سیدنا سالم اپنے والد (سیدنا عبداللہ بن عمر رضی اللہ عنہ) سے روایت کرتے ہیں کہ نبی کریم صلی اللہ علیہ وسلم نے فرمایا: ”مسلمان مسلمان کا بھائی ہے، نہ اس پر ظلم و زیادتی کرتا ہے اور نہ اسے اس کے حالات پر چھوڑ دیتا ہے (کہ اس کی کوئی پروا ہی نہ کرے)، جو شخص اپنے بھائی کے کام میں ہو گا (اس کی کوئی ضرورت پوری کرے گا) تو اللہ اس کے کام میں ہو گا (اللہ تعالیٰ بھی اس کی کوئی ضرورت پوری کر دے گا)۔ اور جس نے کسی مسلمان کا ایک دکھ دور کیا اللہ عزوجل قیامت کے روز اس کا ایک دکھ دور کرے گا، اور جس نے کسی مسلمان کا عیب چھپایا، اللہ عزوجل قیامت کے روز اس کے عیب چھپائے گا۔“ [سنن ابي داود/كتاب الأدب /حدیث: 4893]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”آپس میں گالی گلوچ کرنے والے جو بھی کہیں، اس کا گناہ ابتدا کرنے والے ہی پر ہے جب تک کہ مظلوم زیادتی نہ کرے۔“ [سنن ابي داود/كتاب الأدب /حدیث: 4894]

سیدنا عیاض بن حمار رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بلاشبہ اللہ عزوجل نے مجھے وحی فرمائی ہے کہ تواضع اور انکسار اختیار کرو حتیٰ کہ کوئی کسی پر ظلم و زیادتی نہ کرے اور نہ کوئی کسی پر فخر کرے۔“ [سنن ابي داود/كتاب الأدب /حدیث: 4895]

جناب سعید بن مسیب رحمہ اللہ سے روایت ہے کہ ایک بار رسول اللہ صلی اللہ علیہ وسلم بیٹھے ہوئے تھے اور آپ صلی اللہ علیہ وسلم کے ساتھ آپ صلی اللہ علیہ وسلم کے صحابہ رضی اللہ عنہم بھی تھے کہ ایک آدمی نے سیدنا ابوبکر رضی اللہ عنہ کو برا بھلا کہا اور انہیں اذیت دی، تو ابوبکر رضی اللہ عنہ خاموش رہے۔ اس نے پھر دوسری بار اذیت دی تو ابوبکر رضی اللہ عنہ خاموش رہے۔ اس نے پھر تیسری بار اذیت دی تو ابوبکر رضی اللہ عنہ نے اسے بدلے میں کچھ کہا۔ جب سیدنا ابوبکر رضی اللہ عنہ نے اس سے بدلہ لیا تو رسول اللہ صلی اللہ علیہ وسلم اٹھ کھڑے ہوئے، تو ابوبکر رضی اللہ عنہ نے کہا: ”اے اللہ کے رسول! کیا آپ مجھ سے ناراض ہو گئے؟“ تو رسول اللہ صلی اللہ علیہ وسلم نے فرمایا: ”آسمان سے ایک فرشتہ اترا تھا جو اس آدمی کو اس کے کہے پر جھٹلا رہا تھا۔ جب تم نے اس سے بدلہ لیا تو شیطان آ گیا۔ اور جب شیطان آ گیا تو میں نہیں بیٹھ سکتا۔“ [سنن ابي داود/كتاب الأدب /حدیث: 4896]

سیدنا ابوہریرہ رضی اللہ عنہ سے روایت ہے کہ ”ایک آدمی سیدنا ابوبکر رضی اللہ عنہ کو برا بھلا کہا کرتا تھا۔“ اور مذکورہ بالا حدیث کی مانند روایت کیا۔ امام ابوداؤد رحمہ اللہ کہتے ہیں: ”صفوان بن عیسیٰ نے ابن عجلان سے ایسے ہی روایت کیا ہے، جیسے سفیان نے روایت کیا ہے۔“ [سنن ابي داود/كتاب الأدب /حدیث: 4897]

عبداللہ ابن عون رحمہ اللہ کہتے ہیں کہ ”میں آیتِ کریمہ ﴿وَلَمَنِ انْتَصَرَ بَعْدَ ظُلْمِهِ فَأُولَئِكَ مَا عَلَيْهِمْ مِنْ سَبِيلٍ﴾ [سورة الشورى: 41] میں وارد «اِنْتِصَار» کے معنی پوچھتا تھا کہ مجھے علی بن زید بن جدعان رحمہ اللہ نے اپنی سوتیلی والدہ ام محمد رحمہا اللہ سے روایت کیا اور ابن عون رحمہ اللہ نے کہا: ”ان لوگوں کا خیال تھا کہ ام محمد، ام المؤمنین سیدہ عائشہ رضی اللہ عنہا کے ہاں آیا جایا کرتی تھیں۔“ ام محمد رحمہا اللہ نے کہا: ”ام المؤمنین سیدہ عائشہ رضی اللہ عنہا نے بیان کیا کہ رسول اللہ صلی اللہ علیہ وسلم میرے ہاں تشریف لائے، جبکہ ام المؤمنین سیدہ زینب بنت جحش رضی اللہ عنہا بھی ہمارے ہاں تھیں، تو رسول اللہ صلی اللہ علیہ وسلم نے مجھے اپنے ہاتھ سے چھیڑا (جیسے میاں بیوی میں ہوتا ہے) تو میں نے آپ کا ہاتھ پکڑ لیا اور آپ کو اشارے سے سمجھایا کہ وہ (سیدہ زینب بھی) ہمارے ہاں موجود ہیں۔ تو آپ صلی اللہ علیہ وسلم رک گئے۔ پھر سیدہ زینب رضی اللہ عنہا، سیدہ عائشہ رضی اللہ عنہا پر بولنے لگیں۔ رسول اللہ صلی اللہ علیہ وسلم نے سیدہ زینب رضی اللہ عنہا کو منع کیا مگر وہ نہ رکیں تو آپ صلی اللہ علیہ وسلم نے سیدہ عائشہ رضی اللہ عنہا سے کہا: ”اسے جواب دو۔“ چنانچہ انہوں نے اسی انداز سے جواب دیا اور (سیدہ زینب پر) غالب آ گئیں۔ تو سیدہ زینب رضی اللہ عنہا سیدنا علی رضی اللہ عنہ کے ہاں گئیں اور کہا کہ: ”سیدہ عائشہ رضی اللہ عنہا تم لوگوں (بنو ہاشم) کے بارے میں ایسی ایسی باتیں کرتی ہیں اور ایسے ایسے کیا ہے۔“ تو سیدہ فاطمہ رضی اللہ عنہا (رسول اللہ صلی اللہ علیہ وسلم کے پاس) آئیں تو آپ صلی اللہ علیہ وسلم نے انہیں کہا: ”رب کعبہ کی قسم! یہ تمہارے ابا کی چہیتی ہے۔“ چنانچہ سیدہ فاطمہ رضی اللہ عنہا واپس چلی گئیں اور آ کر انہیں (سیدنا علی رضی اللہ عنہ اور سیدہ زینب رضی اللہ عنہا کو) بتایا کہ: ”میں نے آپ سے ایسے ایسے کہا ہے تو آپ صلی اللہ علیہ وسلم نے مجھے ایسے ایسے کہا ہے۔“ چنانچہ سیدنا علی رضی اللہ عنہ نبی کریم صلی اللہ علیہ وسلم کے پاس آئے اور آپ سے اس بارے میں بات کی۔“ [سنن ابي داود/كتاب الأدب /حدیث: 4898]

ام المؤمنین سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: ”جب تمہارا کوئی فوت ہو جائے تو اسے چھوڑ دو اور اس کی عیب چینی مت کرو۔“ [سنن ابي داود/كتاب الأدب /حدیث: 4899]

سیدنا عبداللہ بن عمر رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”اپنے مرنے والوں کی خوبیاں بیان کیا کرو اور ان کی برائیوں سے باز رہو۔“ [سنن ابي داود/كتاب الأدب /حدیث: 4900]

سیدنا ابوہریرہ رضی اللہ عنہ کہتے ہیں کہ میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرماتے تھے: ”بنو اسرائیل میں دو آدمی آپس میں بھائی بنے ہوئے تھے۔ ایک گناہوں میں ملوث تھا جب کہ دوسرا عبادت میں کوشاں رہتا تھا۔ عبادت میں راغب جب بھی دوسرے کو گناہ میں دیکھتا تو اسے کہتا: ”باز آ جا۔“ آخر ایک دن اس نے دوسرے کو گناہ میں پایا تو اسے کہا: ”باز آ جا۔“ اس نے کہا: ”مجھے رہنے دے، میرا معاملہ میرے رب کے ساتھ ہے۔ کیا تو مجھ پر کوئی چوکیدار بنا کر بھیجا گیا ہے؟“ تو اس نے کہا: ”اللہ کی قسم! اللہ تجھے معاف نہیں کرے گا یا تجھے جنت میں داخل نہیں کرے گا۔“ چنانچہ وہ دونوں فوت ہو گئے اور رب العالمین کے ہاں جمع ہوئے، تو اللہ نے عبادت میں کوشش کرنے والے سے فرمایا: ”کیا تو میرے متعلق (زیادہ) جاننے والا تھا یا جو میرے ہاتھ میں ہے تجھے اس پر قدرت حاصل تھی؟“ اور پھر گناہ گار سے فرمایا: ”جا، میری رحمت سے جنت میں داخل ہو جا۔“ اور دوسرے کے متعلق فرمایا: ”اسے جہنم میں لے جاؤ۔““ سیدنا ابوہریرہ رضی اللہ عنہ کہتے ہیں: ”اس ذات کی قسم جس کے ہاتھ میں میری جان ہے! اس نے ایسی بات کہہ دی جس نے اس کی دنیا اور آخرت تباہ کر کے رکھ دی۔“ [سنن ابي داود/كتاب الأدب /حدیث: 4901]

سیدنا ابوبکرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”کوئی گناہ اس لائق نہیں کہ اللہ تعالیٰ اس کی سزا دنیا میں بھی جلدی دے دے اور اس کے ساتھ ساتھ آخرت میں بھی اس کی سزا جمع رکھے جیسے کہ ظلم و زیادتی اور قطع رحمی ہے۔“ [سنن ابي داود/كتاب الأدب /حدیث: 4902]