حضرت بلال رضی اللہ عنہ بیان کرتے ہیں کہ میں نے کہا: اے اللہ کے رسول صلی اللہ علیہ وسلم ! کیا حج کو فسخ کر کے عمرہ بنانا صرف ہمارے لیے ہے یا سب لوگوں کے لیے؟ آپ صلی اللہ علیہ وسلم نے فرمایا: ”بلکہ صرف ہمارے لیے ہے۔“ [سنن نسائي/كتاب مناسك الحج/حدیث: 2810]

حضرت ابو ذر رضی اللہ عنہ سے تمتع کے بارے میں منقول ہے کہ یہ صرف ہمارے لیے رخصت تھی۔ [سنن نسائي/كتاب مناسك الحج/حدیث: 2811]

حضرت ابوذر رضی اللہ عنہ نے «تَمَتُّع» کے بارے میں فرمایا کہ یہ تمہارے لیے نہیں، نہ تمہارا اس سے کوئی تعلق ہے، یہ تو صرف ہم، یعنی اصحابِ محمد صلی اللہ علیہ وسلم کے لیے رخصت تھی۔ [سنن نسائي/كتاب مناسك الحج/حدیث: 2812]

حضرت ابوذر رضی اللہ عنہ بیان کرتے ہیں کہ تمتع صرف ہمارے لیے رخصت تھی۔ [سنن نسائي/كتاب مناسك الحج/حدیث: 2813]

حضرت عبدالرحمن بن ابو شعثاء سے روایت ہے کہ میں حضرت ابراہیم نخعی اور حضرت ابراہیم تیمی کے ساتھ تھا، میں نے کہا: میرا ارادہ ہے کہ میں اس سال حج اور عمرہ اکٹھا کروں، حضرت ابراہیم کہنے لگے: اگر تیرا باپ زندہ ہوتا تو وہ یہ ارادہ نہ کرتا، پھر انہوں نے حضرت ابو ذر رضی اللہ عنہ کا فرمان ذکر کیا کہ (یہ خصوصی) تمتع صرف ہمارے لیے ہی تھا۔ [سنن نسائي/كتاب مناسك الحج/حدیث: 2814]

حضرت ابن عباس رضی اللہ عنہما سے مروی ہے کہ اہل جاہلیت یہ سمجھتے تھے کہ حج کے مہینوں میں عمرہ کرنا زمین پر سب سے بڑا گناہ ہے۔ وہ محرم کو صفر بنا لیا کرتے تھے اور کہتے تھے: جب اونٹوں کی پشت پر لگنے والے زخم ٹھیک ہو جائیں اور خوب اون اگ آئے اور صفر (محرم) گزر جائے، یا انہوں نے کہا: صفر کا مہینہ شروع ہو جائے تو پھر عمرہ کرنے والے کے لیے عمرہ حلال ہوتا ہے۔ نبی کریم صلی اللہ علیہ وسلم (حجۃ الوداع میں) اور آپ کے صحابہ چار ذوالحجہ کی صبح کو حج کی لبیک کہتے ہوئے مکہ مکرمہ پہنچے تو آپ نے انہیں حکم دیا کہ اس حج کے احرام کو عمرہ بنا لیں۔ یہ چیز ان کے نزدیک بڑی شاق تھی (کہ وہ حلال ہو جائیں) تو انہوں نے کہا: اے اللہ کے رسول! کس قسم کی حلت؟ آپ نے فرمایا: ”پوری حلت۔“ [سنن نسائي/كتاب مناسك الحج/حدیث: 2815]

حضرت عبداللہ بن عباس رضی اللہ عنہما بیان کرتے ہیں کہ رسول اللہ صلی اللہ علیہ وسلم نے عمرے کا احرام باندھا اور آپ کے صحابہ نے حج کا احرام باندھا تھا۔ آپ صلی اللہ علیہ وسلم نے حکم فرمایا: ”جن کے ساتھ قربانی کا جانور نہیں، وہ (عمرہ کر کے) حلال ہو جائیں۔“ اور جن کے پاس قربانی کے جانور نہیں تھے ان میں حضرت طلحہ بن عبیداللہ رضی اللہ عنہ اور ایک اور شخص شامل تھے، لہٰذا وہ دونوں حلال ہو گئے۔ [سنن نسائي/كتاب مناسك الحج/حدیث: 2816]

حضرت ابن عباس رضی اللہ عنہ سے منقول ہے کہ نبی کریم صلی اللہ علیہ وسلم نے فرمایا: ”یہ عمرہ ہے، ہم نے (حج کے ساتھ) اس کا فائدہ اٹھایا ہے، لہٰذا جس شخص کے پاس قربانی کا جانور نہیں، وہ مکمل طور پر حلال ہو جائے، اور سن لو کہ عمرہ حج میں داخل ہو گیا ہے۔“ [سنن نسائي/كتاب مناسك الحج/حدیث: 2817]

حضرت ابو قتادہ رضی اللہ عنہ سے روایت ہے کہ وہ رسول اللہ صلی اللہ علیہ وسلم کے ساتھ تھے، حتیٰ کہ جب وہ مکہ مکرمہ کے راستے میں تھے تو کچھ ساتھیوں کے ساتھ آپ صلی اللہ علیہ وسلم سے پیچھے رہ گئے، وہ ساتھی محرم تھے مگر وہ (ابوقتادہ) محرم نہیں تھے، انہوں نے ایک جنگلی گدھا دیکھا تو وہ فوراً اپنے گھوڑے پر سوار ہوئے، پھر انہوں نے اپنے ساتھیوں سے کہا کہ انہیں ان کا کوڑا پکڑا دیں، ان لوگوں نے انکار کیا، پھر انہوں نے ان سے اپنا نیزہ مانگا تو انہوں نے دینے سے انکار کر دیا، انہوں نے (خود اتر کر) اسے (یعنی کوڑا) اٹھایا اور پھر جنگلی گدھے کا پیچھا کیا اور اسے قتل کر دیا، (نبی صلی اللہ علیہ وسلم کے کچھ صحابہ نے اس کا گوشت کھا لیا اور کچھ نے انکار کیا، پھر جب وہ رسول اللہ صلی اللہ علیہ وسلم سے ملے تو آپ صلی اللہ علیہ وسلم سے اس کی بابت پوچھا، آپ صلی اللہ علیہ وسلم نے فرمایا: ”یہ اللہ تعالیٰ کی طرف سے عطا کردہ کھانا تھا جو اس نے تمہیں کھانے کے لیے مہیا فرمایا تھا۔“) [سنن نسائي/كتاب مناسك الحج/حدیث: 2818]

حضرت عبدالرحمن تیمی رضی اللہ عنہ سے روایت ہے کہ ہم حضرت طلحہ بن عبیداللہ رضی اللہ عنہ کے ساتھ تھے، ہم سب محرم تھے، انہیں ایک پرندے کا گوشت بطور تحفہ بھیجا گیا، وہ سو رہے تھے، ہم میں سے کچھ نے وہ گوشت کھا لیا اور کچھ نے پرہیز کیا، اتنے میں حضرت طلحہ بن عبیداللہ رضی اللہ عنہ جاگ پڑے تو انہوں نے ان لوگوں کی تائید کی جنہوں نے گوشت کھایا تھا اور فرمایا: ہم نے رسول اللہ صلی اللہ علیہ وسلم کے ساتھ اسی پرندے کا گوشت کھایا تھا۔ [سنن نسائي/كتاب مناسك الحج/حدیث: 2819]