سیدنا جابر بن عبداللہ رضی اللہ عنہ روایت کرتے ہیں کہ رسول اللہ صلی اللہ علیہ وسلم نے فرمایا: ”بچے کا ذبح کرنا اس کی ماں کے ذبح کرنے میں ہے۔“ [سنن ابي داود/كتاب الضحايا /حدیث: 2828]

ام المؤمنین سیدہ عائشہ رضی اللہ عنہا سے روایت ہے کہ لوگوں نے کہا: ”اے اللہ کے رسول! کچھ لوگ، جو جاہلیت سے نئے نئے نکلے ہیں، ہمارے پاس گوشت لاتے ہیں، ہمیں معلوم نہیں ہوتا کہ انہوں نے ان جانوروں کو ذبح کرتے ہوئے «بِسْمِ اللّٰهِ» ”اللہ کے نام سے“ پڑھی یا نہیں، تو کیا ہم یہ کھا لیں؟“ رسول اللہ صلی اللہ علیہ وسلم نے فرمایا: ”تم اللہ کا نام لو اور کھا لو۔“ [سنن ابي داود/كتاب الضحايا /حدیث: 2829]

سیدنا نبیثہ رضی اللہ عنہ بیان کرتے ہیں کہ ایک شخص نے رسول اللہ صلی اللہ علیہ وسلم کو پکار کر کہا: ”ہم جاہلیت میں رجب کے مہینے میں قربانی کیا کرتے تھے ( «عَتِيرَةٌ»)، تو آپ ہمیں کیا ارشاد فرماتے ہیں؟“ آپ صلی اللہ علیہ وسلم نے فرمایا: ”اللہ کے لیے ذبح کرو جس مہینے میں بھی ہو، اللہ عزوجل کے لیے نیکی کرو اور کھلایا کرو۔“ اس آدمی نے کہا کہ: ”ہم جاہلیت میں «فَرَعٌ» بھی کرتے تھے، تو آپ ہمیں کیا فرماتے ہیں؟“ فرمایا: ”تمام چرنے والے جانوروں میں ایک «فَرَعٌ» ہے (ذبیحہ ہے)، یہ نومولود بچہ جسے کہ تیرے دوسرے جانور غذا دیتے ہیں حتیٰ کہ جب وہ بوجھ اٹھانے کے قابل ہو جائے۔“ نصر بن علی نے کہا: ”جب وہ حاجیوں کو اٹھانے کے قابل ہو جائے تو، تو اسے ذبح کر اور اس کا گوشت صدقہ کر۔“ خالد حذاء کہتے ہیں: میرا خیال ہے کہ (استاذ ابوقلابہ نے) یوں کہا: ”مسافروں پر صدقہ کر بلاشبہ یہ خیر کا عمل ہے۔“ خالد حذاء کہتے ہیں: میں نے استاذ ابوقلابہ سے پوچھا کہ «سَائِمَةٌ» (چرنے والے) جانوروں کی تعداد کیا ہوتی ہے؟ انہوں نے کہا: ”ایک سو۔“ [سنن ابي داود/كتاب الضحايا /حدیث: 2830]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”نہ «فَرَعٌ» (واجب) ہے اور نہ «عَتِيْرَةٌ» ۔“ [سنن ابي داود/كتاب الضحايا /حدیث: 2831]

جناب سعید بن مسیب رحمہ اللہ سے مروی ہے کہ ” «فَرَعْ» اس بچے کو کہتے تھے جو ان کے جانوروں میں سب سے پہلے پیدا ہوتا، پھر وہ اسے ذبح کر دیتے تھے۔“ [سنن ابي داود/كتاب الضحايا /حدیث: 2832]

ام المؤمنین سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے ہمیں حکم دیا کہ ”ہر پچاس بکریوں میں ایک بکری (صدقہ) ہے۔“ امام ابوداؤد رحمہ اللہ فرماتے ہیں: ”بعض علماء نے بیان کیا ہے کہ «الْفَرَعُ» سے مراد اونٹوں میں پیدا ہونے والا پہلا بچہ ہوتا تھا، جسے وہ لوگ اپنے بتوں کے نام سے ذبح کرتے تھے، گوشت کھا لیتے اور اس کا چمڑا کسی درخت پر ڈال دیتے تھے، اور «الْعَتِيرَةُ» اسے کہتے تھے جسے وہ رجب کے پہلے دس دنوں میں ذبح کرتے تھے۔“ [سنن ابي داود/كتاب الضحايا /حدیث: 2833]

سیدہ ام کرز رضی اللہ عنہا بیان کرتی ہیں کہ میں نے رسول اللہ صلی اللہ علیہ وسلم سے سنا آپ صلی اللہ علیہ وسلم فرماتے تھے: ”لڑکے کی طرف سے دو بکریاں برابر برابر (ایک جیسی) اور لڑکی کی طرف سے ایک بکری ہے۔“ امام ابوداؤد رحمہ اللہ فرماتے ہیں: میں نے امام احمد رحمہ اللہ سے سنا، کہتے تھے کہ «مُكَافِئَتَانِ» کے معنی ہیں کہ ”دونوں بکریاں برابر برابر ہوں یا قریب قریب ہوں۔“ [سنن ابي داود/كتاب الضحايا /حدیث: 2834]

سیدہ ام کرز رضی اللہ عنہا بیان کرتی ہیں کہ میں نے نبی کریم صلی اللہ علیہ وسلم سے سنا، آپ صلی اللہ علیہ وسلم فرماتے تھے: ”پرندوں کو اپنے گھونسلوں میں رہنے دو (انہیں اچھا یا برا شگون لینے کے لیے نہ اڑاؤ)۔“ کہتی ہیں: اور میں نے آپ صلی اللہ علیہ وسلم سے سنا ہے، آپ صلی اللہ علیہ وسلم فرماتے تھے: ”لڑکے کی طرف سے دو بکریاں ہوں اور لڑکی کی طرف سے ایک بکری، اور کوئی حرج نہیں کہ دونوں مذکر ہوں یا دونوں مؤنث۔“ [سنن ابي داود/كتاب الضحايا /حدیث: 2835]

سیدہ ام کرز رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: ”لڑکے کی طرف سے دو بکریاں ہیں ہم مثل (ایک جیسی) اور لڑکی کی طرف سے ایک بکری ہے۔“ امام ابوداؤد رحمہ اللہ فرماتے ہیں: ”صحیح حدیث یہی ہے جبکہ سفیان کی حدیث وہم ہے۔“ [سنن ابي داود/كتاب الضحايا /حدیث: 2836]

سیدنا سمرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”ہر بچہ اپنے عقیقے کے ساتھ گروی ہوتا ہے۔ (لہٰذا) ساتویں دن اس کی طرف سے جانور ذبح کیا جائے، سر منڈایا جائے اور اس پر خون لگایا جائے۔“ قتادہ رحمہ اللہ سے جب یہ پوچھا جاتا کہ خون کس طرح لگایا جائے تو وہ کہتے: ”جب جانور ذبح کیا جا رہا ہو تو اس کے چند بال لے کر اس کی (کٹنے والی) رگوں کے آگے کر دو اور بچے کی چندیا پر رکھ دیے جائیں حتیٰ کہ وہ (تازہ تازہ خون) اس کے سر پر دھاگے کی مانند بہنے لگے۔ پھر اس کا سر دھویا جائے اور بال مونڈ دیے جائیں۔“ امام ابوداؤد رحمہ اللہ فرماتے ہیں کہ «وَيُدَمَّىٰ» ”خون لگانے والی بات“ ہمام کا وہم ہے۔ امام ابوداؤد رحمہ اللہ فرماتے ہیں کہ اس جملے میں ہمام کی مخالفت کی گئی ہے۔ دیگر لوگ «وَيُسَمَّىٰ» ”بچے کا نام رکھا جائے“ روایت کرتے ہیں، مگر ہمام نے اس لفظ کو «وَيُدَمَّىٰ» کہہ دیا۔ امام ابوداؤد رحمہ اللہ کہتے ہیں: ”یہ قابل عمل بھی نہیں ہے۔“ [سنن ابي داود/كتاب الضحايا /حدیث: 2837]