حضرت ام حصین (بنت اسحاق) رضی اللہ عنہا سے روایت ہے، انہوں نے فرمایا: ”میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرما رہے تھے: ”اگر تم پر ایک ناک کان کٹا حبشی غلام بھی امیر مقرر کیا جائے، تو اس کی بات سنو اور تسلیم کرو جب تک تمہیں اللہ کی کتاب کے مطابق لے کر چلے۔“” [سنن ابن ماجه/كتاب الجهاد/حدیث: 2861]

حضرت عبداللہ بن صامت رضی اللہ عنہ سے روایت ہے کہ حضرت ابوذر رضی اللہ عنہ ربذہ تشریف لائے تو نماز کی اقامت ہو چکی تھی اور ایک غلام نماز کی امامت کرا رہا تھا۔ (اسے) کہا گیا: ”یہ ابوذر رضی اللہ عنہ (آ گئے ہیں۔)“ وہ پیچھے ہٹنے لگا (تاکہ حضرت ابوذر رضی اللہ عنہ نماز پڑھائیں) تو حضرت ابوذر رضی اللہ عنہ نے فرمایا: ”میرے خلیل صلی اللہ علیہ وسلم نے مجھے وصیت کی ہے کہ میں سنوں اور مانوں اگرچہ (حاکم) ناک کٹا حبشی غلام ہی ہو۔“ [سنن ابن ماجه/كتاب الجهاد/حدیث: 2862]

حضرت ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے حضرت علقمہ بن مجزر رضی اللہ عنہ کی قیادت میں ایک لشکر روانہ فرمایا۔ میں بھی اس میں شامل تھا۔ جب وہ (لشکر) غزوے کے مقام پر پہنچا یا ابھی راستے میں تھا کہ فوج کے ایک حصے نے (دشمن پر حملہ کرنے میں پہل کرنے کے لیے آگے جانے کی) اجازت طلب کی۔ علقمہ رضی اللہ عنہ نے ان کو اجازت دے دی اور حضرت عبداللہ بن قیس سہمی رضی اللہ عنہ کو ان کا امیر مقرر کیا۔ میں ان لوگوں میں شامل تھا جنہوں نے (عبداللہ بن حذافہ رضی اللہ عنہ) کے ساتھ مل کر جنگ کی۔ ابھی وہ راستے میں ہی تھے (دشمن سے آمنا سامنا نہیں ہوا تھا) کہ (اس دستے کے) لوگوں نے سردی سے بچاؤ کے لیے یا کسی اور مقصد کے لیے آگ جلائی۔ عبداللہ رضی اللہ عنہ کچھ مزاحیہ طبیعت رکھتے تھے۔ انہوں نے (ساتھیوں سے) کہا: ”کیا میرا حکم سن کر اطاعت کرنا تم پر لازم نہیں؟“ انہوں نے کہا: ”لازم ہے۔“ فرمایا: ”میں تمہیں جو بھی حکم دوں کیا تم مانو گے؟“ انہوں نے کہا: ”ہاں۔“ فرمایا: ”میں تمہیں قطعی حکم دیتا ہوں کہ اس آگ میں چھلانگیں لگا دو۔“ (یہ حکم سن کر) بعض افراد کھڑے ہوئے اور چھلانگیں لگانے کو تیار ہو گئے۔ جب عبداللہ رضی اللہ عنہ نے دیکھا کہ یہ لوگ (آگ میں) کودنے والے ہیں تو فرمایا: ”رک جاؤ، میں تو تم سے مذاق کر رہا تھا۔“ حضرت ابو سعید خدری رضی اللہ عنہ نے فرمایا: جب ہم واپس (مدینہ) آئے تو صحابہ رضی اللہ عنہم نے یہ بات رسول اللہ صلی اللہ علیہ وسلم کے گوش گزار کی۔ رسول اللہ صلی اللہ علیہ وسلم نے فرمایا: ”ان (امیروں) میں سے جو کوئی بھی تمہیں اللہ کی نافرمانی کا حکم دے اس کی اطاعت نہ کرو۔“ [سنن ابن ماجه/كتاب الجهاد/حدیث: 2863]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”مسلمان آدمی پر امیر کی اطاعت فرض ہے، خواہ دل چاہے یا نہ چاہے، سوائے اس کے کہ کسی گناہ کا حکم دیا جائے۔ جب کسی گناہ کا حکم دیا جائے تو نہ سننا ہے اور نہ ماننا ہے۔“ [سنن ابن ماجه/كتاب الجهاد/حدیث: 2864]

حضرت عبداللہ بن مسعود رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”میرے بعد کچھ ایسے لوگ بھی تمہارے معاملات کے نگران (اور تمہارے حکمران) ہوں گے جو سنت کی روشنی بجھائیں گے، بدعت پر عمل پیرا ہوں گے اور نماز کو (افضل) وقت سے دیر کر کے پڑھیں گے۔“ میں نے عرض کیا: ”اللہ کے رسول صلی اللہ علیہ وسلم ! اگر میں انہیں پاؤں تو کیا کروں؟“ آپ صلی اللہ علیہ وسلم نے فرمایا: ”اے ام عبد کے بیٹے! مجھ سے پوچھتے ہو کہ کیا کرو گے؟ جو شخص اللہ کی نافرمانی کرے اس کی کوئی اطاعت نہیں۔“ [سنن ابن ماجه/كتاب الجهاد/حدیث: 2865]

حضرت عبادہ بن صامت رضی اللہ عنہ سے روایت ہے، انہوں نے فرمایا: ”ہم نے رسول اللہ صلی اللہ علیہ وسلم سے بیعت کی کہ ہم (ہر حال میں) سنیں گے اور تعمیل کریں گے، مشکل میں بھی اور آسانی میں بھی، دل کی آمادگی کی حالت میں اور طبعی ناگواری کی حالت میں، اور اس وقت بھی جب ہم پر (دوسروں کو) ترجیح دی جائے، اور حکومت کے معاملات میں ہم اہل حکومت سے کشمکش نہیں کریں گے، اور ہم جہاں بھی ہوں گے سچ کہیں گے، اور اللہ (کی رضامندی کے کام) میں کسی ملامت کرنے والے کی ملامت سے نہیں ڈریں گے۔“ [سنن ابن ماجه/كتاب الجهاد/حدیث: 2866]

حضرت ابو مسلم (عبداللہ بن ثوبان خولانی رحمہ اللہ) سے روایت ہے، انہوں نے کہا: ”مجھے پیارے دیانت دار صحابی حضرت عوف بن مالک اشجعی رضی اللہ عنہ نے حدیث سنائی، وہ مجھے پیارے تھے اور میری نظر میں دیانت دار تھے، انہوں نے فرمایا: ”ہم سات یا آٹھ یا نو افراد نبی صلی اللہ علیہ وسلم کی خدمت میں حاضر تھے، آپ صلی اللہ علیہ وسلم نے فرمایا: ”کیا تم اللہ کے رسول کی بیعت نہیں کرو گے؟“ ہم نے ہاتھ بڑھا دیے، ایک صاحب نے عرض کیا: ”اللہ کے رسول صلی اللہ علیہ وسلم ! ہم آپ کی بیعت کر چکے ہیں، (اب) کس بات پر بیعت کریں؟“ آپ صلی اللہ علیہ وسلم نے فرمایا: ”اس بات پر کہ اللہ کی عبادت کرو گے، اس کے ساتھ کسی کو شریک نہیں کرو گے، پانچوں نمازیں قائم کرو گے اور حکم سن کر مانو گے۔“ پھر آہستہ سے ایک بات فرمائی: ”اور لوگوں سے کچھ نہیں مانگو گے۔““”حضرت ابو مسلم رحمہ اللہ نے فرمایا: ”میں نے ان میں سے ایک صاحب کو دیکھا کہ (سواری پر بیٹھے ہوئے) ان کا کوڑا (ہاتھ سے چھوٹ کر) گر پڑتا تھا تو کسی کو یہ نہیں کہتے تھے کہ یہ کوڑا پکڑا دیں، (خود سواری سے اتر کر اٹھا لیتے تھے)۔“ [سنن ابن ماجه/كتاب الجهاد/حدیث: 2867]

حضرت انس بن مالک رضی اللہ عنہ سے روایت ہے، انہوں نے فرمایا: ”ہم نے «السَّمْعِ وَالطَّاعَةِ» (حکم کو توجہ سے سن کر پوری طرح اطاعت کرنے) پر رسول اللہ صلی اللہ علیہ وسلم سے بیعت کی۔“ رسول اللہ صلی اللہ علیہ وسلم نے فرمایا: ” «فِيمَا اسْتَطَعْتُمْ» ”تم سے جس قدر ممکن ہو۔“” [سنن ابن ماجه/كتاب الجهاد/حدیث: 2868]

حضرت جابر رضی اللہ عنہ سے روایت ہے، انہوں نے فرمایا: ”ایک غلام نے حاضر ہو کر ہجرت کی بیعت کر لی، نبی صلی اللہ علیہ وسلم کو معلوم نہ تھا کہ وہ غلام ہے، (بعد میں) اس کا آقا اسے لینے آ گیا تو نبی صلی اللہ علیہ وسلم نے (فرمایا): ”یہ (غلام) میرے ہاتھ فروخت کر دو۔“ چنانچہ آپ صلی اللہ علیہ وسلم نے دو سیاہ فام غلاموں کے عوض اسے خرید لیا، اس کے بعد آپ صلی اللہ علیہ وسلم یہ پوچھے بغیر کسی سے بیعت نہیں لیتے تھے کہ کیا وہ غلام ہے؟“ [سنن ابن ماجه/كتاب الجهاد/حدیث: 2869]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”تین آدمی ہیں جن سے اللہ تعالیٰ قیامت کے دن کلام نہیں کرے گا، نہ ان کی طرف (نظر رحمت سے) دیکھے گا، نہ انہیں پاک کرے گا اور ان کے لیے دردناک عذاب ہے۔ (ایک) وہ آدمی جو بیابان میں اپنی ضرورت سے زائد پانی پر قابض ہے، مسافر کو نہیں لینے دیتا۔ (دوسرا) وہ آدمی جس نے عصر کے بعد کسی آدمی کو کوئی چیز بیچی (بھاؤ طے کرتے وقت) اللہ کی قسم کھا کر کہ اس نے یہ چیز اتنے کی لی تھی، گاہک نے اسے سچا سمجھ لیا، حالانکہ وہ سچا نہ تھا۔ (تیسرا) وہ آدمی جس نے کسی امام (خلیفہ یا اس کے نائب) کی بیعت صرف دنیا کے (حصول کے) لیے کی۔ اگر اس (امام) نے کچھ مال دے دیا تو وفادار رہا اور اگر کچھ نہ دیا تو اس نے بھی وفا نہ کی۔“ [سنن ابن ماجه/كتاب الجهاد/حدیث: 2870]