حضرت حبیب بن مسلمہ رضی اللہ عنہ سے روایت ہے کہ نبی صلی اللہ علیہ وسلم نے ”خمس کے بعد تہائی حصہ بطور انعام دیا۔“ [سنن ابن ماجه/كتاب الجهاد/حدیث: 2851]

حضرت عبادہ بن صامت رضی اللہ عنہ سے روایت ہے کہ نبی صلی اللہ علیہ وسلم نے ”شروع میں چوتھا حصہ اور واپسی میں تیسرا حصہ بطور انعام دیا۔“ [سنن ابن ماجه/كتاب الجهاد/حدیث: 2852]

حضرت رجاء بن ابوسلمہ بیان کرتے ہیں کہ ہمیں عمرو بن شعیب نے اپنے والد کے واسطے سے حضرت عبداللہ بن عمرو رضی اللہ عنہما سے روایت بیان کی کہ انہوں نے فرمایا: ”رسول اللہ صلی اللہ علیہ وسلم کے بعد کوئی زائد انعام نہیں، قوی مسلمان ضعیف مسلمانوں کو بھی (غنیمت میں سے) حصہ دیں۔“ [سنن ابن ماجه/كتاب الجهاد/حدیث: 2853]

حضرت عبداللہ بن عمر رضی اللہ عنہما سے روایت ہے کہ نبی صلی اللہ علیہ وسلم نے غزوہ خیبر کے موقع پر سوار کو تین حصے عطا فرمائے: ”دو حصے گھوڑے کے، ایک حصہ آدمی کا۔“ [سنن ابن ماجه/كتاب الجهاد/حدیث: 2854]

حضرت آبی اللحم رضی اللہ عنہ (وکیع رحمہ اللہ نے فرمایا کہ ان کا یہ نام اس لیے مشہور ہوا کہ وہ گوشت نہیں کھاتے تھے) کے آزاد کردہ غلام حضرت عمیر رضی اللہ عنہ نے فرمایا: ”غزوہ خیبر کے موقع پر جبکہ میں ایک غلام تھا، میں اپنے آقا کے ساتھ جہاد میں شریک ہوا تو مجھے غنیمت میں سے (آزاد مردوں کی طرح) حصہ نہیں ملا۔ مجھے معمولی سامان میں سے ایک تلوار دی گئی۔ جب میں نے اسے گلے میں لٹکایا تو وہ زمین پر گھسٹتی تھی۔“ [سنن ابن ماجه/كتاب الجهاد/حدیث: 2855]

حضرت ام عطیہ انصاریہ رضی اللہ عنہا سے روایت ہے، انہوں نے فرمایا: ”میں نے رسول اللہ صلی اللہ علیہ وسلم کی معیت میں سات جنگوں میں حصہ لیا۔ (صحابہ رضی اللہ عنہم کے جنگ کے چلے جانے پر) میں خیموں میں رہتی (سامان کی حفاظت کرتی)، ان کے لیے کھانا تیار کرتی، زخمیوں کا علاج کرتی اور بیماروں کی دیکھ بھال کرتی تھی۔“ [سنن ابن ماجه/كتاب الجهاد/حدیث: 2856]

حضرت صفوان بن عسال رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم نے ہمیں لشکر میں (ایک جنگی مہم پر) روانہ کیا تو (الوداع کہتے وقت) آپ صلی اللہ علیہ وسلم نے فرمایا: ” «بِسْمِ اللّٰهِ» ”اللہ کے نام سے“، اللہ کی راہ میں چلو، اللہ کے ساتھ کفر کرنے والوں سے جنگ کرو اور مثلہ نہ کرنا، عہد شکنی نہ کرنا، مالِ غنیمت میں خیانت نہ کرنا اور کسی بچے کو قتل نہ کرنا۔““ [سنن ابن ماجه/كتاب الجهاد/حدیث: 2857]

حضرت سلیمان بن بریدہ رحمہ اللہ اپنے والد (حضرت بریدہ بن حصیب اسلمی رضی اللہ عنہ) سے روایت کرتے ہیں، انہوں نے کہا کہ رسول اللہ صلی اللہ علیہ وسلم جب کسی شخص کو لشکر کا امیر مقرر فرماتے تو اسے خود اپنی ذات کے بارے میں اللہ سے ڈرنے کی نصیحت فرماتے اور ساتھ مسلمانوں کے ساتھ اچھا سلوک کرنے کی نصیحت کرتے۔ رسول اللہ صلی اللہ علیہ وسلم (مجاہدین کو نصیحت کرتے ہوئے) فرماتے تھے: ”اللہ کے نام سے اللہ کی راہ میں جہاد کرو۔ اللہ کے ساتھ کفر کرنے والوں کے ساتھ جنگ کرو۔ جہاد کرو اور (جہاد کے دوران میں) عہد شکنی نہ کرنا، خیانت نہ کرنا۔“ (اور امیرِ لشکر کو نصیحت فرماتے:) ”جب تیرے مشرک دشمنوں سے تیرا سامنا ہو تو انہیں تین باتوں کی دعوت دے۔ وہ ان میں سے جو بات مان لیں، اسے قبول کر کے ان سے ہاتھ روک لے (اور جنگ نہ کر)۔ انہیں اسلام کی دعوت دے۔ اگر وہ یہ بات مان لیں (اور مسلمان ہو جائیں) تو ان کا یہ عمل قبول کر لے (انہیں مسلمان تسلیم کر لے) اور ان سے ہاتھ روک لے، پھر انہیں دعوت دے کہ اپنے علاقے (دار الکفر) سے ہجرت کر کے مہاجرین کے علاقے (دار السلام) میں آ جائیں اور انہیں بتا کہ اگر وہ ہجرت کریں گے تو انہیں مہاجرین والے حقوق حاصل ہوں گے اور ان پر مہاجرین والے فرائض عائد ہوں گے۔ اگر وہ (ہجرت سے) انکار کریں تو انہیں بتا دینا کہ انہیں اعرابی (خانہ بدوش) مسلمانوں والے حقوق حاصل ہوں گے۔ ان پر اللہ کا وہ قانون نافذ ہوگا جو (عام) مومنین پر نافذ ہے۔ اور انہیں مالِ فے اور مالِ غنیمت میں حصہ نہیں ملے گا سوائے اس صورت کے کہ وہ مسلمانوں کے ساتھ مل کر جنگ کریں۔ (لیکن) اگر وہ لوگ اسلام میں داخل ہونے سے انکار کر دیں تو ان سے جزیہ کی ادائیگی کا مطالبہ کر، اگر وہ (یہ مطالبہ) تسلیم کر لیں تو ان سے (جزیہ) منظور کر کے ہاتھ روک لے۔ اگر وہ (جزیہ دینے سے بھی) انکار کریں تو ان کے خلاف اللہ سے مدد کی دعا کر اور ان سے جنگ کر۔ اگر کسی قلعے کا محاصرہ کرے اور وہ تجھ سے مطالبہ کریں کہ تو ان کے لیے اللہ کا اور اپنے نبی کا ذمہ دے (اللہ اور اس کے رسول کی ذمہ داری پر امن دے) تو انہیں اللہ کا ذمہ نہ دینا اور اپنے نبی کا ذمہ نہ دینا بلکہ اپنا اور اپنے باپ کا اور اپنے ساتھیوں کا ذمہ دینا، کیونکہ اگر تم اپنا اور اپنے باپوں کا وعدہ دو گے تو وہ اللہ اور اس کے رسول کا ذمہ توڑنے سے ہلکا گناہ ہوگا۔ اگر تو قلعے کا محاصرہ کرے اور وہ اللہ کا فیصلہ قبول کرتے ہوئے (قلعے سے) دست بردار ہونے پر رضامندی کا اظہار کریں تو انہیں اللہ کے فیصلے پر دست بردار ہونے کو مت کہہ بلکہ انہیں اپنا فیصلہ قبول کرنے (کا مطالبہ کرتے ہوئے اسی شرط) پر دست بردار ہونے کا کہہ، کیونکہ تجھے نہیں معلوم کہ تو اللہ کے فیصلے کے مطابق (فیصلہ) کر سکے گا یا نہیں۔“ حدیث کے راوی حضرت علقمہ بن مرثد رحمہ اللہ کہتے ہیں کہ میں نے یہ حدیث مقاتل بن حیان رحمہ اللہ کو بیان کی تو انہوں نے کہا: ”مجھے مسلم بن ہیضم رحمہ اللہ نے حضرت نعمان بن مقرن رضی اللہ عنہ کے واسطے سے نبی صلی اللہ علیہ وسلم سے اسی طرح حدیث بیان کی ہے۔“ [سنن ابن ماجه/كتاب الجهاد/حدیث: 2858]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے میری اطاعت کی اس نے اللہ کی اطاعت کی، اور جس نے میری نافرمانی کی اس نے اللہ کی نافرمانی کی۔ جس نے امام کی اطاعت کی اس نے میری اطاعت کی، اور جس نے امام کی نافرمانی کی اس نے میری نافرمانی کی۔“ [سنن ابن ماجه/كتاب الجهاد/حدیث: 2859]

حضرت انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”سنو اور اطاعت کرو، اگرچہ تم پر ایک حبشی غلام کو حاکم بنا دیا جائے جس کا سر منقے جیسا ہو۔“ [سنن ابن ماجه/كتاب الجهاد/حدیث: 2860]