «أَذْهِبِ الْبَأْسَ رَبَّ النَّاسِ، اشْفِ وَأَنْتَ الشَّافِي، لَا شِفَاءَ إِلَّا شِفَاؤُكَ، شِفَاءً لَا يُغَادِرُ سَقَمًا» ”اے لوگوں کے پروردگار! تو تکلیف کو دور کر دے، تو شفا عطا کر دے، تو ہی شفا عطا کرنے والا ہے، شفا صرف وہی ہے جو تو نے عطا کی ہو، تو ایسی شفا عطا کر دے جو بیماری کو بالکل نہ رہنے دے۔“ [صحیح ابن حبان/كتاب الرقى والتمائم/حدیث: 6099]

عبداللہ بن کعب اپنے والد (سیدنا کعب بن مالک رضی اللہ عنہ) کے بارے میں یہ بات نقل کرتے ہیں، انہوں نے عرض کی: یا رسول اللہ صلی اللہ علیہ وسلم ! اس بارے میں آپ صلی اللہ علیہ وسلم کی کیا رائے ہے کہ ہم جو دوا استعمال کرتے ہیں، یا جو دم کرتے ہیں یا اس طرح کے دیگر کام کرتے ہیں، تو کیا یہ اللہ تعالیٰ کی مقرر کردہ تقدیر کو بدل دیتے ہیں؟ نبی اکرم صلی اللہ علیہ وسلم نے فرمایا: ”اے کعب! بلکہ یہ بھی اللہ تعالیٰ کی تقدیر کا حصہ ہے۔“ (امام ابن حبان رحمہ اللہ فرماتے ہیں:) عمرو بن حارث حمصی نامی راوی ثقہ ہے، یہ عمرو بن حارث مصری نہیں ہے۔ [صحیح ابن حبان/كتاب الرقى والتمائم/حدیث: 6100]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ”سانپ اور بچھو کے کاٹنے پر دم کرنے کی اجازت دی ہے۔“ [صحیح ابن حبان/كتاب الرقى والتمائم/حدیث: 6101]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے بنو عمرو بن عوف کو سانپ کے کاٹنے پر دم کرنے کی اجازت دی تھی۔ [صحیح ابن حبان/كتاب الرقى والتمائم/حدیث: 6102]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے انہیں یہ ہدایت فرمائی تھی کہ: ”نظرِ بد لگنے پر دم کروا لیا جائے۔“ [صحیح ابن حبان/كتاب الرقى والتمائم/حدیث: 6103]