حضرت عائشہ رضی اللہ عنہا سے روایت ہے، انہوں نے فرمایا: ”اللہ تعالیٰ نے قرآن مجید میں جو کچھ نازل فرمایا، پھر اس کی تلاوت منسوخ ہو گئی، اس میں یہ بھی تھا کہ دس بار دودھ پلانے، یا پانچ بار دودھ پلانے ہی سے محرم کا رشتہ قائم ہوتا ہے۔“ [سنن ابن ماجه/كتاب النكاح/حدیث: 1942]

ام المؤمنین حضرت عائشہ رضی اللہ عنہا سے روایت ہے، انہوں نے فرمایا: ”حضرت سہلہ بنت سہیل رضی اللہ عنہا نے نبی صلی اللہ علیہ وسلم کی خدمت میں حاضر ہو کر عرض کیا: اے اللہ کے رسول! جب سالم میرے ہاں آتے ہیں تو مجھے (اپنے شوہر) حضرت ابوحذیفہ رضی اللہ عنہ کے چہرے پر ناگواری کے آثار نظر آتے ہیں، تو نبی صلی اللہ علیہ وسلم نے فرمایا: اسے دودھ پلا دو۔ انہوں نے کہا: میں اسے کس طرح دودھ پلاؤں، وہ تو جوان آدمی ہے؟ رسول اللہ صلی اللہ علیہ وسلم مسکرائے اور فرمایا: مجھے معلوم ہے کہ وہ جوان آدمی ہے۔ حضرت سہلہ رضی اللہ عنہا نے ایسے ہی کیا۔ (بعد میں) وہ نبی صلی اللہ علیہ وسلم کی خدمت میں حاضر ہوئیں اور کہا: اس کے بعد میں نے حضرت ابوحذیفہ رضی اللہ عنہ کے چہرے پر وہ تاثرات نہیں دیکھے جو مجھے ناگوار ہوں۔ حضرت ابوحذیفہ رضی اللہ عنہ جنگ بدر میں شریک تھے۔“ [سنن ابن ماجه/كتاب النكاح/حدیث: 1943]

حضرت عائشہ رضی اللہ عنہا سے روایت ہے، انہوں نے فرمایا: ”رجم کی آیت اور بڑی عمر کے لڑکے کو دس بار دودھ پلانے کے مسئلہ پر مشتمل آیت نازل ہوئی تھی۔ یہ دونوں آیتیں ایک کاغذ پر لکھی ہوئی میرے بستر پر پڑی تھیں۔ جب رسول اللہ صلی اللہ علیہ وسلم کی وفات ہوئی، ہم آپ صلی اللہ علیہ وسلم کے غسل و کفن وغیرہ میں مشغول ہو گئے تو ایک بکری آئی اور وہ کاغذ کھا گئی۔“ [سنن ابن ماجه/كتاب النكاح/حدیث: 1944]

حضرت عائشہ رضی اللہ عنہا سے روایت ہے کہ نبی صلی اللہ علیہ وسلم ان کے پاس تشریف لائے تو ان کے پاس ایک مرد بیٹھا تھا۔ آپ صلی اللہ علیہ وسلم نے فرمایا: ”یہ کون ہے؟“ انہوں نے کہا: ”یہ میرا بھائی ہے۔“ آپ صلی اللہ علیہ وسلم نے فرمایا: ”غور کر لیا کرو کہ تم کسے اپنے پاس آنے کی اجازت دے رہی ہو کیونکہ رضاعت بھوک سے ہوتی ہے۔“ [سنن ابن ماجه/كتاب النكاح/حدیث: 1945]

حضرت عبداللہ بن زبیر رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”رضاعت وہی (معتبر) ہے جو آنتوں کو پھاڑے۔“ [سنن ابن ماجه/كتاب النكاح/حدیث: 1946]

حضرت زینب بنت ابوسلمہ رضی اللہ عنہا سے روایت ہے، انہوں نے فرمایا: ”نبی صلی اللہ علیہ وسلم کی تمام ازواج مطہرات رضی اللہ عنہن نے حضرت عائشہ رضی اللہ عنہا سے اختلاف کیا، انہوں نے حضرت ابوحذیفہ رضی اللہ عنہ کے آزاد کردہ غلام حضرت سالم رضی اللہ عنہ کی سی رضاعت کی بنا پر کسی کو اپنے پاس آنے کی اجازت نہیں دی (ایسے افراد سے پردہ کیا) اور فرمایا: کیا معلوم شاید یہ اجازت صرف حضرت سالم رضی اللہ عنہ کے لیے مخصوص ہو۔“ [سنن ابن ماجه/كتاب النكاح/حدیث: 1947]

ام المؤمنین حضرت عائشہ رضی اللہ عنہا سے روایت ہے، انہوں نے فرمایا: ”میرے رضاعی چچا حضرت افلح بن ابی قعیس رضی اللہ عنہ نے آ کر مجھ سے اندر آنے کی اجازت طلب کی، اس وقت پردے کا حکم نازل ہو چکا تھا۔ چنانچہ میں نے اجازت دینے سے انکار کر دیا حتی کہ نبی صلی اللہ علیہ وسلم میرے پاس تشریف لائے۔ (میں نے واقعہ عرض کیا) تو نبی صلی اللہ علیہ وسلم نے فرمایا: ”وہ تیرے چچا ہیں، انہیں اجازت دو۔“ میں نے کہا: ”مجھے عورت نے دودھ پلایا ہے، مرد نے تو نہیں پلایا۔“ آپ صلی اللہ علیہ وسلم نے فرمایا: «تَرِبَتْ يَدَاكِ» ”تیرے ہاتھ کو مٹی لگے۔“ یا «تَرِبَتْ يَمِينُكِ» ”تیرے دائیں ہاتھ کو مٹی لگے۔““ [سنن ابن ماجه/كتاب النكاح/حدیث: 1948]

حضرت عائشہ رضی اللہ عنہا سے روایت ہے، انہوں نے فرمایا: ”میرے رضاعی چچا نے آکر مجھ سے اندر آنے کی اجازت طلب کی، میں نے انہیں اجازت دینے سے انکار کر دیا۔ (معلوم ہونے پر) رسول اللہ صلی اللہ علیہ وسلم نے فرمایا: ”تیرے چچا کو تیرے پاس (گھر میں) آنا چاہیے۔“ میں نے کہا: ”مجھے عورت نے دودھ پلایا ہے، مرد نے دودھ نہیں پلایا۔“ آپ صلی اللہ علیہ وسلم نے فرمایا: ”وہ تیرے چچا ہیں، انہیں تیرے پاس آنا چاہیے۔““ [سنن ابن ماجه/كتاب النكاح/حدیث: 1949]

حضرت فیروز دیلمی رضی اللہ عنہ سے روایت ہے، انہوں نے فرمایا: ”میں رسول اللہ صلی اللہ علیہ وسلم کی خدمت میں حاضر ہوا تو میرے نکاح میں دو بہنیں تھیں جن سے میں نے زمانہ جاہلیت میں نکاح کیا تھا تو نبی صلی اللہ علیہ وسلم نے فرمایا: ”جب واپس جاؤ تو ان میں سے ایک کو طلاق دے دینا۔“” [سنن ابن ماجه/كتاب النكاح/حدیث: 1950]

حضرت فیروز دیلمی رضی اللہ عنہ سے روایت ہے، انہوں نے فرمایا: ”میں نبی صلی اللہ علیہ وسلم کی خدمت میں حاضر ہوا۔ میں نے کہا: اللہ کے رسول! میں نے اسلام قبول کر لیا ہے اور میرے نکاح میں دو بہنیں ہیں۔“ رسول اللہ صلی اللہ علیہ وسلم نے مجھے فرمایا: ”ان میں سے جس عورت کو چاہو طلاق دے دو۔“ [سنن ابن ماجه/كتاب النكاح/حدیث: 1951]