سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”نظر لگنے پر، چیونٹی کے کاٹنے پر، بھڑ کے کاٹنے پر دم کرنے کی اجازت دی تھی۔“ [صحیح ابن حبان/كتاب الرقى والتمائم/حدیث: 6104]

سیدنا ابوامامہ رضی اللہ عنہ بیان کرتے ہیں کہ ایک مرتبہ میرے والد سیدنا سہل بن حنیف رضی اللہ عنہ نے خرار کے مقام پر غسل کیا، انہوں نے اپنے جسم پر موجود جبہ اتارا تو عامر بن ربیعہ رضی اللہ عنہ نے انہیں دیکھ لیا، راوی کہتے ہیں کہ سیدنا سہل رضی اللہ عنہ گورے چٹے شخص تھے اور ان کی جلد بہت خوبصورت تھی، عامر بن ربیعہ رضی اللہ عنہ نے کہا: میں نے آج جو (خوبصورت جلد) دیکھی ہے اس طرح کی جلد تو کسی کنواری لڑکی کی بھی نہیں ہوتی، تو سیدنا سہل رضی اللہ عنہ اسی جگہ بیمار ہو گئے اور ان کو تیز بخار ہو گیا، وہ نبی اکرم صلی اللہ علیہ وسلم کی خدمت میں حاضر ہوئے اور انہوں نے نبی اکرم صلی اللہ علیہ وسلم کو بتایا کہ سیدنا سہل رضی اللہ عنہ کو بخار ہو گیا ہے یا رسول اللہ صلی اللہ علیہ وسلم ! وہ آپ صلی اللہ علیہ وسلم کی خدمت میں حاضر ہونے کے قابل بھی نہیں ہیں، نبی اکرم صلی اللہ علیہ وسلم ان کے ہاں تشریف لائے، سیدنا سہل رضی اللہ عنہ نے انہیں عامر بن ربیعہ رضی اللہ عنہ والے واقعہ کے بارے میں بتایا تو نبی اکرم صلی اللہ علیہ وسلم نے فرمایا: ”کوئی شخص کیوں اپنے بھائی کو قتل کرنا چاہتا ہے؟ کیا تمہیں پتہ نہیں ہے نظر لگنا حق ہے، تم اس کے لیے وضو کرو۔“ عامر بن ربیعہ رضی اللہ عنہ نے ان کے لیے وضو کیا تو سیدنا سہل رضی اللہ عنہ نبی اکرم صلی اللہ علیہ وسلم کے ہمراہ چلتے ہوئے آئے یوں جیسے انہیں کوئی تکلیف نہیں تھی (یعنی ان کی بیماری ختم ہو گئی)۔ [صحیح ابن حبان/كتاب الرقى والتمائم/حدیث: 6105]

سیدنا ابوامامہ بن سہل رضی اللہ عنہ بیان کرتے ہیں کہ عامر بن ربیعہ، جن کا تعلق بنو عدی بن کعب سے تھا، انہوں نے سیدنا سہل بن حنیف رضی اللہ عنہ کو دیکھا جو اس وقت نبی اکرم صلی اللہ علیہ وسلم کے ہمراہ خرار کے مقام پر موجود تھے، وہ غسل کرنے لگے تو عامر بن ربیعہ نے کہا: اللہ کی قسم! میں نے کسی پردہ نشین عورت کی بھی اتنی خوبصورت جلد نہیں دیکھی، تو سیدنا سہل رضی اللہ عنہ اسی وقت بیمار ہو گئے، انہیں نبی اکرم صلی اللہ علیہ وسلم کی خدمت میں لایا گیا، عرض کی گئی: یا رسول اللہ صلی اللہ علیہ وسلم ! کیا آپ صلی اللہ علیہ وسلم سہل بن حنیف کا کچھ کریں گے؟ یہ اپنا سر بھی نہیں اٹھا رہے۔ نبی اکرم صلی اللہ علیہ وسلم نے فرمایا: ”کیا تم کسی پر الزام عائد کرتے ہو؟“ لوگوں نے عرض کی: جی ہاں، عامر بن ربیعہ نے انہیں غسل کرتے دیکھا تو یہ کہا: اللہ کی قسم! میں نے تو کسی پردہ نشین عورت کی بھی اتنی اچھی جلد نہیں دیکھی۔ نبی اکرم صلی اللہ علیہ وسلم نے عامر بن ربیعہ کو بلایا اور ان پر ناراضگی کا اظہار کرتے ہوئے فرمایا: ”تم میں سے کوئی ایک کیوں اپنے بھائی کو قتل کرنا چاہتا ہے؟ کیا تم برکت کی دعا نہیں دے سکتے تھے؟ تم اس کے لیے غسل کرو“۔ عامر نے ان کے لیے غسل کیا تو سیدنا سہل رضی اللہ عنہ سواروں کے ساتھ روانہ ہو گئے، یوں جیسے انہیں کوئی تکلیف نہیں تھی (یعنی ان کی بیماری ختم ہو گئی)۔ راوی بیان کرتے ہیں کہ غسل کرنے کا طریقہ یہ ہے کہ پیالہ لایا جائے، غسل کرنے والا شخص اپنے دونوں ہاتھ اس میں داخل کرے، پھر وہ اپنے چہرے کو اس پیالے میں دھوئے (یعنی چہرے کو دھونے والا پانی دوبارہ پیالے میں گرے)، پھر وہ اپنا دایاں ہاتھ اس میں داخل کرے اور اپنے سینے کو پیالے میں دھوئے، وہ اپنا ہاتھ داخل کرے اور اپنی پشت کو دھوئے، اپنا بایاں ہاتھ لے اور اسی طرح کرے، اسی طرح دو گھٹنے دھوئے اور اپنی انگلیوں کے کنارے تک دھوئے، اسی طرح وہ اپنے بائیں پاؤں کے ساتھ کرے، پھر وہ برتن زمین پر رکھنے سے پہلے اس شخص کو دے جسے نظر لگی ہے، پھر وہ اس میں کلی کرے اور اپنے چہرے پر وہ پانی ڈالے اور اپنے سر پر وہ بہائے اور پھر اپنی پشت کے پیچھے کی طرف اس پیالے کو الٹا دے۔ [صحیح ابن حبان/كتاب الرقى والتمائم/حدیث: 6106]

سیدنا عبداللہ بن عباس رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”نظر کا لگنا برحق ہے، اگر کوئی چیز تقدیر پر سبقت لے جا سکتی ہوتی تو نظر اس پر سبقت لے جاتی اور جب تم سے غسل کرنے کے لیے کہا جائے تو تم غسل کر لیا کرو (یعنی نظر کے اثرات دور کرنے کے لیے ایسا کرو)۔“ [صحیح ابن حبان/كتاب الرقى والتمائم/حدیث: 6107]

یہی روایت ایک اور سند کے ہمراہ بھی منقول ہے۔ [صحیح ابن حبان/كتاب الرقى والتمائم/حدیث: 6108]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم ہمیں یہ ہدایت کرتے تھے: ”ہم نظر لگنے کا دم کر دیا کریں۔“ [صحیح ابن حبان/كتاب الرقى والتمائم/حدیث: 6109]

خارجہ بن صلت تیمی اپنے چچا رضی اللہ عنہ کا یہ بیان نقل کرتے ہیں کہ وہ کسی قوم کے پاس سے گزرے جن میں ایک پاگل شخص تھا جسے لوہے میں باندھا گیا تھا، ان میں سے کسی نے کہا: کیا آپ کے پاس کوئی ایسی چیز ہے جس کے ذریعے آپ اس کا علاج کر سکیں؟ کیونکہ آپ کے ساتھی بھلائی لے کر آئے ہیں۔ راوی کہتے ہیں: تو میں نے تین دن تک اس پر سورہ فاتحہ پڑھ کر دم کیا، روزانہ میں دو مرتبہ اس کو دم کرتا تھا تو وہ ٹھیک ہو گیا، پھر اس شخص نے انہیں ایک سو بکریاں دیں، وہ نبی اکرم صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم کے سامنے اس بات کا تذکرہ کیا، تو نبی اکرم صلی اللہ علیہ وسلم نے فرمایا: ”تم اسے کھا لو، کیونکہ جو شخص باطل دم کے ذریعے کھاتا ہے (وہ ممنوع ہے)، تم تو حق کے دم کے ذریعے کھانے لگے ہو۔“ [صحیح ابن حبان/كتاب الرقى والتمائم/حدیث: 6110]

خارجہ بن صلت تیمی اپنے چچا کا یہ بیان نقل کرتے ہیں کہ وہ نبی اکرم صلی اللہ علیہ وسلم کی خدمت میں حاضر ہوئے، جب وہ نبی اکرم صلی اللہ علیہ وسلم کی خدمت سے واپس جا رہے تھے تو ان کا گزر ایک قوم کے پاس سے ہوا جہاں ایک شخص لوہے میں بندھا ہوا تھا، اس کے رشتے داروں نے یہ کہا: ہمیں یہ بات پتہ چلی ہے کہ آپ کے آقا بھلائی لے کر آئے ہیں، تو کیا آپ کے پاس کوئی ایسی چیز ہے جس کے ذریعے آپ اسے دم کر دیں؟ میں نے اس شخص کو سورہ فاتحہ پڑھ کر دم کیا تو وہ ٹھیک ہو گیا، ان لوگوں نے مجھے ایک سو بکریاں دیں، میں نبی اکرم صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے فرمایا: ”اسے حاصل کر لو، میری زندگی کی قسم! جو شخص باطل دم کے ذریعے کھاتا ہے (وہ غلط ہے)، تم تو حق کے دم کے ذریعے کھا رہے ہو۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”تم اسے حاصل کر لو“ اس سے مراد یہ ہے کہ جو چیز حاصل کی گئی ہے اسے جائز قرار دیا جائے اور مستقبل میں بھی ایسا عمل کرنے کو جائز قرار دیا جائے، کیونکہ دم کرنے والے صاحب نے نبی اکرم صلی اللہ علیہ وسلم کی خدمت میں حاضر ہونے سے پہلے وہ بکریاں حاصل کر لی تھیں، اس کے بعد اس بارے میں نبی اکرم صلی اللہ علیہ وسلم سے دریافت کیا تھا، تو نبی اکرم صلی اللہ علیہ وسلم نے ان سے فرمایا: ”انہیں حاصل کر لو“ اس سے مراد یہ ہے کہ ماضی میں جو فعل کیا گیا وہ بھی جائز ہے اور اگر آئندہ کیا جائے تو وہ بھی جائز ہو گا۔ خارجہ بن صلت کے چچا کا نام سیدنا علاقہ بن صحار سلیطی رضی اللہ عنہ ہے اور یہ سلیط بن تمیم کی ایک شاخ ہے۔ [صحیح ابن حبان/كتاب الرقى والتمائم/حدیث: 6111]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں ایک مہم پر روانہ کیا، ہمارا گزر ایک بستی کے پاس سے ہوا، ہم نے انہیں مہمان نوازی کے لیے کہا تو انہوں نے ہماری مہمان نوازی کرنے سے انکار کر دیا، ہم لوگوں نے آبادی سے باہر ایک جگہ پڑاؤ کیا، ان لوگوں کے سردار کو کسی زہریلی چیز نے کاٹ لیا، وہ لوگ ہمارے پاس آئے، انہوں نے کہا: کیا آپ کے درمیان کوئی ایسا شخص ہے جو دم کرتا ہو؟ میں نے کہا: جی ہاں، میں دم کرتا ہوں، ان لوگوں نے کہا: ہمارے ساتھی کو دم کر دیجیے، میں نے کہا: جی نہیں، ہم نے تمہیں مہمان نوازی کے لیے کہا تھا تم نے ہماری مہمان نوازی کرنے سے انکار کر دیا تھا، ان لوگوں نے کہا: ہم آپ کو اس کا معاوضہ دیں گے۔ راوی کہتے ہیں: تو انہوں نے ہمیں تیس (30) بکریاں دینے کا معاہدہ کیا، میں اس شخص کے پاس آیا، میں نے اس پر ہاتھ پھیرنا شروع کیا اور سورۃ فاتحہ پڑھ کر دم کرنا شروع کیا، یہاں تک کہ وہ شخص ٹھیک ہو گیا، تو ہم نے بکریاں حاصل کر لیں، ہم نے سوچا کہ ہم نے بکریاں تو لے لی ہیں لیکن ہمیں باقاعدہ طور پر دم کرنا نہیں آتا، اس لیے ہم ان بکریوں کو اس وقت تک نہیں کھائیں گے جب تک ان کے بارے میں نبی اکرم صلی اللہ علیہ وسلم سے دریافت نہیں کرتے، پھر ہم نبی اکرم صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم کے سامنے اس بات کا تذکرہ کیا۔ نبی اکرم صلی اللہ علیہ وسلم نے دریافت کیا: ”تمہیں کیسے پتا چلا کہ سورہ فاتحہ کا دم بھی ہوتا ہے؟“ میں نے عرض کی: یا رسول اللہ صلی اللہ علیہ وسلم ! مجھے نہیں پتا تھا کہ اس کا دم بھی ہوتا ہے، یہ تو ایک چیز ہے جو اللہ تعالیٰ نے میرے ذہن میں ڈال دی، تو نبی اکرم صلی اللہ علیہ وسلم نے فرمایا: ”تم اسے کھاؤ اور اپنے ساتھ میرا بھی حصہ رکھو۔“ [صحیح ابن حبان/كتاب الرقى والتمائم/حدیث: 6112]

سیدنا ابوسعید خدری رضی اللہ عنہ بیان کرتے ہیں: ہم نے ایک جگہ پڑاؤ کیا، ایک عورت ہمارے پاس آئی اور بولی: ”اس قبیلے کے سردار کو کسی زہریلی چیز نے کاٹ لیا ہے، کیا تمہارے درمیان کوئی دم کرنے والا ہے؟“ راوی کہتے ہیں: تو ہم میں سے ایک شخص اٹھ کر اس کے ساتھ چلا گیا، ہم اس کے بارے میں یہ گمان کرتے تھے کہ یہ اچھا دم کر لیتا ہے، اس نے سورہ فاتحہ پڑھ کر دم کیا تو وہ شخص ٹھیک ہو گیا، ان لوگوں نے ہمیں بکریاں دیں اور ہمیں دودھ بھی پلایا۔ راوی کہتے ہیں: میں نے کہا: ”تم لوگ انہیں حرکت نہ دو جب تک ہم نبی اکرم صلی اللہ علیہ وسلم کی خدمت میں حاضر نہیں ہو جاتے۔“ پھر ہم نبی اکرم صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم کے سامنے اس بات کا تذکرہ کیا تو نبی اکرم صلی اللہ علیہ وسلم نے دریافت فرمایا: ”تمہیں کیسے پتہ چلا کہ اس سورت کا دم بھی ہوتا ہے؟ تم لوگ ان کو تقسیم کر لو اور اپنے ساتھ میرا بھی حصہ رکھو۔“ [صحیح ابن حبان/كتاب الرقى والتمائم/حدیث: 6113]