حضرت عبداللہ بن عباس رضی اللہ عنہما سے روایت ہے کہ حضرت جمیلہ بنت سلول رضی اللہ عنہا نے نبی صلی اللہ علیہ وسلم کی خدمت میں حاضر ہو کر عرض کی: ”اللہ کی قسم! میں ثابت (بن قیس بن شماس) رضی اللہ عنہ کے دین اور اخلاق (کی کسی خرابی) کی وجہ سے ناراض نہیں لیکن مجھے مسلمان ہوتے ہوئے (خاوند کی) ناشکری کرنا اچھا نہیں لگتا۔ مجھے وہ اتنے برے لگتے ہیں کہ میں ان کے ساتھ نہیں رہ سکتی۔“ تو نبی صلی اللہ علیہ وسلم نے ان سے فرمایا: ”کیا تم اسے اس کا باغ واپس دے دو گی؟“ انہوں نے کہا: ”جی ہاں۔“ رسول اللہ صلی اللہ علیہ وسلم نے حضرت ثابت رضی اللہ عنہ کو حکم دیا کہ ”ان سے باغ واپس لے لیں اور زائد کچھ نہ لیں۔“ [سنن ابن ماجه/كتاب الطلاق/حدیث: 2056]

حضرت عبداللہ بن عمرو بن عاص رضی اللہ عنہ سے روایت ہے، انہوں نے فرمایا: ”حضرت حبیبہ بنت سہیل رضی اللہ عنہا حضرت ثابت بن قیس بن شماس رضی اللہ عنہ کے نکاح میں تھیں، اور وہ خوش شکل آدمی نہ تھے۔ حضرت حبیبہ رضی اللہ عنہا نے عرض کیا: ”اے اللہ کے رسول! قسم ہے اللہ کی! اگر اللہ کا ڈر نہ ہوتا تو جب وہ میرے پاس آئے تھے، میں ان کے چہرے پر تھوک دیتی۔“ تو رسول اللہ صلی اللہ علیہ وسلم نے فرمایا: ”کیا تم اس کا باغ واپس کرتی ہو؟“ انہوں نے کہا: ”جی ہاں۔“ (راویِ حدیث نے کہا:) چنانچہ انہوں نے ان کا باغ واپس کر دیا اور رسول اللہ صلی اللہ علیہ وسلم نے ان کے درمیان جدائی کروا دی۔“ [سنن ابن ماجه/كتاب الطلاق/حدیث: 2057]

حضرت عبادہ بن ولید رضی اللہ عنہ نے حضرت ربیع بنت معوذ بن عفراء رضی اللہ عنہا سے روایت کرتے ہوئے فرمایا کہ میں نے انہیں کہا: ”مجھے اپنا واقعہ سنائیے۔“ انہوں نے فرمایا: ”میں نے اپنے خاوند سے خلع لے لیا، پھر میں نے حضرت عثمان رضی اللہ عنہ کی خدمت میں حاضر ہو کر پوچھا: ”مجھ پر کتنی عدت ہے؟“ انہوں نے فرمایا: ”تم پر کوئی عدت نہیں، سوائے اس صورت کے کہ اس نے تجھ سے تھوڑا عرصہ پہلے مقاربت کی ہو، تب تم اس کے پاس ٹھہری رہو حتی کہ ایک حیض آ جائے۔““ حضرت ربیع رضی اللہ عنہا نے فرمایا: ”حضرت عثمان رضی اللہ عنہ نے اس مقدمے میں رسول اللہ صلی اللہ علیہ وسلم کے اس فیصلے کی پیروی کی تھی جو آپ صلی اللہ علیہ وسلم نے حضرت مریم مغالیہ رضی اللہ عنہا کے بارے میں دیا تھا۔ وہ حضرت ثابت بن قیس رضی اللہ عنہ کے نکاح میں تھیں، پھر انہوں نے خلع لے لیا تھا۔“ [سنن ابن ماجه/كتاب الطلاق/حدیث: 2058]

حضرت عائشہ رضی اللہ عنہا سے روایت ہے، انہوں نے فرمایا: رسول اللہ صلی اللہ علیہ وسلم نے قسم کھا لی کہ آپ ایک مہینہ ازواج مطہرات رضی اللہ عنہن کے پاس تشریف نہیں لے جائیں گے، چنانچہ آپ انتیس دن ٹھہرے رہے۔ جب تیسویں دن کی شام ہوئی تو آپ میرے ہاں تشریف لے آئے۔ میں نے عرض کی: ”آپ نے قسم کھائی تھی کہ مہینہ بھر آپ ہمارے پاس تشریف نہیں لائیں گے۔ (اور ابھی انتیس دن پورے ہوئے ہیں، صبح تیسواں دن ہو گا۔)“ تو آپ نے تین بار انگلیوں کا اشارہ کرتے ہوئے فرمایا: ”مہینہ اتنا ہوتا ہے (تیس دن کا۔)“ اور (دوسری بار) ساری انگلیوں سے (دوبار) اشارہ فرما کر تیسری بار ایک انگلی بند کی، اور فرمایا: ”اور مہینہ اتنا بھی ہوتا ہے (انتیس دن۔)“ [سنن ابن ماجه/كتاب الطلاق/حدیث: 2059]

حضرت عائشہ رضی اللہ عنہا سے روایت ہے، انہوں نے فرمایا: ”رسول اللہ صلی اللہ علیہ وسلم نے اس لیے ایلاء کیا تھا کہ ام المومنین زینب رضی اللہ عنہا نے آپ کا بھیجا ہوا ہدیہ واپس کر دیا تھا۔“ (اس پر) حضرت عائشہ رضی اللہ عنہا نے کہا: ”زینب رضی اللہ عنہا نے آپ کی عظمت و شان کا خیال نہیں کیا۔ آپ صلی اللہ علیہ وسلم کو غصہ آ گیا اور آپ نے ان (سب) سے ایلاء کر لیا۔“ [سنن ابن ماجه/كتاب الطلاق/حدیث: 2060]

ام المومنین حضرت ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم نے اپنی بعض ازواجِ مطہرات رضی اللہ عنہن سے ایک مہینے کے لیے ایلاء کیا۔ جب انتیس دن ہو گئے تو (تیسویں دن) رسول اللہ صلی اللہ علیہ وسلم صبح یا شام کے وقت (امہات المومنین کے پاس) تشریف لے گئے۔ عرض کیا گیا: ”اے اللہ کے رسول! ابھی انتیس دن گزرے ہیں۔“ نبی صلی اللہ علیہ وسلم نے فرمایا: ”مہینہ انتیس دن کا ہے۔“ [سنن ابن ماجه/كتاب الطلاق/حدیث: 2061]

حضرت سلمہ بن صخر بیاضی رضی اللہ عنہ سے روایت ہے، انہوں نے کہا: ”مجھے عورتوں سے بہت رغبت تھی۔ میرے خیال میں کوئی مرد اتنی کثرت سے صحبت نہیں کرتا ہو گا جس کثرت سے میں کرتا تھا۔ جب رمضان شروع ہوا تو میں نے رمضان ختم ہونے تک بیوی سے ظہار کر لیا۔ ایک رات وہ مجھ سے باتیں کر رہی تھی کہ اس کے جسم کا کچھ حصہ کھل گیا۔ میں بے قابو ہو کر اس سے ہم بستر ہو گیا۔ جب صبح ہوئی تو میں نے اپنی قوم (کے کچھ افراد) کے پاس جا کر اپنا واقعہ سنایا اور انہیں کہا: ”مجھے رسول اللہ صلی اللہ علیہ وسلم سے (مسئلہ) پوچھ دیں (کہ اس کا کفارہ کیا ہے؟)“ انہوں نے کہا: ”ہم لوگ تو نہیں پوچھیں گے۔ (اگر ہم نے پوچھا تو) اللہ تعالیٰ ہمارے بارے میں قرآن مجید (کی آیات) نازل فرما دے گا، یا رسول اللہ صلی اللہ علیہ وسلم کچھ (ناراضی والے) الفاظ ارشاد فرما دیں گے جو ہمارے لیے عار کا باعث بنے رہیں گے، اس لیے ہم تیرے گناہ کے بدلے تجھی کو بھیجتے ہیں۔ تو خود ہی جا کر رسول اللہ صلی اللہ علیہ وسلم کی خدمت میں اپنا معاملہ عرض کر۔““ (حضرت سلمہ رضی اللہ عنہ فرماتے ہیں) ”میں روانہ ہوا حتی کہ آپ صلی اللہ علیہ وسلم کی خدمت میں حاضر ہو گیا اور اپنا واقعہ عرض کیا تو رسول اللہ صلی اللہ علیہ وسلم نے فرمایا: ”تو نے یہ کام کیا ہے؟“ میں نے کہا: ”میں نے یہ کام کیا ہے اور اے اللہ کے رسول! میں حاضر ہوں۔ اللہ کا میرے بارے میں جو حکم ہو گا، اس پر صبر (اور اسے دل سے قبول) کرتا ہوں۔“ نبی صلی اللہ علیہ وسلم نے فرمایا: ”ایک گردن (غلام یا لونڈی) آزاد کر دو۔“ میں نے کہا: ”قسم ہے اس ذات کی جس نے آپ کو حق دے کر مبعوث فرمایا ہے! میں تو صرف اپنی اس گردن کا مالک ہوں۔“ آپ صلی اللہ علیہ وسلم نے فرمایا: ”تب مسلسل دو ماہ کے روزے رکھ لو۔“ میں نے عرض کیا: ”اے اللہ کے رسول! مجھ پر جو آزمائش آئی ہے، یہ بھی روزوں ہی کی وجہ سے آئی ہے۔“ آپ صلی اللہ علیہ وسلم نے فرمایا: ”تب صدقہ کر۔“ یا فرمایا: ”ساٹھ مسکینوں کو کھانا کھلا۔“ میں نے کہا: ”قسم ہے اس ذات کی جس نے آپ کو حق دے کر مبعوث فرمایا ہے! ہم نے تو یہ رات اسی طرح گزاری ہے کہ ہمارے پاس شام کا کھانا بھی نہیں تھا۔“ نبی صلی اللہ علیہ وسلم نے فرمایا: ”قبیلہ بنو زریق کی زکاۃ جمع کرنے والے عامل کے پاس جا، اسے کہہ کہ وہ (اپنے قبیلے کی) زکاۃ تجھے دے دے۔ (اس میں سے) ساٹھ مسکینوں کو کھانا کھلا دے اور باقی سے خود فائدہ اٹھا لینا۔““ [سنن ابن ماجه/كتاب الطلاق/حدیث: 2062]

حضرت عروہ بن زبیر رحمہ اللہ سے روایت ہے، انہوں نے کہا کہ حضرت عائشہ رضی اللہ عنہا نے فرمایا: ”اللہ بڑی برکتوں والا ہے جو سب کچھ سنتا ہے۔ جب حضرت خولہ بنت ثعلبہ رضی اللہ عنہا رسول اللہ صلی اللہ علیہ وسلم سے اپنے خاوند (حضرت اوس بن صامت رضی اللہ عنہ) کی شکایت کر رہی تھیں تو میں بھی ان کی باتیں سن رہی تھی لیکن کچھ باتیں (قریب ہونے کے باوجود) میری سمجھ میں نہ آتی تھیں۔ وہ کہہ رہی تھیں: ”اے اللہ کے رسول! (میرا خاوند) میری جوانی کھا گیا، میں نے اس کے لیے (بچے جن جن کر) پیٹ خالی کر دیا۔ اب جب کہ میں بوڑھی ہو گئی ہوں اور مجھے اولاد ہونا بند ہو گئی ہے تو اس نے مجھ سے ظہار کر لیا ہے۔ یا اللہ! میں تجھی سے شکایت کرتی ہوں۔“ وہ ابھی وہیں تھیں کہ جبرائیل علیہ السلام یہ آیات لے کر نازل ہو گئے: ﴿قَدْ سَمِعَ اللَّهُ قَوْلَ الَّتِي تُجَادِلُكَ فِي زَوْجِهَا وَتَشْتَكِي إِلَى اللَّهِ﴾ [سورة المجادلة: 1] ”یقینا اللہ نے اس عورت کی بات سن لی جو تجھ سے اپنے شوہر کے بارے میں تکرار کر رہی تھی اور اللہ کے آگے شکایت کر رہی تھی...““ [سنن ابن ماجه/كتاب الطلاق/حدیث: 2063]

حضرت سلمہ بن صخر بیاضی رضی اللہ عنہ سے روایت ہے کہ ظہار کرنے والا جو مرد کفارہ ادا کرنے سے پہلے مباشرت کر لے، اس کے بارے میں نبی صلی اللہ علیہ وسلم نے فرمایا: ”(اس کے ذمے) ایک ہی کفارہ ہے۔“ [سنن ابن ماجه/كتاب الطلاق/حدیث: 2064]

حضرت عبداللہ بن عباس رضی اللہ عنہما سے روایت ہے کہ ایک آدمی نے اپنی بیوی سے ظہار کیا، پھر کفارہ ادا کرنے سے پہلے اس سے ہم بستر ہو گیا، پھر اس نے نبی صلی اللہ علیہ وسلم کی خدمت میں حاضر ہو کر واقعہ عرض کیا تو آپ صلی اللہ علیہ وسلم نے فرمایا: ”تو نے ایسا کیوں کیا؟“ اس نے کہا: ”اللہ کے رسول صلی اللہ علیہ وسلم ! چاندنی میں میری نظر اس کی پازیبوں پر پڑی، پھر مجھے اپنے آپ پر قابو نہ رہا، اور میں اس سے مباشرت کر بیٹھا۔“ رسول اللہ صلی اللہ علیہ وسلم ہنس پڑے اور اسے حکم دیا کہ ”کفارہ ادا کرنے سے پہلے اس کے قریب نہ جائے۔“ [سنن ابن ماجه/كتاب الطلاق/حدیث: 2065]