سیدنا ابن عمر رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جس نے کسی مشترک غلام میں سے اپنا حصہ آزاد کر دیا تو اس کا باقی حصہ بھی اس کے مال سے آزاد کیا جائے گا، جبکہ اس کے پاس غلام کی قیمت کے بقدر مال موجود ہو۔“ [سنن ابي داود/كتاب العتق /حدیث: 3946]

جناب سالم اپنے والد (سیدنا عبداللہ بن عمر رضی اللہ عنہ) سے روایت کرتے ہیں، وہ نبی کریم صلی اللہ علیہ وسلم سے روایت کرتے ہیں کہ ”جب کوئی غلام دو آدمیوں میں مشترک ہو اور ان میں سے ایک اپنا حصہ آزاد کر دے تو اگر وہ صاحبِ وسعت ہو تو اس کی طرف سے غلام کی قیمت لگا کر اسے آزاد کر دیا جائے، قیمت لگانے میں کمی کی جائے نہ زیادتی۔“ [سنن ابي داود/كتاب العتق /حدیث: 3947]

ابن التلب (ابن التلب ملقام) اپنے والد رضی اللہ عنہ سے روایت کرتے ہیں کہ ایک شخص نے (مشترک) مملوک میں سے اپنا حصہ آزاد کر دیا تو نبی کریم صلی اللہ علیہ وسلم نے اسے باقی کا ضامن اور ذمہ دار نہیں بنایا تھا۔ امام احمد رحمہ اللہ فرماتے ہیں کہ: ”راوی (ابن التلب) ”تا“ کے ساتھ ہے اور شعبہ رحمہ اللہ قدرے توتلے تھے، ”تا“ (دو نقطے والے) کو ”ثا“ (تین نقطے والے) سے نمایاں نہ کر سکتے تھے۔“ [سنن ابي داود/كتاب العتق /حدیث: 3948]

سیدنا سمرہ بن جندب رضی اللہ عنہ نے بیان کیا، جیسے کہ حماد کا خیال ہے، رسول اللہ صلی اللہ علیہ وسلم نے فرمایا: ”جو کوئی اپنے محرم رشتہ دار کا مالک بن گیا ہو تو وہ آزاد ہے۔“ امام ابوداؤد رحمہ اللہ نے کہا: ”محمد بن بکر برسانی نے بواسطہ حماد بن سلمہ، قتادہ سے، اور عاصم نے بواسطہ حسن بصری، سمرہ رضی اللہ عنہ سے، انہوں نے نبی کریم صلی اللہ علیہ وسلم سے مذکورہ حدیث کے مثل روایت کیا۔“ امام ابوداؤد رحمہ اللہ فرماتے ہیں: ”اس حدیث کو صرف حماد بن سلمہ نے (مرفوع یا متصل) بیان کیا ہے اور اس میں اسے شک بھی ہے۔“ [سنن ابي داود/كتاب العتق /حدیث: 3949]

سیدنا عمر بن خطاب رضی اللہ عنہ نے فرمایا: ”جو اپنے کسی قریبی محرم رشتہ دار کا مالک بن جائے تو وہ آزاد ہے۔“ [سنن ابي داود/كتاب العتق /حدیث: 3950]

جناب حسن (حسن بصری) رحمہ اللہ نے کہا کہ: ”جو کوئی اپنے کسی قریبی محرم رشتہ دار کا مالک بن جائے تو وہ آزاد ہے۔“ [سنن ابي داود/كتاب العتق /حدیث: 3951]

جناب قتادہ رحمہ اللہ نے جابر بن زید رحمہ اللہ اور حسن (حسن بصری) رحمہ اللہ سے اسی کے مثل بیان کیا۔ امام ابوداؤد رحمہ اللہ نے فرمایا: ”سعید، حماد کی نسبت زیادہ حفظ والے ہیں۔“ [سنن ابي داود/كتاب العتق /حدیث: 3952]

سیدہ سلامہ بنت معقل رضی اللہ عنہا بیان کرتی ہیں اور یہ بنو خارجہ قیس عیلان کی خاتون تھیں، کہتی ہیں کہ ایام جاہلیت میں میرا چچا مجھے لے کر آیا اور حباب بن عمرو رضی اللہ عنہ کے ہاتھ بیچ دیا جو ابویسر بن عمرو رضی اللہ عنہ کا بھائی تھا، تو میں نے اس کے بیٹے عبدالرحمٰن بن حباب رضی اللہ عنہ کو جنم دیا۔ پھر وہ (حباب رضی اللہ عنہ) فوت ہو گئے تو ان کی بیوی نے کہا: ”اللہ کی قسم! اب تجھے حباب کے قرضے میں بیچ دیا جائے گا۔“ تو میں رسول اللہ صلی اللہ علیہ وسلم کی خدمت میں حاضر ہوئی اور عرض کیا: ”اے اللہ کے رسول! میں بنو خارجہ قیس عیلان کی خاتون ہوں۔ ایام جاہلیت میں میرا چچا مجھے مدینے لایا تھا اور حباب بن عمرو رضی اللہ عنہ، جو کہ ابویسر بن عمرو رضی اللہ عنہ کا بھائی ہے، کے ہاتھ فروخت کر دیا تھا۔ میں نے اس کے بیٹے عبدالرحمٰن بن حباب رضی اللہ عنہ کو جنم دیا ہے اور اب ان کی بیوی کہہ رہی ہے: اللہ کی قسم! تجھے اس (حباب) کے قرضے کی ادائیگی میں فروخت کر دیا جائے گا۔“ تو رسول اللہ صلی اللہ علیہ وسلم نے دریافت فرمایا: ”حباب کا ولی اور وارث کون ہے؟“ بتایا گیا کہ اس کا بھائی ابویسر بن عمرو رضی اللہ عنہ ہے۔ تو آپ صلی اللہ علیہ وسلم نے ان کو بلا بھیجا اور فرمایا: ”اس کو آزاد کر دو اور جب تمہیں معلوم ہو کہ میرے پاس غلام آئے ہیں تو میرے پاس آنا میں تمہیں اس کا عوض دے دوں گا۔“ سلامہ رضی اللہ عنہا کہتی ہیں کہ پھر انہوں نے مجھے آزاد کر دیا اور رسول اللہ صلی اللہ علیہ وسلم کے پاس غلام آئے تو آپ صلی اللہ علیہ وسلم نے ان کو میرے عوض ایک غلام عنایت فرما دیا۔ [سنن ابي داود/كتاب العتق /حدیث: 3953]

سیدنا جابر بن عبداللہ رضی اللہ عنہ نے بیان کیا کہ ”ہم نے رسول اللہ صلی اللہ علیہ وسلم اور سیدنا ابوبکر رضی اللہ عنہ کے دور میں ام ولد لونڈیوں کو فروخت کیا تھا، پھر جب سیدنا عمر رضی اللہ عنہ کا دور آیا تو انہوں نے ہمیں منع کر دیا، تو ہم رک گئے۔“ [سنن ابي داود/كتاب العتق /حدیث: 3954]

سیدنا جابر بن عبداللہ رضی اللہ عنہ نے روایت کیا کہ ”ایک شخص نے اپنے غلام کے بارے میں کہہ دیا کہ وہ اس کی وفات کے بعد آزاد ہو گا، جب کہ اس کے پاس اس غلام کے سوا کوئی اور مال نہ تھا، چنانچہ اس غلام کے بارے میں نبی کریم صلی اللہ علیہ وسلم نے حکم دیا تو اسے سات سو یا نو سو میں فروخت کیا گیا۔“ [سنن ابي داود/كتاب العتق /حدیث: 3955]