حضرت عبد اللہ بن عمر رضی اللہ عنہما سے روایت ہے، انہوں نے فرمایا: ”رسول اللہ صلی اللہ علیہ وسلم نے احرام باندھنے والے کو «وَرْس» یا «زَعْفَرَان» سے رنگا ہوا کپڑا پہننے سے منع فرمایا۔“ [سنن ابن ماجه/كتاب المناسك/حدیث: 2930]

حضرت عبداللہ بن عباس رضی اللہ عنہما سے روایت ہے، انہوں نے فرمایا: ”میں نے نبی صلی اللہ علیہ وسلم کو منبر پر خطبہ دیتے سنا، آپ صلی اللہ علیہ وسلم نے فرمایا: ”جسے تہبند نہ ملے، وہ پاجامہ (یا شلوار) پہن لے۔ اور جسے جوتے نہ ملیں، وہ موزے پہن لے۔“”ہشام کی روایت میں یہ الفاظ بھی ہیں: ”کپڑا نہ ہونے کی صورت میں پاجامہ بھی پہن سکتا ہے۔“” [سنن ابن ماجه/كتاب المناسك/حدیث: 2931]

حضرت عبداللہ بن عمر رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”جسے جوتے میسر نہ ہوں، وہ موزے پہن لے اور انہیں ٹخنوں کے نیچے سے کاٹ لے (تاکہ جوتوں کی طرح بن جائیں)۔“ [سنن ابن ماجه/كتاب المناسك/حدیث: 2932]

سیدتنا اسماء بنت ابی بکر رضی اللہ عنہا سے روایت ہے، انہوں نے فرمایا: ”ہم لوگ رسول اللہ صلی اللہ علیہ وسلم کے ساتھ روانہ ہوئے حتیٰ کہ جب ہم لوگ مقامِ عرج پر پہنچے تو (آرام کرنے کے لیے) ٹھہرے، رسول اللہ صلی اللہ علیہ وسلم بیٹھے ہوئے تھے۔ سیدتنا عائشہ رضی اللہ عنہا نبی صلی اللہ علیہ وسلم کے پاس بیٹھی تھیں۔ میں حضرت ابوبکر صدیق رضی اللہ عنہ کے پاس بیٹھی تھی۔ ہمارا اور حضرت ابوبکر صدیق رضی اللہ عنہ کا (سامانِ سفر والا) اونٹ ایک ہی تھا جو حضرت ابوبکر صدیق رضی اللہ عنہ کے غلام کے پاس تھا۔ وہ غلام آیا تو اس کے پاس (اونٹ) نہ تھا۔ حضرت ابوبکر صدیق رضی اللہ عنہ نے فرمایا: ”تیرا اونٹ کہاں ہے؟“ اس نے کہا: ”رات کو گم ہو گیا۔“ انہوں نے فرمایا: ”صرف ایک اونٹ اور وہ بھی تو نے گم کر دیا؟“ اور اسے مارنے لگے۔ رسول اللہ صلی اللہ علیہ وسلم نے فرمایا: ”اس محرم کو دیکھیں، کیا کر رہے ہیں؟““ [سنن ابن ماجه/كتاب المناسك/حدیث: 2933]

حضرت عبداللہ بن حنین رضی اللہ عنہ سے روایت ہے کہ مقامِ ابواء پر حضرت عبداللہ بن عباس رضی اللہ عنہ اور حضرت مسور بن مخرمہ رضی اللہ عنہ کے درمیان (ایک مسئلہ میں) اختلاف ہو گیا۔ حضرت عبداللہ بن عباس رضی اللہ عنہ کہتے تھے کہ ”محرم سر دھو سکتا ہے“ جبکہ حضرت مسور رضی اللہ عنہ کہتے تھے کہ ”محرم سر نہیں دھو سکتا۔“ (حضرت عبداللہ بن حنین رضی اللہ عنہ نے کہا) حضرت عبداللہ بن عباس رضی اللہ عنہ نے مجھے یہ مسئلہ معلوم کرنے کے لیے حضرت ابوایوب انصاری رضی اللہ عنہ کے پاس بھیجا۔ میں نے انہیں کنویں کی دو لکڑیوں کے پاس غسل کرتے پایا۔ انہوں نے ایک کپڑے سے پردہ کر رکھا تھا۔ میں نے سلام کیا تو انہوں نے فرمایا: ”کون ہے؟“ میں نے کہا: ”میں عبداللہ بن حنین ہوں۔ مجھے عبداللہ بن عباس رضی اللہ عنہ نے آپ کی خدمت میں یہ پوچھنے کے لیے بھیجا ہے کہ رسول اللہ صلی اللہ علیہ وسلم احرام کی حالت میں اپنا سر کس طرح دھوتے تھے؟“ حضرت ابوایوب رضی اللہ عنہ نے ہاتھ رکھ کر اسے اتنا نیچے کر دیا کہ مجھے ان کا سر نظر آنے لگا، پھر اس شخص کو جو (نہانے میں مدد دیتے ہوئے) آپ پر پانی ڈال رہا تھا، فرمایا: ”پانی ڈالو۔“ اس نے آپ رضی اللہ عنہ کے سر پر پانی ڈالا تو آپ رضی اللہ عنہ نے دونوں ہاتھوں سے اپنے سر (کے بالوں) کو حرکت دی۔ آپ اپنے ہاتھوں کو آگے کی طرف بھی لائے اور پیچھے بھی لے گئے۔ پھر فرمایا: ”میں نے آپ صلی اللہ علیہ وسلم کو اس طرح کرتے دیکھا ہے۔“ [سنن ابن ماجه/كتاب المناسك/حدیث: 2934]

حضرت عائشہ رضی اللہ عنہا سے روایت ہے، انہوں نے فرمایا: ”ہم لوگ نبی صلی اللہ علیہ وسلم کے ساتھ تھے اور ہم نے احرام باندھا ہوا تھا۔ جب ہمیں کوئی سوار نظر آتا تو ہم اپنے سروں سے کپڑے (چہرے پر) لٹکا لیتیں، اور جب وہ گزر جاتا، کپڑا اٹھا لیتیں۔“ [سنن ابن ماجه/كتاب المناسك/حدیث: 2935]

حضرت ابوبکر رحمہ اللہ بن عبداللہ بن زبیر رضی اللہ عنہ اپنی دادی حضرت اسماء بنت ابی بکر رضی اللہ عنہا یا اپنی نانی حضرت سعدی بنت عوف رضی اللہ عنہا سے روایت کرتے ہیں کہ رسول اللہ صلی اللہ علیہ وسلم حضرت ضباعہ بنت عبدالمطلب رضی اللہ عنہا کے ہاں تشریف لے گئے اور فرمایا: ”پھوپھی جان! آپ کو حج کرنے میں کیا رکاوٹ درپیش ہے؟“ انہوں نے کہا: ”میں بیمار عورت ہوں اور راستے میں رک جانے (اور سفر جاری نہ رکھ سکنے) سے ڈرتی ہوں۔“ آپ صلی اللہ علیہ وسلم نے فرمایا: ”احرام باندھ لیجیے اور شرط لگا لیجیے کہ آپ وہیں احرام کھول دیں گی جہاں آپ کو رکاوٹ پیش آجائے گی۔“ [سنن ابن ماجه/كتاب المناسك/حدیث: 2936]

حضرت ضباعہ رضی اللہ عنہا سے روایت ہے، انہوں نے فرمایا: رسول اللہ صلی اللہ علیہ وسلم میرے پاس تشریف لائے جبکہ میں بیمار تھی۔ آپ صلی اللہ علیہ وسلم نے فرمایا: ”کیا اس سال تمہارا حج کرنے کا ارادہ نہیں ہے؟“ میں نے کہا: اے اللہ کے رسول صلی اللہ علیہ وسلم ! میں بیمار ہوں۔ آپ صلی اللہ علیہ وسلم نے فرمایا: ”حج کرو اور کہہ دو: «اللّٰهُمَّ مَحِلِّي حَيْثُ حَبَسْتَنِي» ”(اے اللہ) میں وہاں احرام کھول دوں گی جہاں تو مجھے روک دے۔““ [سنن ابن ماجه/كتاب المناسك/حدیث: 2937]

حضرت عبداللہ بن عباس رضی اللہ عنہ سے روایت ہے، انہوں نے فرمایا: حضرت ضباعہ بنت زبیر بن عبد المطلب رضی اللہ عنہا نے رسول اللہ صلی اللہ علیہ وسلم کی خدمت میں حاضر ہو کر عرض کیا: ”میں بھاری جسم کی (یا بیمار) عورت ہوں اور میں حج کا ارادہ رکھتی ہوں، میں کیسے احرام باندھوں؟“ رسول اللہ صلی اللہ علیہ وسلم نے فرمایا: ”احرام باندھ لو اور شرط لگا لو کہ میں وہیں احرام کھول دوں گی جہاں (اے اللہ) تو مجھے روک لے۔“ [سنن ابن ماجه/كتاب المناسك/حدیث: 2938]