سیدنا معاذ رضی اللہ عنہ سے روایت ہے کہ نبی کریم صلی اللہ علیہ وسلم نے جب انہیں یمن کی طرف روانہ کیا تو ان کو حکم دیا کہ ”ہر بالغ سے ایک دینار یا اس کے برابر معافری کپڑا وصول کریں۔“ یہ کپڑا اسی علاقے میں بنا جاتا تھا۔ [سنن ابي داود/كتاب الخراج والفيء والإمارة /حدیث: 3038]

جناب مسروق نے بسند حضرت معاذ رضی اللہ عنہ نبی صلی اللہ علیہ وسلم سے مذکورہ بالا روایت کے ہم معنی روایت بیان کی۔ [سنن ابي داود/كتاب الخراج والفيء والإمارة /حدیث: 3039]

زیاد بن حدیر رضی اللہ عنہ سے روایت ہے کہ سیدنا علی رضی اللہ عنہ نے فرمایا: ”اگر میں زندہ رہا تو ہر صورت بنو تغلب کے عیسائیوں سے سخت جنگ کروں گا اور ان کی اولادوں کو قید کروں گا، بلاشبہ ان کے اور نبی کریم صلی اللہ علیہ وسلم کے درمیان ہونے والا معاہدہ میں نے ہی تحریر کیا تھا کہ یہ لوگ اپنی اولادوں کو عیسائی نہیں بنائیں گے۔“ امام ابوداؤد رحمہ اللہ فرماتے ہیں: ”یہ حدیث منکر ہے (یعنی انتہائی ضعیف ہے)۔“ امام احمد رحمہ اللہ کے متعلق مجھے معلوم ہوا ہے کہ ”وہ اس حدیث کو منکر تصور کرتے تھے۔“ جناب ابوعلی (لؤلؤی) کہتے ہیں کہ ”امام ابوداؤد رحمہ اللہ نے دوسری بار جب اپنی یہ کتاب طلبہ کے سامنے پڑھی تو اس حدیث کی قراءت ہی نہیں کی تھی۔“ [سنن ابي داود/كتاب الخراج والفيء والإمارة /حدیث: 3040]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے اہل نجران سے یہ معاہدہ کیا تھا کہ ”وہ دو ہزار حلے (کپڑوں کے جوڑے) ادا کیا کریں گے، آدھے ماہ صفر میں اور آدھے رجب میں، علاوہ ازیں تیس زرہیں، تیس گھوڑے، تیس اونٹ اور ہر قسم کا اسلحہ جو جنگ میں استعمال ہوتا ہے تیس تیس کی تعداد میں عاریتاً دیا کریں گے اور مسلمان ان چیزوں کے واپس کرنے تک ان کے ضامن ہوں گے (یہ عاریت اس وقت لی جائے گی) جب یمن میں کوئی فساد یا غدر ہو (اور ان کی ضرورت پڑی) اور (ان کے ساتھ عہد تھا کہ) ان کا کوئی معبد نہیں گرایا جائے گا، کسی پادری کو نہیں نکالا جائے گا اور ان کے دین میں کوئی مداخلت نہیں کی جائے گی جب تک کہ یہ دین میں کوئی نئی بات نہ نکالیں اور سود نہ کھائیں۔“ (راوی حدیث) اسماعیل (اسماعیل بن عبدالرحمٰن قرشی سدی) نے کہا: ”چنانچہ ان لوگوں نے سود کھایا۔“ امام ابوداؤد رحمہ اللہ فرماتے ہیں: ”جب وہ کوئی شرط توڑیں گے تو یہ دین میں نئی بات نکالنا ہو گا۔“ [سنن ابي داود/كتاب الخراج والفيء والإمارة /حدیث: 3041]

سیدنا ابن عباس رضی اللہ عنہ سے روایت ہے کہ ”جب اہل فارس کا نبی فوت ہو گیا تو ابلیس نے انہیں مجوسیت (آتش پرستی) پر لگا دیا۔“ [سنن ابي داود/كتاب الخراج والفيء والإمارة /حدیث: 3042]

جناب ابوالشعثاء (جابر بن زید رضی اللہ عنہ) نے کہا: ”میں جزء بن معاویہ کا کاتب (سیکرٹری) تھا اور یہ جناب احنف بن قیس کے چچا تھے، (اس اثنا میں) سیدنا عمر رضی اللہ عنہ کی شہادت سے ایک سال پہلے ہمارے پاس ان (سیدنا عمر رضی اللہ عنہ) کا ایک خط آیا، اس میں تھا: ”ہر جادوگر کو قتل کر دو اور مجوسیوں میں سے جس کسی نے اپنی محرم عورت سے نکاح کیا ہو ان میں تفریق کرا دو اور انہیں (کھانے کے وقت) گنگنانے سے منع کر دو۔“ چنانچہ ہم نے ایک دن تین جادوگرنیوں کو قتل کیا اور کتاب اللہ کے مطابق جس کسی نے اپنی محرم عورت سے نکاح کر رکھا تھا ان میں جدائی کرا دی۔ اور (جزء بن معاویہ نے) بہت سا کھانا تیار کروایا اور پھر انہیں دعوت دی اور اس دوران میں تلوار اپنی ران پر رکھ لی۔ چنانچہ ان لوگوں نے کھانا کھایا مگر گنگنائے نہیں۔ اور ان لوگوں نے ایک خچر یا دو خچروں کے بوجھ برابر چاندی ان (جزء بن معاویہ) کے سامنے ڈال دی اور سیدنا عمر رضی اللہ عنہ مجوسیوں سے جزیہ لینے کے قائل نہ تھے حتیٰ کہ سیدنا عبدالرحمٰن بن عوف رضی اللہ عنہ نے گواہی دی کہ ”رسول اللہ صلی اللہ علیہ وسلم نے ہجر (اہل ہجر) کے مجوسیوں سے جزیہ لیا تھا۔““ [سنن ابي داود/كتاب الخراج والفيء والإمارة /حدیث: 3043]

سیدنا ابن عباس رضی اللہ عنہ سے مروی ہے کہ اہل بحرین کے اسبذی لوگوں کا ایک آدمی رسول اللہ صلی اللہ علیہ وسلم کی خدمت میں آیا، یہ لوگ اہل ہجر کے مجوسی تھے، یہ آدمی کئی دن رسول اللہ صلی اللہ علیہ وسلم کی خدمت میں ٹھہرا رہا۔ پھر جب واپس ہونے لگا تو میں نے اس سے پوچھا: ”تمہارے بارے میں اللہ اور اس کے رسول صلی اللہ علیہ وسلم نے کیا فیصلہ کیا ہے؟“ اس نے کہا: ”بہت برا فیصلہ۔“ میں نے کہا: ”خاموش“ (یعنی اللہ و رسول کا فیصلہ برا نہیں ہو سکتا) کہنے لگا: ”(فیصلہ یہ ہے کہ) یا تو اسلام قبول کر لوں یا قتل ہو جاؤں۔“ راوی نے کہا: سیدنا عبدالرحمٰن بن عوف رضی اللہ عنہ نے کہا کہ ”رسول اللہ صلی اللہ علیہ وسلم نے ان سے جزیہ لینا قبول کیا تھا۔“ سیدنا ابن عباس رضی اللہ عنہ کہتے ہیں کہ ”لوگوں نے سیدنا عبدالرحمٰن بن عوف رضی اللہ عنہ کی بات لے لی ہے اور میری بات چھوڑ دی ہے جو میں نے اس اسبذی سے سنی تھی۔“ [سنن ابي داود/كتاب الخراج والفيء والإمارة /حدیث: 3044]

سیدنا ہشام بن حکیم بن حزام رضی اللہ عنہ نے حمص کے والی کو دیکھا کہ اس نے کئی قبطیوں کو جزیہ ادا نہ کر سکنے کی پاداش میں دھوپ میں کھڑا کیا ہوا تھا۔ انہوں نے کہا: ”یہ کیا ہے؟ میں نے تو رسول اللہ صلی اللہ علیہ وسلم سے سنا ہے، آپ صلی اللہ علیہ وسلم فرماتے تھے: ”جو لوگ دنیا میں دوسروں کو عذاب دیتے ہیں، اللہ تعالیٰ انہیں عذاب دے گا۔“” [سنن ابي داود/كتاب الخراج والفيء والإمارة /حدیث: 3045]

حرب بن عبیداللہ رحمہ اللہ اپنے نانا (عمر ثقفی رضی اللہ عنہ) سے اور وہ اپنے والد رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا: ”دسواں حصہ (جزیہ اور ٹیکس) یہودیوں اور عیسائیوں پر ہے اور مسلمان پر کوئی دسواں نہیں ہے۔“ [سنن ابي داود/كتاب الخراج والفيء والإمارة /حدیث: 3046]

حرب بن عبیداللہ رضی اللہ عنہ، نبی کریم صلی اللہ علیہ وسلم سے روایت کرتے ہیں اور ”مذکورہ بالا حدیث کے ہم معنی بیان کیا اور اس روایت میں لفظ «عُشُور» کی بجائے «خَرَاج» ہے۔“ [سنن ابي داود/كتاب الخراج والفيء والإمارة /حدیث: 3047]