حضرت عبداللہ بن عمر رضی اللہ عنہما سے روایت ہے کہ ”رسول اللہ صلی اللہ علیہ وسلم نے کعبہ کے گرد سات چکر لگائے، پھر دو رکعتیں پڑھیں۔“ (امام) وکیع نے فرمایا: ”مقام ابراہیم کے پاس۔“ پھر ”(مسجد سے) نکل کر صفا کی طرف تشریف لے گئے۔“ [سنن ابن ماجه/كتاب المناسك/حدیث: 2959]

حضرت جابر رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم جب بیت اللہ کے طواف سے فارغ ہوئے تو مقام ابراہیم پر تشریف لے گئے۔ حضرت عمر رضی اللہ عنہ نے عرض کیا: ”اللہ کے رسول! یہ ہمارے جد امجد حضرت ابراہیم علیہ السلام کا مقام ہے جس کے بارے میں اللہ سبحانہ وتعالیٰ نے فرمایا: ﴿وَاتَّخِذُوا مِنْ مَقَامِ إِبْرَاهِيمَ﴾ [سورة البقرة: 125] ”ابراہیم کے کھڑے ہونے کی جگہ کو نماز کی جگہ بناؤ۔“““ ولید بن مسلم رحمہ اللہ بیان کرتے ہیں: ”میں نے امام مالک رحمہ اللہ سے دریافت کیا: ”کیا (آپ کے استاد جعفر بن محمد رحمہ اللہ نے) یہ آیت اسی طرح پڑھی تھی ﴿وَاتَّخِذُوا مِنْ مَقَامِ إِبْرَاهِيمَ﴾ [سورة البقرة: 125] ؟“ انہوں نے فرمایا: ”ہاں۔““ [سنن ابن ماجه/كتاب المناسك/حدیث: 2960]

ام المؤمنین حضرت ام سلمہ رضی اللہ عنہا سے روایت ہے کہ وہ بیمار ہو گئیں تو رسول اللہ صلی اللہ علیہ وسلم نے حکم دیا کہ وہ سوار ہو کر لوگوں کے پیچھے سے طواف کر لیں۔ انھوں نے فرمایا: ”میں نے دیکھا کہ رسول اللہ صلی اللہ علیہ وسلم کعبہ کی طرف منہ کر کے نماز ادا کر رہے تھے اور یہ آیات تلاوت فرما رہے تھے: ﴿وَالطُّورِ * وَكِتَابٍ مَسْطُورٍ﴾ [سورة الطور: 1-2] ”قسم ہے طور کی اور لکھی ہوئی کتاب کی۔“”امام ابن ماجہ رحمہ اللہ نے فرمایا: ”یہ ابوبکر بن شیبہ کی حدیث ہے۔“ [سنن ابن ماجه/كتاب المناسك/حدیث: 2961]

حضرت عمرو بن شعیب اپنے والد (حضرت شعیب بن محمد) سے روایت کرتے ہیں کہ انہوں نے اپنے دادا (حضرت عبداللہ بن عمرو رضی اللہ عنہ) کے بارے میں بیان کرتے ہوئے فرمایا: ”میں نے اپنے دادا حضرت عبداللہ بن عمرو رضی اللہ عنہ کے ساتھ طواف کیا۔ جب ہم سات چکروں سے فارغ ہوئے تو ہم نے کعبہ کے پیچھے نماز ادا کی۔ میں نے کہا: کیا آپ آگ سے اللہ کی پناہ نہیں مانگتے؟ انہوں نے کہا: «أَعُوذُ بِاللَّهِ مِنَ النَّارِ» ”میں (جہنم کی) آگ سے اللہ کی پناہ مانگتا ہوں۔“ پھر وہ (حضرت عبداللہ رضی اللہ عنہ) چلے اور حجرِ اسود کو بوسہ دیا۔ پھر حجرِ اسود اور (کعبہ کے) دروازے کے درمیان کھڑے ہو کر اپنا سینہ، اپنے ہاتھ اور رخسار کعبہ سے لگا دیا۔ پھر فرمایا: ”میں نے رسول اللہ صلی اللہ علیہ وسلم کو اسی طرح کرتے دیکھا ہے۔““ [سنن ابن ماجه/كتاب المناسك/حدیث: 2962]

حضرت عائشہ رضی اللہ عنہا سے روایت ہے، انہوں نے فرمایا: ”ہم رسول اللہ صلی اللہ علیہ وسلم کے ساتھ روانہ ہوئے تو ہمارا ارادہ صرف حج کا تھا۔ جب ہم سرف (مقام) پر یا سرف کے قریب پہنچے تو مجھے حیض آگیا۔ رسول اللہ صلی اللہ علیہ وسلم میرے پاس تشریف لائے تو میں رو رہی تھی۔ آپ صلی اللہ علیہ وسلم نے فرمایا: ”تجھے کیا ہوا؟ کیا حیض آ گیا؟“ میں نے کہا: جی ہاں۔ آپ صلی اللہ علیہ وسلم نے فرمایا: ”یہ تو ایسی چیز ہے جو اللہ تعالیٰ نے آدم علیہ السلام کی بیٹیوں پر لکھی ہے، تو حج کے سارے اعمال ادا کر مگر بیت اللہ کا طواف نہیں کرنا۔““ ام المومنین رضی اللہ عنہا نے فرمایا: ”رسول اللہ صلی اللہ علیہ وسلم نے اپنی بیویوں کی طرف سے گائے ذبح کی۔“ [سنن ابن ماجه/كتاب المناسك/حدیث: 2963]

حضرت عائشہ رضی اللہ عنہا سے روایت ہے کہ ”اللہ کے رسول صلی اللہ علیہ وسلم نے حجِ مفرد ادا کیا۔“ [سنن ابن ماجه/كتاب المناسك/حدیث: 2964]

ام المؤمنین حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ”حج مفرد ادا کیا۔“ [سنن ابن ماجه/كتاب المناسك/حدیث: 2965]

حضرت جابر رضی اللہ عنہ سے روایت ہے کہ ”رسول اللہ صلی اللہ علیہ وسلم نے حج مفرد ادا کیا۔“ [سنن ابن ماجه/كتاب المناسك/حدیث: 2966]

حضرت جابر رضی اللہ عنہ سے روایت ہے کہ ”رسول اللہ صلی اللہ علیہ وسلم ، حضرت ابوبکر، حضرت عمر اور حضرت عثمان رضی اللہ عنہم نے حج مفرد ادا کیا۔“ [سنن ابن ماجه/كتاب المناسك/حدیث: 2967]

حضرت انس بن مالک رضی اللہ عنہ سے روایت ہے، انہوں نے فرمایا: ”ہم لوگ رسول اللہ صلی اللہ علیہ وسلم کے ساتھ مکہ کی طرف روانہ ہوئے۔ میں نے رسول اللہ صلی اللہ علیہ وسلم کو فرماتے سنا: «لَبَّيْكَ عُمْرَةً وَحِجَّةً» ”عمرہ اور حج کے لیے حاضر ہوں“۔“ [سنن ابن ماجه/كتاب المناسك/حدیث: 2968]