حضرت عبداللہ بن مسعود رضی اللہ عنہ سے روایت ہے، انہوں نے فرمایا: ”ایک رات میں نے رسول اللہ صلی اللہ علیہ وسلم کی اقتدا میں نماز (تہجد) پڑھی۔ آپ اتنا عرصہ کھڑے رہے کہ میں نے ایک برے کام کا ارادہ کر لیا۔“ (ابو وائل رحمہ اللہ فرماتے ہیں) میں نے کہا: ”وہ کون سا کام تھا؟“ انہوں نے فرمایا: ”میں نے ارادہ کیا کہ میں بیٹھ جاؤں اور رسول اللہ صلی اللہ علیہ وسلم کو کھڑا رہنے دوں۔“ [سنن ابن ماجه/كتاب إقامة الصلاة والسنة/حدیث: 1418]

حضرت مغیرہ بن شعبہ رضی اللہ عنہ سے روایت ہے، انہوں نے فرمایا: اللہ کے رسول صلی اللہ علیہ وسلم نے قیام فرمایا حتیٰ کہ آپ کے قدم مبارک سوج گئے۔ عرض کیا گیا: ”اللہ کے رسول! اللہ نے آپ کے تو اگلے پچھلے گناہ معاف کر دیے ہیں (پھر آپ اتنی مشقت کیوں کرتے ہیں؟)“ آپ صلی اللہ علیہ وسلم نے فرمایا: «أَفَلَا أَكُونُ عَبْدًا شَكُورًا» ”کیا میں شکر گزار بندہ نہ بنوں؟“ [سنن ابن ماجه/كتاب إقامة الصلاة والسنة/حدیث: 1419]

حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم (طویل) نماز پڑھتے تھے حتی کہ آپ کے قدموں پر ورم آجاتا۔ عرض کیا گیا: ”اللہ تعالیٰ نے آپ کے اگلے پچھلے گناہ معاف کر دیے ہیں۔“ نبی صلی اللہ علیہ وسلم نے فرمایا: ”تو کیا میں شکر گزار بندہ نہ بنوں؟“ [سنن ابن ماجه/كتاب إقامة الصلاة والسنة/حدیث: 1420]

حضرت جابر بن عبداللہ رضی اللہ عنہ سے روایت ہے کہ نبی صلی اللہ علیہ وسلم سے سوال کیا گیا: ”کون سی نماز افضل ہے؟“ آپ صلی اللہ علیہ وسلم نے فرمایا: ”لمبا «قُنُوت» (طویل قیام والی نماز)۔“ [سنن ابن ماجه/كتاب إقامة الصلاة والسنة/حدیث: 1421]

حضرت ابو فاطمہ رضی اللہ عنہ سے روایت ہے، انہوں نے فرمایا: میں نے عرض کیا: ”اے اللہ کے رسول! مجھے کوئی عمل بتائیے جس پر میں قائم رہوں اور اسے کیا کروں۔“ آپ صلی اللہ علیہ وسلم نے فرمایا: ”کثرت سے سجدے کیا کر کیونکہ تو اللہ کے لیے جو بھی سجدہ کرے گا، اس کی وجہ سے اللہ تیرا ایک درجہ بلند کر دے گا اور تیری ایک غلطی معاف کر دے گا۔“ [سنن ابن ماجه/كتاب إقامة الصلاة والسنة/حدیث: 1422]

حضرت معدان بن ابی طلحہ یعمری رحمہ اللہ سے روایت ہے، انہوں نے کہا کہ میں حضرت ثوبان رضی اللہ عنہ سے ملا تو میں نے عرض کیا: ”مجھے کوئی حدیث سنائیے، شاید اللہ مجھے اس سے فائدہ پہنچائے۔“ وہ خاموش رہے۔ میں نے دوبارہ عرض کیا تو وہ خاموش رہے۔ میں نے تین بار یہی کہا تو انہوں نے مجھ سے فرمایا: ”اللہ کے لیے سجدے کیا کرو کیونکہ میں نے رسول اللہ صلی اللہ علیہ وسلم کو یہ فرماتے سنا ہے: ”جو بندہ اللہ کے لیے ایک سجدہ کرتا ہے، اس کی وجہ سے اللہ اس کا ایک درجہ بلند کرتا ہے اور اس کی ایک غلطی معاف کر دیتا ہے۔““ حضرت معدان رحمہ اللہ نے فرمایا: پھر میری ملاقات حضرت ابودرداء رضی اللہ عنہ سے ہوئی، میں نے ان سے بھی یہی درخواست کی تو انہوں نے بھی مجھے یہی جواب دیا۔ [سنن ابن ماجه/كتاب إقامة الصلاة والسنة/حدیث: 1423]

حضرت عبادہ بن صامت رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کو یہ فرماتے ہوئے سنا: ”جو بندہ بھی اللہ کے لیے ایک سجدہ کرتا ہے، اللہ اس کے بدلے میں اس کے لیے ایک نیکی لکھتا ہے اور اس (سجدہ) کی وجہ سے اس کا ایک گناہ معاف کرتا ہے اور اس (سجدہ) کی وجہ سے اس کا ایک درجہ بلند کرتا ہے، اس لیے سجدے کثرت سے کرو۔“ [سنن ابن ماجه/كتاب إقامة الصلاة والسنة/حدیث: 1424]

حضرت انس بن حکیم ضبی رحمہ اللہ سے روایت ہے، انہوں نے کہا کہ مجھ سے حضرت ابوہریرہ رضی اللہ عنہ نے فرمایا: ”جب تو اپنے شہر والوں کے پاس پہنچے تو انہیں بتانا کہ میں نے رسول اللہ صلی اللہ علیہ وسلم کو یہ فرماتے سنا ہے: ”مسلمان بندے سے قیامت کے دن سب سے پہلے جس چیز کا حساب لیا جائے گا وہ فرض نماز ہے۔ اگر اس نے پوری نمازیں پڑھی ہوں گی تو ٹھیک ہے ورنہ کہا جائے گا: ”دیکھو کیا اس کے کوئی نفل بھی ہیں؟“ اگر اس کے نفل ہوئے تو اس کے فرضوں کی کمی نفلوں سے پوری کر دی جائے گی، پھر دوسرے فرض اعمال کا حساب بھی اسی طرح ہوگا۔“” [سنن ابن ماجه/كتاب إقامة الصلاة والسنة/حدیث: 1425]

حضرت تمیم داری رضی اللہ عنہ سے روایت ہے، نبی صلی اللہ علیہ وسلم نے فرمایا: ”قیامت کے دن بندے سے جس عمل کا سب سے پہلے حساب لیا جائے گا وہ اس کی (فرض) نماز ہے۔ اگر اسے پورا ادا کیا ہوگا تو (باقی نمازیں) اس کے لیے نفل لکھ دی جائیں گی۔ اگر انہیں پورا نہیں ادا کیا ہوگا تو اللہ تعالیٰ فرشتوں سے فرمائے گا: ”دیکھو، کیا تمہیں میرے بندے کے کوئی نفل ملتے ہیں؟ اس نے اپنے فرائض میں جو کوتاہی کی تھی، وہ ان (نوافل) سے پوری کرو۔“ پھر دوسرے اعمال کا حساب بھی اسی انداز سے ہوگا۔“ [سنن ابن ماجه/كتاب إقامة الصلاة والسنة/حدیث: 1426]

حضرت ابوہریرہ رضی اللہ عنہ سے روایت ہے، نبی صلی اللہ علیہ وسلم نے فرمایا: ”کیا تم میں سے کسی سے یہ نہیں ہو سکتا کہ جب وہ نماز پڑھے تو آگے پیچھے یا دائیں بائیں ہو جائے۔“ یعنی نفل و سنت پڑھتے وقت۔ [سنن ابن ماجه/كتاب إقامة الصلاة والسنة/حدیث: 1427]