حضرت فاطمہ بنت قیس رضی اللہ عنہا سے روایت ہے، انہوں نے فرمایا کہ ”مجھے میرے خاوند نے رسول اللہ صلی اللہ علیہ وسلم کے زمانے میں تین طلاقیں دے دیں“ تو رسول اللہ صلی اللہ علیہ وسلم نے فرمایا: ”تیرے لیے نہ رہائش ہے نہ خرچ۔“ [سنن ابن ماجه/كتاب الطلاق/حدیث: 2036]

حضرت عائشہ رضی اللہ عنہا سے روایت ہے کہ حضرت عمرہ بنت جون رضی اللہ عنہا کو جب رسول اللہ صلی اللہ علیہ وسلم کی خدمت میں پیش کیا گیا (جب ان کی رخصتی ہوئی) تو انہوں نے رسول اللہ صلی اللہ علیہ وسلم سے اللہ کی پناہ مانگی (یہ کہا: «أَعُوذُ بِاللَّهِ مِنْكَ» ”آپ سے اللہ بچائے۔“) نبی صلی اللہ علیہ وسلم نے فرمایا: «لَقَدْ عُذْتِ بِمَعَاذٍ» ”تو نے اس کی پناہ لی ہے جس کی پناہ لی جاتی ہے۔“ چنانچہ آپ صلی اللہ علیہ وسلم نے اسے طلاق دے دی اور حضرت اسامہ رضی اللہ عنہ یا حضرت انس رضی اللہ عنہ کو حکم دیا تو انہوں نے اسے تین سفید سوتی کپڑے دے دیے۔ [سنن ابن ماجه/كتاب الطلاق/حدیث: 2037]

حضرت عبداللہ بن عمرو رضی اللہ عنہ سے روایت ہے، نبی صلی اللہ علیہ وسلم نے فرمایا: ”جب عورت خاوند سے طلاق مل جانے کا دعویٰ کرے اور ایک قابلِ اعتماد گواہ پیش کر دے تو اس کے خاوند سے قسم اٹھانے کا مطالبہ کیا جائے گا۔ اگر اس نے قسم کھا لی (کہ میں نے طلاق نہیں دی) تو گواہ کی گواہی کالعدم ہو جائے گی۔ اور اگر اس نے قسم سے انکار کیا تو اس کا انکار دوسرے گواہ کے قائم مقام ہو جائے گا اور اس کی طلاق نافذ کر دی جائے گی۔“ [سنن ابن ماجه/كتاب الطلاق/حدیث: 2038]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”تین چیزیں قصد و ارادے سے کی جائیں تو بھی حقیقی (شمار ہوتی) ہیں اور ہنسی مذاق میں کی جائیں تو بھی حقیقی (شمار ہوتی) ہیں: نکاح، طلاق اور رجوع۔“ [سنن ابن ماجه/كتاب الطلاق/حدیث: 2039]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اللہ تعالیٰ نے میری امت کے لوگوں سے وہ سب کچھ معاف کر دیا ہے جو وہ اپنے دلوں میں بات کریں، جب تک اس (خیال) کو عمل میں نہ لائیں یا (زبان سے) کلام نہ کریں۔“ [سنن ابن ماجه/كتاب الطلاق/حدیث: 2040]

حضرت عائشہ رضی اللہ عنہا سے روایت ہے، رسول اللہ صلی اللہ علیہ وسلم نے فرمایا: ”تین افراد سے قلم اٹھا لیا گیا ہے: سوئے ہوئے سے حتی کہ وہ جاگ پڑے، بچے سے حتی کہ وہ بالغ ہو جائے اور دیوانے سے حتی کہ اس کی عقل واپس آ جائے، یا اسے (وقتی طور پر) افاقہ ہو جائے۔“ ایک روایت میں ہے: ”(ذہنی) بیماری والے سے حتی کہ وہ تندرست ہو جائے۔“ [سنن ابن ماجه/كتاب الطلاق/حدیث: 2041]

حضرت علی بن ابی طالب رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”بچے سے، پاگل سے اور سوئے ہوئے سے قلم اٹھا لیا جاتا ہے۔“ [سنن ابن ماجه/كتاب الطلاق/حدیث: 2042]

حضرت ابوذر غفاری رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اللہ تعالیٰ نے میری خاطر میری امت کو غلطی، بھول اور وہ کام معاف کر دیے ہیں جن پر انہیں مجبور کیا گیا ہو۔“ [سنن ابن ماجه/كتاب الطلاق/حدیث: 2043]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اللہ تعالیٰ نے میری امت کے ان کے دلوں میں آنے والے وسوسے معاف کر دیے ہیں، جب تک ان پر عمل نہ کریں، یا انہیں زبان سے ادا نہ کریں اور (وہ گناہ بھی معاف کر دیے ہیں) جن پر انہیں زبردستی مجبور کیا جائے۔“ [سنن ابن ماجه/كتاب الطلاق/حدیث: 2044]

حضرت عبداللہ بن عباس رضی اللہ عنہما سے روایت ہے، نبی صلی اللہ علیہ وسلم نے فرمایا: ”اللہ تعالیٰ نے میری امت سے غلطی، بھول اور وہ گناہ معاف کر دیے ہیں جن پر انہیں زبردستی مجبور کیا گیا ہو۔“ [سنن ابن ماجه/كتاب الطلاق/حدیث: 2045]