حضرت عائشہ رضی اللہ عنہا سے روایت ہے کہ نبی کریم صلی اللہ علیہ وسلم کی زوجہ محترمہ حضرت صفیہ بنت حیی رضی اللہ عنہا کو حیض آ گیا تو میں نے رسول اللہ صلی اللہ علیہ وسلم سے اس کا ذکر کیا۔ آپ صلی اللہ علیہ وسلم نے فرمایا: ”کیا یہ ہمیں روک لے گی؟“ انہوں نے عرض کیا کہ انہوں نے طوافِ زیارت کر لیا ہے۔ آپ صلی اللہ علیہ وسلم نے فرمایا: ”پھر کوئی حرج نہیں ہے۔ یعنی سفر کا آغاز کرو۔“ [صحيح البخاري/كتاب الحج/حدیث: 1757]

عکرمہ رحمہ اللہ سے روایت ہے کہ اہل مدینہ نے حضرت عبداللہ بن عباس رضی اللہ عنہما سے اس عورت کے متعلق دریافت کیا جس نے طوافِ زیارت کر لیا ہو پھر اسے حیض آ جائے، انہوں نے فرمایا کہ وہ اپنے سفر کا آغاز کر دے۔ لوگوں نے کہا: ہم ایسا نہیں کریں گے کہ آپ کی بات مان لیں اور حضرت زید بن ثابت رضی اللہ عنہ کی بات ترک کر دیں۔ حضرت عبداللہ بن عباس رضی اللہ عنہما نے فرمایا کہ جب تم واپس مدینہ جاؤ تو اس مسئلے کی تحقیق کر لینا، چنانچہ لوگ جب مدینہ طیبہ واپس آئے تو اس مسئلے کے متعلق دریافت کیا، جن لوگوں سے انہوں نے دریافت کیا ان میں سے حضرت ام سلیم رضی اللہ عنہا بھی تھیں۔ انہوں نے اس سلسلے میں حضرت صفیہ رضی اللہ عنہا کا واقعہ بیان کیا۔ اس حدیث کو خالد اور قتادہ نے عکرمہ رحمہ اللہ سے بیان کیا ہے۔ [صحيح البخاري/كتاب الحج/حدیث: 1758]

حضرت عکرمہ رحمہ اللہ سے روایت ہے کہ اہل مدینہ نے حضرت ابن عباس رضی اللہ عنہما سے اس عورت کے متعلق دریافت کیا جس نے طوافِ زیارت کر لیا ہو، پھر اسے حیض آ جائے، انہوں نے فرمایا کہ وہ اپنے سفر کا آغاز کر دے۔ لوگوں نے کہا: ہم ایسا نہیں کریں گے کہ آپ کی بات مان لیں اور حضرت زید بن ثابت رضی اللہ عنہ کی بات ترک کر دیں۔ حضرت ابن عباس رضی اللہ عنہما نے فرمایا کہ جب تم واپس مدینہ جاؤ تو اس مسئلے کی تحقیق کر لینا، چنانچہ لوگ جب مدینہ طیبہ واپس آئے تو اس مسئلے کے متعلق دریافت کیا، جن لوگوں سے انہوں نے دریافت کیا ان میں سے ام سلیم رضی اللہ عنہا بھی تھیں۔ انہوں نے اس سلسلے میں حضرت صفیہ رضی اللہ عنہا کا واقعہ بیان کیا۔ اس حدیث کو خالد اور قتادہ نے حضرت عکرمہ رحمہ اللہ سے بیان کیا ہے۔ [صحيح البخاري/كتاب الحج/حدیث: 1759]

حضرت عبداللہ بن عباس رضی اللہ عنہما سے ہی روایت ہے، انہوں نے فرمایا کہ حائضہ عورت کو طوافِ زیارت کے بعد مکہ سے جانے کی اجازت ہے۔ [صحيح البخاري/كتاب الحج/حدیث: 1760]

راوی کا بیان ہے کہ میں نے حضرت ابن عمر رضی اللہ عنہما کو یہ کہتے ہوئے سنا کہ حائضہ عورت کو سفر کی اجازت نہیں ہے۔ لیکن میں نے اس کے بعد ان سے سنا کہ نبی کریم صلی اللہ علیہ وسلم نے ”ایسی عورتوں کو سفر کرنے کی اجازت دی ہے۔“ [صحيح البخاري/كتاب الحج/حدیث: 1761]

حضرت عائشہ رضی اللہ عنہا سے روایت ہے، انہوں نے فرمایا کہ ہم نبی کریم صلی اللہ علیہ وسلم کے ہمراہ روانہ ہوئے۔ ہمارا صرف حج کرنے کا ارادہ تھا۔ نبی کریم صلی اللہ علیہ وسلم جب مکہ مکرمہ آئے تو آپ نے بیت اللہ کا طواف اور صفا مروہ کے درمیان سعی کی لیکن آپ نے احرام نہ کھولا کیونکہ آپ کے ہمراہ قربانی تھی۔ آپ کے ساتھ آپ کی بیویاں اور دیگر صحابہ کرام رضی اللہ عنہم تھے۔ انہوں نے بھی طواف کیا۔ جن کے پاس قربانی نہ تھی انہوں نے احرام کھول دیا۔ دریں اثنا اسے (حضرت عائشہ رضی اللہ عنہا کو) حیض آگیا چنانچہ ہم نے مناسک حج ادا کیے۔ جب روانگی کی رات آئی تو انہوں نے عرض کیا: اللہ کے رسول صلی اللہ علیہ وسلم ! میرے علاوہ آپ کے تمام صحابہ کرام رضی اللہ عنہم حج اور عمرہ کرکے واپس جا رہے ہیں۔ آپ صلی اللہ علیہ وسلم نے فرمایا: ”جن راتوں ہم مکہ مکرمہ آئے تھے کیا تم نے اس وقت بیت اللہ کا طواف نہیں کیا تھا؟“ میں نے عرض کیا: نہیں۔ آپ صلی اللہ علیہ وسلم نے فرمایا: ”اپنے بھائی کے ساتھ مقام تنعیم جاؤ اور وہاں سے احرام باندھ کر عمرہ کرلو، فراغت کے بعد فلاں جگہ پر آجاؤ۔“ چنانچہ میں حضرت عبد الرحمن رضی اللہ عنہ کے ہمراہ تنعیم چلی گئی۔ وہاں سے عمرے کا احرام باندھا۔ اور حضرت صفیہ رضی اللہ عنہا کو حیض آگیا تو نبی کریم صلی اللہ علیہ وسلم نے انہیں فرمایا: ” «عَقْرَى حَلْقَى» ”بانجھ اور سرمنڈائی!“ کیا تو ہمیں روک لے گی؟ کیا تو نے قربانی کے دن بیت اللہ کا طواف نہیں کیا تھا؟“ انہوں نے جواب دیا: کیوں نہیں، یعنی طواف کیا تھا۔ آپ صلی اللہ علیہ وسلم نے فرمایا: ”پھر کوئی حرج نہیں، رخت سفر باندھو۔“ حضرت عائشہ رضی اللہ عنہا فرماتی ہیں کہ عمرے سے فراغت کے بعد میری جب آپ صلی اللہ علیہ وسلم سے ملاقات ہوئی تو مکہ کے بالائی علاقے پر آپ صلی اللہ علیہ وسلم چڑھ رہے تھے اور میں نشیب میں اتر رہی تھی یا اس کے برعکس میں اوپر چڑھ رہی تھی اور آپ صلی اللہ علیہ وسلم نیچے اتر رہے تھے۔ راوی حدیث مسدد نے کہا کہ روایت مذکورہ میں لفظ «لَا» ”نہیں“ ہے۔ جریر نے منصور سے لفظ «لَا» روایت کرنے میں مسدد کی متابعت کی ہے۔ [صحيح البخاري/كتاب الحج/حدیث: 1762]

حضرت عبدالعزیز بن رفیع رحمہ اللہ سے روایت ہے، انہوں نے کہا: میں نے حضرت انس بن مالک رضی اللہ عنہ سے دریافت کیا کہ مجھے ایسی چیز بتائیں جو آپ نے نبی کریم صلی اللہ علیہ وسلم سے اچھی طرح معلوم کی ہو۔ رسول اللہ صلی اللہ علیہ وسلم نے آٹھویں ذوالحجہ کو ظہر کی نماز کہاں پڑھی تھی؟ حضرت انس رضی اللہ عنہ نے فرمایا: نماز ظہر منیٰ میں پڑھی تھی۔ میں نے پھر عرض کیا کہ روانگی کے دن عصر کی نماز کہاں پڑھی تھی؟ انہوں نے فرمایا: وادی ابطح میں، تاہم تم ایسے ہی کرو جس طرح تمہارے حکام کریں۔ [صحيح البخاري/كتاب الحج/حدیث: 1763]

حضرت انس بن مالک رضی اللہ عنہ ہی سے روایت ہے، وہ نبی کریم صلی اللہ علیہ وسلم سے بیان کرتے ہیں کہ آپ نے ظہر، عصر، مغرب اور عشاء کی نمازیں وادی محصب میں ادا کیں، اس کے بعد وہاں تھوڑی سی نیند فرمائی، پھر سوار ہو کر بیت اللہ کی طرف تشریف لے گئے اور اس کا طواف کیا۔ [صحيح البخاري/كتاب الحج/حدیث: 1764]

حضرت عائشہ رضی اللہ عنہا سے روایت ہے، انہوں نے فرمایا کہ مقام ابطح پر نبی کریم صلی اللہ علیہ وسلم نے اس لیے پڑاؤ کیا تھا تاکہ وہاں سے مدینہ طیبہ جانے میں آسانی ہو۔ [صحيح البخاري/كتاب الحج/حدیث: 1765]

حضرت ابن عباس رضی اللہ عنہما سے روایت ہے، انہوں نے فرمایا کہ وادی محصب میں پڑاؤ کرنا کوئی سنت نہیں ہے بلکہ وہ تو ایک منزل ہے جہاں رسول اللہ صلی اللہ علیہ وسلم نے پڑاؤ کیا تھا۔ [صحيح البخاري/كتاب الحج/حدیث: 1766]