حضرت بریدہ رضی اللہ عنہ سے روایت ہے، انہوں نے فرمایا کہ نبی صلی اللہ علیہ وسلم نے ایک آدمی کو یوں کہتے سنا: «اللَّهُمَّ إِنِّي أَسْأَلُكَ بِأَنَّكَ أَنْتَ اللَّهُ الْأَحَدُ الصَّمَدُ الَّذِي لَمْ يَلِدْ وَلَمْ يُولَدْ وَلَمْ يَكُنْ لَهُ كُفُوًا أَحَدٌ» ”اے اللہ! میں تجھ سے سوال کرتا ہوں، اس لیے کہ تو اللہ ہے، اکیلا ہے، بے نیاز ہے جس نے کسی کو جنم نہیں دیا ہے، اور نہ ہی اسے کسی نے جنم دیا، نہ اس کا کوئی ہمسر ہے۔“ تو رسول اللہ صلی اللہ علیہ وسلم نے فرمایا: ”اس شخص نے اللہ سے اس کے عظیم ترین نام (اسم اعظم) کے وسیلے سے سوال کیا ہے جس کے وسیلے سے جب اس سے مانگا جائے تو وہ عطا فرماتا ہے اور جب اس کے وسیلے سے اس سے دعا کی جائے تو وہ قبول فرماتا ہے۔“ [سنن ابن ماجه/كتاب الدعاء/حدیث: 3857]

حضرت انس بن مالک رضی اللہ عنہ سے روایت ہے، انہوں نے فرمایا: نبی صلی اللہ علیہ وسلم نے ایک آدمی کو سنا، وہ کہہ رہا تھا: «اللَّهُمَّ إِنِّي أَسْأَلُكَ بِأَنَّ لَكَ الْحَمْدَ، لَا إِلَهَ إِلَّا أَنْتَ وَحْدَكَ لَا شَرِيكَ لَكَ، الْمَنَّانُ، بَدِيعُ السَّمَاوَاتِ وَالْأَرْضِ، ذَا الْجَلَالِ وَالْإِكْرَامِ» ”اے اللہ! میں تجھ سے اس وسیلے سے سوال کرتا ہوں کہ تعریف صرف تیرے لیے ہے۔ تجھے اکیلے کے سوا کوئی معبود نہیں۔ تیرا کوئی شریک نہیں۔ تو احسان کرنے والا ہے۔ آسمانوں اور زمین کو بغیر مثال کے پیدا کرنے والا ہے۔ جلال و عزت والا ہے۔“ تو رسول اللہ صلی اللہ علیہ وسلم نے فرمایا: ”اس نے اللہ سے اس کے عظیم ترین نام (اسم اعظم) کے واسطے سے سوال کیا ہے، جس کے وسیلے سے مانگا جائے تو وہ عطا فرماتا ہے اور جب اس کے وسیلے سے دعا کی جائے تو وہ قبول فرماتا ہے۔“ [سنن ابن ماجه/كتاب الدعاء/حدیث: 3858]

ام المؤمنین حضرت عائشہ رضی اللہ عنہا سے روایت ہے، انہوں نے کہا: میں نے رسول اللہ صلی اللہ علیہ وسلم کو سنا، آپ صلی اللہ علیہ وسلم فرما رہے تھے: «اللّٰهُمَّ إِنِّي أَسْأَلُكَ بِاسْمِكَ الطَّاهِرِ الطَّيِّبِ الْمُبَارَكِ الْأَحَبِّ إِلَيْكَ الَّذِي إِذَا دُعِيتَ بِهِ أَجَبْتَ وَإِذَا سُئِلْتَ بِهِ أَعْطَيْتَ وَإِذَا اسْتُرْحِمْتَ بِهِ رَحِمْتَ وَإِذَا اسْتُفْرِجْتَ بِهِ فَرَّجْتَ» ”یا اللہ! میں تجھ سے تیرے اس طاہر، طیب، برکت والے اور تجھے سب سے پیارے نام کے واسطے سے سوال کرتا ہوں جس کے وسیلے سے جب تجھ سے دعا کی جائے تو قبول فرماتا ہے، اور جب تجھ سے اس کے وسیلے سے کچھ مانگا جائے تو عطا فرماتا ہے، اور جب تجھ سے اس کے واسطے سے رحمت طلب کی جائے تو تو رحمت فرماتا ہے، اور جب تجھ سے اس کے واسطے سے پریشانی دور کرنے کی درخواست کی جائے تو تو پریشانی دور کرتا (اور مشکل کشائی فرماتا) ہے۔“ (بعد میں) ایک دن رسول اللہ صلی اللہ علیہ وسلم نے فرمایا: ”اے عائشہ! تجھے پتہ ہے اللہ تعالیٰ نے مجھے وہ نام بتا دیا ہے جس کے واسطے سے جب اسے پکارا جائے تو وہ قبول فرماتا ہے؟“ میں نے عرض کیا: ”اے اللہ کے رسول صلی اللہ علیہ وسلم ! میرے ماں باپ آپ پر قربان! مجھے بھی سکھا دیجیے۔“ آپ صلی اللہ علیہ وسلم نے فرمایا: ”اے عائشہ! وہ تیرے لیے مناسب نہیں۔“ انہوں نے کہا: میں کچھ دیر ایک طرف بیٹھی رہی، پھر میں اٹھی اور رسول اللہ صلی اللہ علیہ وسلم کے سر مبارک کو بوسہ دے کر عرض کیا: ”اللہ کے رسول صلی اللہ علیہ وسلم ! مجھے سکھا دیجیے۔“ آپ صلی اللہ علیہ وسلم نے فرمایا: ”اے عائشہ! یہ بات تمہارے لیے مناسب نہیں کہ میں تمہیں وہ سکھاؤں۔ تمہارے لیے مناسب نہیں کہ اس کے وسیلے سے دنیا کی کوئی چیز مانگو۔“ ام المؤمنین رضی اللہ عنہا نے کہا: میں نے اٹھ کر وضو کیا، پھر دو رکعت نماز پڑھی، پھر میں نے کہا: «اللّٰهُمَّ إِنِّي أَدْعُوكَ اللّٰهَ وَأَدْعُوكَ الرَّحْمٰنَ وَأَدْعُوكَ الْبَرَّ الرَّحِيمَ وَأَدْعُوكَ بِأَسْمَائِكَ الْحُسْنٰى كُلِّهَا مَا عَلِمْتُ مِنْهَا وَمَا لَمْ أَعْلَمْ أَنْ تَغْفِرَ لِي وَتَرْحَمَنِي» ”یا اللہ! میں تجھے اللہ کہتی ہوں، میں تجھے رحمان کے نام سے پکارتی ہوں، میں تجھے برٌ رحیم پکارتی ہوں، میں تجھے تیرے تمام بہترین ناموں کا واسطہ دیتی ہوں جو نام مجھے معلوم ہیں اور جو معلوم نہیں (ان سب ناموں کا واسطہ دے کر دعا کرتی ہوں) کہ میری مغفرت فرما دے اور مجھ پر رحمت فرما دے۔“ حضرت عائشہ رضی اللہ عنہا کہتی ہیں: پھر رسول اللہ صلی اللہ علیہ وسلم خوب ہنسے اور فرمایا: ”وہ انہیں ناموں میں ہے جن کے وسیلے سے تو نے دعا کی ہے۔“ [سنن ابن ماجه/كتاب الدعاء/حدیث: 3859]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اللہ کے ننانوے، یعنی ایک کم سو نام ہیں، جو انہیں شمار کرے گا، جنت میں داخل ہو جائے گا۔“ [سنن ابن ماجه/كتاب الدعاء/حدیث: 3860]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اللہ تعالیٰ کے ننانوے یعنی ایک کم سو نام ہیں، وہ اکیلا ہے، طاق عدد کو پسند کرتا ہے۔ جو شخص انہیں یاد کرے گا وہ جنت میں داخل ہوگا۔ وہ یہ ہیں: «اَللّٰهُ» ”معبود“، «اَلْوَاحِدُ» ”ایک“، «اَلصَّمَدُ» ”بے نیاز“، «اَلْاَوَّلُ» ”سب سے پہلے موجود“، «اَلْاٰخِرُ» ”سب کے بعد رہنے والا“، «اَلظَّاهِرُ» ”اپنی قدرتوں کے لحاظ سے ظاہر“، «اَلْبَاطِنُ» ”اپنی حقیقت کے لحاظ سے پوشیدہ“، «اَلْخَالِقُ» ”پیدا کرنے والا“، «اَلْبَارِئُ» ”بنانے والا“، «اَلْمُصَوِّرُ» ”صورتیں بنانے والا“، «اَلْمَالِكُ» ”بادشاہ“، «اَلْحَقُّ» ”سچا“، «اَلسَّلَامُ» ”سلامتی والا“، «اَلْمُؤْمِنُ» ”امن دینے والا“، «اَلْمُهَيْمِنُ» ”نگہبان“، «اَلْعَزِيزُ» ”غالب“، «اَلْجَبَّارُ» ”زبردست یا کمی پورا کرنے والا“، «اَلْمُتَكَبِّرُ» ”اپنی عظمت کا اظہار کرنے والا“، «اَلرَّحْمٰنُ» ”انتہائی رحم کرنے والا“، «اَلرَّحِيمُ» ”ہمیشہ رحم کرنے والا“، «اَللَّطِيفُ» ”باریک بین“، «اَلْخَبِيرُ» ”ہمیشہ باخبر“، «اَلسَّمِيعُ» ”خوب سننے والا“، «اَلْبَصِيرُ» ”خوب دیکھنے والا“، «اَلْعَلِيمُ» ”خوب جاننے والا“، «اَلْعَظِيمُ» ”خوب عظمت والا“، «اَلْبَارُّ» ”احسان کرنے والا“، «اَلْمُتَعَالُ» ”بلند“، «اَلْجَلِيلُ» ”جاہ و جلال والا“، «اَلْجَمِيلُ» ”صاحب جمال“، «اَلْحَيُّ» ”زندہ“، «اَلْقَيُّومُ» ”قائم رہنے والا اور قائم رکھنے والا“، «اَلْقَادِرُ» ”سب کچھ کر سکنے والا“، «اَلْقَاهِرُ» ”غالب“، «اَلْعَلِيُّ» ”بہت بلند“، «اَلحَكِيمُ» ”خوب حکمتوں والا“، «اَلْقَرِيبُ» ”علم و قدرت کے اعتبار سے مخلوق سے انتہائی قریب“، «اَلْمُجِيبُ» ”قبول کرنے والا“، «اَلغَنِيُّ» ”بے پروا جو کسی کا محتاج نہیں“، «اَلْوَهَّابُ» ”بہت کچھ دینے والا“، «اَلْوَدُودُ» ”بہت زیادہ محبت رکھنے والا محبوب“، «اَلشَّكُورُ» ”نہایت قدردان“، «اَلْمَاجِدُ» ”بزرگی والا“، «اَلْوَاجِدُ» ”ایسا غنی جو کبھی مفلس و محتاج نہ ہو“، «اَلْوَالِي» ”مالک و مختار“، «اَلرَّاشِدُ» ”ہدایت دینے والا“، «اَلْعَفُوُّ» ”بہت زیادہ معاف کرنے والا“، «اَلْغَفُورُ» ”بہت گناہ بخشنے والا“، «اَلْحَلِيمُ» ”ہمیشہ درگزر کرنے والا“، «اَلْكَرِيمُ» ”بے انتہا سخی، ہر قسم کی صفاتِ کمال سے متصف“، «اَلتَّوَّابُ» ”بہت زیادہ توبہ قبول کرنے والا“، «اَلرَّبُّ» ”مالک، پالنے والا“، «اَلْوَلِيُّ» ”مددگار“، «اَلشَّهِيدُ» ”گواہی دینے والا، ناظر“، «اَلْمُبِينُ» ”واضح کرنے والا“، «اَلْبُرْهَانُ» ”دلیل“، «اَلرَّؤُوفُ» ”بہت شفقت کرنے والا“، «اَلرَّحِيمُ» ”ہمیشہ رحم کرنے والا“، «اَلْمُبْدِئُ» ”پہلی بار پیدا کرنے والا“، «اَلْمُعِيدُ» ”دوبارہ پیدا کرنے والا“، «اَلْبَاعِثُ» ”قبروں سے اٹھانے والا“، «اَلْوَارِثُ» ”وارث (باقی رہنے والا)“، «اَلْقَوِيُّ» ”بہت زیادہ قوت والا“، «اَلشَّدِيدُ» ”سختی کرنے والا“، «اَلضَّارُّ» ”نقصان کا اختیار رکھنے والا“، «اَلنَّافِعُ» ”نفع پہنچانے والا“، «اَلْبَاقِي» ”ہمیشہ باقی رہنے والا“، «اَلْوَاقِي» ”بچانے والا، محفوظ رکھنے والا“، «اَلْخَافِضُ» ”پست کرنے والا“، «اَلرَّافِعُ» ”بلند کرنے والا“، «اَلْقَابِضُ» ”تنگی کرنے والا“، «اَلْبَاسِطُ» ”فراخی کرنے والا“، «اَلْمُعِزُّ» ”عزت دینے والا“، «اَلْمُذِلُّ» ”ذلت دینے والا“، «اَلْمُقْسِطُ» ”انصاف کرنے والا“، «اَلرَّزَّاقُ» ”رزق دینے والا“، «ذُو الْقُوَّةِ» ”قوت والا“، «اَلْمَتِينُ» ”نہایت مضبوط“، «اَلْقَائِمُ» ”ہمیشہ رہنے والا“، «اَلدَّائِمُ» ”ہمیشگی والا“، «اَلحَافِظُ» ”حفاظت کرنے والا“، «اَلْوَكِيلُ» ”کارساز“، «اَلْفَاطِرُ» ”پیدا کرنے والا“، «اَلسَّامِعُ» ”سننے والا“، «اَلْمُعْطِي» ”دینے والا“، «اَلْمُحْيِي» ”زندگی بخشنے والا“، «اَلْمُقِيتُ» ”موت دینے والا“، «اَلْمَانِعُ» ”روکنے والا“، «اَلْجَامِعُ» ”جمع کرنے والا“، «اَلْهَادِي» ”ہدایت دینے والا، رہنمائی کرنے والا“، «اَلْكَافِي» ”کفایت کرنے والا“، «اَلْاَبَدُ» ”ہمیشگی والا“، «اَلْعَالِمُ» ”جاننے والا“، «اَلصَّادِقُ» ”سچا“، «اَلنُّورُ» ”روشن“، «اَلْمُنِيرُ» ”روشنی کرنے والا“، «اَلتَّامُّ» ”مکمل“، «اَلْقَدِيمُ» ”قدیم“، «اَلْوِتْرُ» ”ایک“، «اَلْاَحَدُ» ”اکیلا“، «اَلصَّمَدُ» ”بے نیاز“، ﴿لَمْ يَلِدْ وَلَمْ يُولَدْ ٭ وَلَمْ يَكُنْ لَهُ كُفُوًا أَحَدٌ﴾ [سورة الإخلاص: 3-4] ”جس نے نہ کسی کو جنم دیا نہ اسے کسی نے جنم دیا نہ اس کا کوئی ہمسر ہے۔“ «لَا إِلَهَ إِلَّا اللَّهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ، بِيَدِهِ الْخَيْرُ، وَهُوَ عَلَى كُلِّ شَيْءٍ قَدِيرٌ، لَا إِلَهَ إِلَّا اللَّهُ، لَهُ الْأَسْمَاءُ الْحُسْنَى» ”اکیلے اللہ کے سوا کوئی معبود نہیں، اس کا کوئی شریک نہیں، بادشاہی اسی کی ہے اور تعریف بھی اسی کی ہے، اسی کے ہاتھ میں ساری بھلائی ہے اور وہ ہر چیز پر خوب قادر ہے، اللہ کے سوا کوئی معبود نہیں، اسی کے بہترین نام ہیں۔“ ” [سنن ابن ماجه/كتاب الدعاء/حدیث: 3861]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تین دعائیں قبول ہوتی ہیں، ان (کی قبولیت) میں کوئی شک نہیں: مظلوم کی دعا، مسافر کی دعا اور والد کی اپنی اولاد کے حق میں دعا۔“ [سنن ابن ماجه/كتاب الدعاء/حدیث: 3862]

حضرت ام حکیم بنت وداع خزاعیہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”(ماں) ماں باپ کی دعا (اللہ تعالیٰ کے) حجاب تک پہنچ جاتی ہے (قبول ہوتی ہے)۔“ [سنن ابن ماجه/كتاب الدعاء/حدیث: 3863]

حضرت عبداللہ بن مغفل رضی اللہ عنہ سے روایت ہے کہ انہوں نے اپنے بیٹے کو دعا میں «اللَّهُمَّ إِنِّي أَسْأَلُكَ الْقَصْرَ الْأَبْيَضَ عَنْ يَمِينِ الْجَنَّةِ إِذَا دَخَلْتُهَا» ”اے اللہ! میں تجھ سے درخواست کرتا ہوں کہ جب میں جنت میں داخل ہوں تو مجھے جنت کے دائیں طرف سفید محل دینا“ کہتے سنا، تو انہوں نے فرمایا: ”بیٹے! اللہ سے جنت مانگو اور (جہنم کی) آگ سے اس کی پناہ مانگو، کیونکہ میں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم فرما رہے تھے: ”آئندہ ایسے لوگ ہوں گے جو دعا میں حد سے تجاوز کریں گے۔““ [سنن ابن ماجه/كتاب الدعاء/حدیث: 3864]

حضرت سلمان فارسی رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”تمھارا پروردگار حیا دار اور سخی ہے، وہ اس بات سے شرماتا ہے کہ بندہ (دعا کے لیے) اسی کی طرف ہاتھ اٹھائے اور وہ انھیں خالی یا فرمایا: ناکام پھیر دے۔“ [سنن ابن ماجه/كتاب الدعاء/حدیث: 3865]