حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے ایک آدمی سے پوچھا: ”تم نماز میں کیا پڑھتے ہو؟“ اس نے کہا: ”میں تشہد (التحیات) پڑھتا ہوں، پھر اللہ سے جنت کا سوال کرتا ہوں اور (جہنم کی) آگ سے اس کی پناہ مانگتا ہوں۔ قسم ہے اللہ کی! مجھے آپ جیسی یا حضرت معاذ رضی اللہ عنہ جیسی گنگناہٹ نہیں آتی۔“ نبی صلی اللہ علیہ وسلم نے فرمایا: ”ہم بھی انہی (دونوں) کے بارے میں گنگناتے (سوال کرتے) ہیں۔“ [سنن ابن ماجه/كتاب الدعاء/حدیث: 3847]

حضرت انس بن مالک رضی اللہ عنہ سے روایت ہے، ایک آدمی نے رسول اللہ صلی اللہ علیہ وسلم کی خدمت میں حاضر ہو کر عرض کیا: ”اے اللہ کے رسول! کون سی دعا افضل ہے؟“ آپ صلی اللہ علیہ وسلم نے فرمایا: ”اپنے رب سے دنیا اور آخرت میں معافی اور عافیت کا سوال کر۔“ پھر وہ آدمی آپ کے پاس دوسرے دن حاضرِ خدمت ہوا اور کہا: ”اے اللہ کے رسول صلی اللہ علیہ وسلم ! کون سی دعا افضل ہے؟“ آپ صلی اللہ علیہ وسلم نے فرمایا: ”اپنے رب سے دنیا اور آخرت میں معافی اور عافیت کا سوال کر۔“ پھر وہ تیسرے دن حاضرِ خدمت ہوا اور کہا: ”اے اللہ کے نبی صلی اللہ علیہ وسلم ! کون سی دعا افضل ہے؟“ آپ صلی اللہ علیہ وسلم نے فرمایا: ”اپنے رب سے دنیا اور آخرت میں معافی اور عافیت کا سوال کر۔ جب تجھے دنیا اور آخرت میں معافی اور عافیت مل جائے گی تو یقیناً تو کامیاب ہو جائے گا۔“ [سنن ابن ماجه/كتاب الدعاء/حدیث: 3848]

حضرت اوسط بن اسماعیل بجلی رضی اللہ عنہ سے روایت ہے، انہوں نے رسول اللہ صلی اللہ علیہ وسلم کی وفات کے بعد حضرت ابوبکر رضی اللہ عنہ کو یہ فرماتے سنا: ”گزشتہ سال رسول اللہ صلی اللہ علیہ وسلم اس مقام پر کھڑے ہوئے جہاں میں کھڑا ہوں۔“ پھر (یہ کہہ کر) حضرت ابوبکر رضی اللہ عنہ اشکبار ہو گئے۔ (اور فرمایا!) ”پھر رسول اللہ صلی اللہ علیہ وسلم نے فرمایا تھا: ”سچ اختیار کرو، وہ نیکی کے ساتھ ہوتا ہے، اور وہ دونوں (سچ اور نیکی اور انہیں اختیار کرنے والے) جنت میں ہوں گے۔ اور جھوٹ سے بچ کر رہو، وہ گناہ کے ساتھ ہوتا ہے، اور وہ دونوں (جھوٹ اور گناہ اور انہیں اختیار کرنے والے) جہنم میں ہوں گے۔ اور اللہ سے عافیت کا سوال کرو۔ کسی یقین (اور ایمان) کے بعد عافیت سے بہتر کوئی چیز نہیں مل سکتی۔ ایک دوسرے سے حسد نہ کرو، ایک دوسرے سے بغض نہ رکھو، ایک دوسرے سے قطع تعلق نہ کرو، ایک دوسرے سے منہ نہ موڑو، اور اللہ کے بندو! بھائی بھائی بن جاؤ۔““ [سنن ابن ماجه/كتاب الدعاء/حدیث: 3849]

ام المومنین حضرت عائشہ رضی اللہ عنہا سے روایت ہے، انہوں نے عرض کیا: ”اے اللہ کے رسول صلی اللہ علیہ وسلم ! اگر میں لیلۃ القدر پالوں تو کیا دعا مانگوں؟“ آپ صلی اللہ علیہ وسلم نے فرمایا: ”یوں کہنا: «اللَّهُمَّ إِنَّكَ عَفُوٌّ تُحِبُّ الْعَفْوَ فَاعْفُ عَنِّي» ”اے اللہ! تو بہت زیادہ معاف کرنے والا ہے، تو معاف کرنا پسند کرتا ہے، لہٰذا مجھے معاف فرما دے۔““ [سنن ابن ماجه/كتاب الدعاء/حدیث: 3850]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”بندہ جو بھی دعا مانگتا ہے وہ اس دعا سے افضل نہیں ہوتی: «اللَّهُمَّ إِنِّي أَسْأَلُكَ الْمُعَافَاةَ فِي الدُّنْيَا وَالْآخِرَةِ» ”اے اللہ! میں تجھ سے دنیا اور آخرت میں عافیت کا سوال کرتا ہوں۔“” [سنن ابن ماجه/كتاب الدعاء/حدیث: 3851]

حضرت عبداللہ بن عباس رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اللہ تعالیٰ ہم پر اور قوم عاد کی ہم نسب شخصیت (حضرت ہود علیہ السلام) پر رحم فرمائے۔“ [سنن ابن ماجه/كتاب الدعاء/حدیث: 3852]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”تم میں سے ایک کی دعا قبول ہوتی رہتی ہے جب تک کہ وہ جلد بازی نہ کرے۔“ عرض کیا گیا: ”اے اللہ کے رسول صلی اللہ علیہ وسلم ! وہ جلد بازی کس طرح کرتا ہے؟“ آپ صلی اللہ علیہ وسلم نے فرمایا: ”وہ کہتا ہے: میں نے اللہ سے دعا کی لیکن اللہ نے میری دعا قبول نہیں کی۔“ [سنن ابن ماجه/كتاب الدعاء/حدیث: 3853]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تم میں سے کوئی شخص یوں نہ کہے: «اللَّهُمَّ اغْفِرْ لِي إِنْ شِئْتَ» ”اے اللہ! اگر تو چاہے تو مجھے بخش دے“ بلکہ اسے چاہیے کہ پختہ عزم کے ساتھ دعا مانگے کیونکہ اللہ تعالیٰ کو کوئی مجبور کرنے والا نہیں ہے۔“ [سنن ابن ماجه/كتاب الدعاء/حدیث: 3854]

حضرت اسماء بنت یزید رضی اللہ عنہا سے روایت ہے، رسول اللہ صلی اللہ علیہ وسلم نے فرمایا: ”اللہ کا عظیم ترین نام (اسم اعظم) ان دو آیتوں میں ہے: ﴿وَإِلَٰهُكُمْ إِلَٰهٌ وَاحِدٌ لَّا إِلَٰهَ إِلَّا هُوَ الرَّحْمَٰنُ الرَّحِيمُ﴾ [سورة البقرة: 163] ”تمہارا معبود ایک ہی معبود ہے۔ اس کے سوا کوئی معبود نہیں جو نہایت مہربان، بے حد رحم کرنے والا ہے“ اور سورہ آل عمران کے شروع میں (یعنی) ﴿الٓمّٓ ﴿1﴾ اللَّهُ لَا إِلَٰهَ إِلَّا هُوَ الْحَيُّ الْقَيُّومُ﴾ [سورة آل عمران: 1-2] ۔“ [سنن ابن ماجه/كتاب الدعاء/حدیث: 3855]

حضرت قاسم بن عبدالرحمن دمشقی رضی اللہ عنہ سے روایت ہے، انہوں نے کہا: ”اللہ کا عظیم ترین نام (اسم اعظم) جس کے ساتھ اللہ سے دعا کی جائے تو وہ قبول فرماتا ہے، تین سورتوں میں ہے: سورۂ بقرہ، سورۂ آلِ عمران اور سورۂ طہٰ میں۔“ [سنن ابن ماجه/كتاب الدعاء/حدیث: 3856]