سیدنا عمرو بن شعیب اپنے والد سے، وہ اپنے دادا سے روایت کرتے ہیں کہ نبی کریم صلی اللہ علیہ وسلم نے فرمایا: ”عہد والے (ذمی) کی دیت آزاد سے آدھی ہے۔“ امام ابوداؤد رحمہ اللہ کہتے ہیں کہ اس روایت کو اسامہ بن زید لیثی اور عبدالرحمٰن بن حارث نے عمرو بن شعیب سے اسی کی مثل روایت کیا ہے۔ [سنن ابي داود/كتاب الديات /حدیث: 4583]

سیدنا صفوان اپنے والد یعلیٰ رضی اللہ عنہ سے روایت کرتے ہیں، انہوں نے کہا کہ میرے نوکر کی ایک شخص سے لڑائی ہو گئی تو دوسرے نے اس کے ہاتھ پر دانتوں سے کاٹ لیا، تو اس نے اپنا ہاتھ کھینچ لیا، اس سے اس کے اگلے دو دانت ٹوٹ گئے۔ تو وہ نبی کریم صلی اللہ علیہ وسلم کے پاس چلا گیا تو آپ صلی اللہ علیہ وسلم نے اس (کے اس نقصان) کو ضائع قرار دیا اور فرمایا: ”کیا تو چاہتا تھا کہ وہ اپنا ہاتھ تیرے منہ میں دیے رہتا اور تو اسے اونٹ کی طرح چبا ڈالتا؟“ (عبدالملک بن عبدالعزیز بن جریج نے) کہا کہ ابن ابی ملیکہ نے اپنے دادا سے روایت کیا کہ سیدنا ابوبکر رضی اللہ عنہ نے اسے ضائع قرار دیا اور کہا: ”دور ہو (ضائع ہے) اس کا دانت۔“ [سنن ابي داود/كتاب الديات /حدیث: 4584]

سیدنا یعلیٰ بن امیہ رضی اللہ عنہ نے یہ روایت بیان کی اور مزید کہا کہ پھر نبی کریم صلی اللہ علیہ وسلم نے دانت سے کاٹنے والے سے کہا: ”اگر چاہو تو اپنا ہاتھ اس کے منہ میں دے دو، وہ بھی اسی طرح کاٹے جیسے کہ تم نے کاٹا تھا اور تم بھی اپنا ہاتھ کھینچ لینا۔“ الغرض آپ صلی اللہ علیہ وسلم نے اس کے دانتوں کی دیت ضائع قرار دی۔ [سنن ابي داود/كتاب الديات /حدیث: 4585]

جناب عمرو بن شعیب اپنے والد سے، وہ اپنے دادا سے روایت کرتے ہیں کہ رسول اللہ صلی اللہ علیہ وسلم نے فرمایا: ”جو ایسے ہی طبیب بن کر علاج کرے اور طبابت اور علاج معالجے میں مشہور نہ ہو تو وہ ذمہ دار ہے۔“ نصر بن عاصم نے اپنی سند میں کہا: «حَدَّثَنِي ابْنُ جُرَيْجٍ» ”مجھ سے ابن جریج نے بیان کیا“ امام ابوداؤد رحمہ اللہ کہتے ہیں: ”یہ صرف ولید بن مسلم کی روایت ہے، ہمیں معلوم نہیں کہ صحیح ہے یا نہیں۔“ [سنن ابي داود/كتاب الديات /حدیث: 4586]

جناب عبدالعزیز بن عمر بن عبدالعزیز رحمہ اللہ سے روایت ہے کہ ایک وفد کے لوگ جو میرے والد کے پاس آئے تھے ان میں سے ایک نے کہا کہ رسول اللہ صلی اللہ علیہ وسلم نے فرمایا: ”جو معالج کسی قوم میں طبیب بنا پھرتا ہو، جب کہ اس سے پہلے وہ علم طب میں معروف نہ ہو اور کسی کا نقصان کر دے تو وہ ذمہ دار ہے۔“ عبدالعزیز رحمہ اللہ نے کہا: ”یہ ضمانت دوا بتانے میں نہیں بلکہ یہ رگ کاٹنے، چیرا دینے یا داغ دینے کی صورت میں ہے۔“ [سنن ابي داود/كتاب الديات /حدیث: 4587]

سیدنا عبداللہ بن عمرو رضی اللہ عنہما سے روایت ہے کہ رسول اللہ صلی اللہ علیہ وسلم نے، بقول مسدد فتح والے دن خطبہ ارشاد فرمایا، پھر سلیمان بن حرب اور مسدد دونوں اپنے بیان میں متفق ہیں، آپ صلی اللہ علیہ وسلم نے فرمایا: ”خبردار! تحقیق جاہلیت کے دور کی فخر کی ہر بات خون سے متعلق ہو یا مال سے، جس کا ذکر کیا جاتا ہو یا دعویٰ کیا جاتا ہو، وہ میرے قدموں تلے (روندی جا رہی) ہے، سوائے حاجیوں کو پانی پلانے اور بیت اللہ کی خدمت کے عمل کے۔“ (وہ حسب سابق بحال ہے) پھر فرمایا: ”خبردار! قتل خطا جو عمد کے مشابہ ہو سانٹے یا لاٹھی وغیرہ سے جیسے بھی ہو، اس کی دیت سو اونٹ ہے، ان میں چالیس اونٹنیاں ایسی ہوں جن کے پیٹوں میں بچے ہوں۔“ [سنن ابي داود/كتاب الديات /حدیث: 4588]

”وہیب نے خالد سے اسی سند سے مذکورہ بالا حدیث کے ہم معنی روایت کیا۔“ [سنن ابي داود/كتاب الديات /حدیث: 4589]

سیدنا عمران بن حصین رضی اللہ عنہ سے روایت ہے کہ فقیر لوگوں کا ایک غلام تھا، اس نے امیر لوگوں کے ایک غلام کا کان کاٹ دیا، یہ (امیر) لوگ نبی کریم صلی اللہ علیہ وسلم کے پاس مقدمہ لے آئے تو دوسروں نے جواب دیا کہ: ”اے اللہ کے رسول! ہم لوگ فقیر ہیں،“ تو آپ صلی اللہ علیہ وسلم نے ان پر کوئی چیز نہ ڈالی۔ [سنن ابي داود/كتاب الديات /حدیث: 4590]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جو شخص کسی بلوے میں مارا جائے (اور قاتل دیکھا نہ گیا ہو) کہ ان کی آپس میں سنگباری ہوئی ہو یا سانٹے ڈنڈے بازی تو اس کی دیت قتلِ خطا والی ہو گی۔ اور جو عمداً جان بوجھ کر قتل کیا گیا ہو تو اس میں قاتل کی جان سے قصاص ہے اور جو کوئی اس (قصاص لینے) میں آڑے آئے تو اس پر اللہ کی، فرشتوں کی اور تمام لوگوں کی لعنت ہو۔“ [سنن ابي داود/كتاب الديات /حدیث: 4591]

سیدنا ابوہریرہ رضی اللہ عنہ رسول اللہ صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”(جانور کا) لات مار دینا ضائع ہے اور معدنی کان (کا نقصان) ضائع ہے۔“ امام ابوداؤد رحمہ اللہ کہتے ہیں کہ: ”جانور کا مالک اس پر سوار ہو اور وہ لات مار دے (تو ضائع ہے)۔“ [سنن ابي داود/كتاب الديات /حدیث: 4592]