حضرت شرجیل بن سمط رضی اللہ عنہ سے روایت ہے کہ انہوں نے (حضرت عمرو رضی اللہ عنہ) سے کہا: اے عمرو! ہمیں کوئی حدیث بیان فرمائیے جو آپ نے رسول اللہ صلی اللہ علیہ وسلم سے سنی ہو، اس میں کوئی بھول چوک یا کمی نہ ہو۔ انہوں نے کہا کہ میں نے رسول اللہ صلی اللہ علیہ وسلم کو فرماتے سنا: ”جس نے اللہ تعالیٰ کے راستے میں تیر چلایا اور دشمن تک پہنچا دیا، (وہ تیر دشمن کو) لگا یا نہ لگا، وہ اس کے لیے ایک غلام کی آزادی کی طرح ہوگا۔ اور جس شخص نے کوئی مسلمان غلام آزاد کیا تو اس کا ہر عضو اس کے ہر عضو کے بدلے میں جہنم کی آگ سے آزاد ہوگا۔ اور جو شخص اللہ تعالیٰ کے راستے میں (کام کرتے کرتے) بوڑھا ہو گیا تو اس کے سفید بال قیامت کے دن اس کے لیے نور بن جائیں گے۔“ [سنن نسائي/كتاب الجهاد/حدیث: 3147]

حضرت عقبہ بن عامر رضی اللہ عنہ سے منقول ہے کہ نبی صلی اللہ علیہ وسلم نے فرمایا: ”اللہ تعالیٰ ایک تیر کی وجہ سے تین اشخاص کو جنت میں داخل فرمائے گا: بنانے والا، جو اسے بناتے وقت نیکی کا ذہن رکھتا ہے، تیر پھینکنے والا اور تیر پکڑنے والا۔“ [سنن نسائي/كتاب الجهاد/حدیث: 3148]

حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”جو شخص اللہ تعالیٰ کے راستے میں زخمی ہوتا ہے... اور اللہ تعالیٰ ہی بہتر جانتا ہے کہ کون اللہ تعالیٰ کی راہ میں زخمی ہوتا ہے... تو وہ قیامت کے دن اس حالت میں آئے گا کہ اس کے زخم سے خون تیزی سے بہہ رہا ہوگا۔ رنگ تو خون کا ہوگا مگر خوشبو کستوری کی ہوگی۔“ [سنن نسائي/كتاب الجهاد/حدیث: 3149]

حضرت عبداللہ بن ثعلبہ رضی اللہ عنہ سے روایت ہے کہ رسول اللہ صلی اللہ علیہ وسلم نے (شہدائے احد کے بارے میں) فرمایا تھا: ”انہیں ان کے خون (آلودہ جسم اور کپڑوں) سمیت ڈھانپ کر دفن کرو کیونکہ جو زخم بھی اللہ تعالیٰ کے راستے میں لگتا ہے، وہ قیامت کے دن اس حالت میں ہوگا کہ اس سے خون بہہ رہا ہو گا۔ رنگ تو خون کا ہو گا مگر خوشبو کستوری کی ہو گی۔“ [سنن نسائي/كتاب الجهاد/حدیث: 3150]

حضرت جابر بن عبداللہ رضی اللہ عنہما فرماتے ہیں: جب احد کا دن تھا اور لوگ بھاگ کھڑے ہوئے تو رسول اللہ صلی اللہ علیہ وسلم بارہ انصاریوں کے حصار میں (میدان کے) ایک کنارے میں (ڈٹے ہوئے) تھے۔ ان میں (ایک مہاجر) حضرت طلحہ بن عبید اللہ رضی اللہ عنہ بھی موجود تھے۔ مشرکوں نے انہیں گھیرا تو رسول اللہ صلی اللہ علیہ وسلم اپنے ساتھیوں کی طرف متوجہ ہوئے اور فرمایا: ”کون دشمنوں کا مقابلہ کرے گا؟“ حضرت طلحہ رضی اللہ عنہ نے کہا: میں۔ رسول اللہ صلی اللہ علیہ وسلم نے فرمایا: ”تو جس جگہ ہے وہیں ٹھہرا رہے۔“ ایک انصاری نے عرض کیا: اے اللہ کے رسول! میں مقابلہ کرتا ہوں۔ آپ صلی اللہ علیہ وسلم نے فرمایا: ”ہاں، تو مقابلہ کر۔“ اس نے لڑائی کی حتیٰ کہ وہ شہید ہو گیا۔ آپ صلی اللہ علیہ وسلم نے پھر توجہ فرمائی تو مشرک ابھی تک موجود تھے۔ آپ صلی اللہ علیہ وسلم نے فرمایا: ”کون دشمنوں کا مقابلہ کرے گا؟“ حضرت طلحہ رضی اللہ عنہ نے کہا: میں۔ آپ صلی اللہ علیہ وسلم نے فرمایا: ”تو جہاں ہے وہیں رہ۔“ ایک اور انصاری نے کہا: اے اللہ کے رسول! میں۔ آپ صلی اللہ علیہ وسلم نے فرمایا: ”ہاں، تو مقابلہ کر۔“ اس نے لڑائی لڑی حتیٰ کہ وہ بھی شہید ہو گیا۔ آپ صلی اللہ علیہ وسلم برابر یہی فرماتے رہے اور ایک ایک انصاری نکلتا رہا اور اپنے پیشرو کی طرح لڑائی کرتا رہا اور شہید ہوتا رہا حتیٰ کہ رسول اللہ صلی اللہ علیہ وسلم اور حضرت طلحہ بن عبید اللہ رضی اللہ عنہ ہی باقی رہ گئے۔ رسول اللہ صلی اللہ علیہ وسلم نے فرمایا: ”کون دشمنوں کا مقابلہ کرے گا؟“ حضرت طلحہ رضی اللہ عنہ نے کہا: میں کیا کروں گا، اور انہوں نے لڑائی شروع کر دی۔ اور وہ اپنے پیشرو گیارہ انصاریوں کی طرح لڑے حتیٰ کہ ان کے ہاتھ پر تلوار لگی اور انگلیاں کٹ گئیں۔ تو ان کے منہ سے «حَسِّ» ”اوئی وغیرہ“ نکلا۔ رسول اللہ صلی اللہ علیہ وسلم نے فرمایا: ”(جب تجھے زخم لگا تھا) اگر تو «بِسْمِ اللّٰهِ» ”اللہ کے نام سے“ کہتا تو تجھے فرشتے اٹھا لیتے۔ اور لوگ دیکھتے رہتے۔“ پھر اللہ تعالیٰ نے مشرکوں کو پھیر دیا۔ [سنن نسائي/كتاب الجهاد/حدیث: 3151]

حضرت سلمہ بن اکوع رضی اللہ عنہ بیان کرتے ہیں کہ جب خیبر کی لڑائی ہوئی تو میرے بھائی نے رسول اللہ صلی اللہ علیہ وسلم کی معیت میں خوب لڑائی کی، پھر ان کی تلوار مڑ کر انہی کو لگی اور وہ فوت ہو گئے۔ رسول اللہ صلی اللہ علیہ وسلم کے کچھ صحابہ نے اس بارے میں چہ مگوئیاں کیں اور ان کی شہادت کے بارے میں شک کیا (اور کہا) کہ یہ آدمی تو اپنے ہتھیار سے مرا ہے۔ حضرت سلمہ رضی اللہ عنہ نے کہا کہ جب رسول اللہ صلی اللہ علیہ وسلم نے خیبر سے واپسی کا سفر شروع فرمایا تو میں نے عرض کی: اے اللہ کے رسول! کیا آپ مجھے اجازت دیتے ہیں کہ میں آپ کی موجودگی میں کچھ اشعار پڑھ لوں؟ تو رسول اللہ صلی اللہ علیہ وسلم نے اجازت مرحمت فرمائی۔ حضرت عمر بن خطاب رضی اللہ عنہ نے فرمایا: جو کہنا ہے غور سے کہنا (کوئی شعر خلاف شرع نہ ہو)۔ میں نے یہ اشعار پڑھے: «وَاللّٰهِ لَوْلَا اللّٰهُ مَا اهْتَدَيْنَا، وَلَا تَصَدَّقْنَا وَلَا صَلَّيْنَا» ”اللہ کی قسم! اگر اللہ تعالیٰ کی رحمت نہ ہوتی تو ہم ہدایت نہ پاتے، نہ صدقے کرتے اور نہ نمازیں پڑھتے۔“ رسول اللہ صلی اللہ علیہ وسلم نے فرمایا: ”تم نے سچ کہا۔“ (پھر پڑھا:) «فَأَنْزِلَنْ سَكِينَةً عَلَيْنَا، وَثَبِّتِ الْأَقْدَامَ إِنْ لَاقَيْنَا، وَالْمُشْرِكُونَ قَدْ بَغَوْا عَلَيْنَا» ”اے اللہ! ہم پر سکون و اطمینان نازل فرما اور اگر دشمن سے مقابلہ ہو تو ہمیں ثابت قدم رکھنا، مشرکوں نے ہم پر ظلم و ستم کیے ہیں۔“ جب میں نے اپنے اشعار پورے کیے تو رسول اللہ صلی اللہ علیہ وسلم نے دریافت فرمایا: ”یہ اشعار کس نے کہے ہیں؟“ میں نے عرض کی: میرے بھائی نے۔ رسول اللہ صلی اللہ علیہ وسلم نے فرمایا: ”اللہ تعالیٰ اس پر رحم فرمائے۔“ میں نے عرض کی: اے اللہ کے رسول! اللہ کی قسم! کچھ لوگ اس کے لیے دعائے مغفرت کرنے سے ڈرتے ہیں، وہ کہتے ہیں کہ یہ شخص تو اپنے ہی ہتھیار سے مرا ہے۔ رسول اللہ صلی اللہ علیہ وسلم نے فرمایا: ”وہ تو بڑی تگ و دو (کوشش) سے جہاد کرتے ہوئے فوت ہوا ہے۔“ (حدیث کے راوی) ابن شہاب (امام زہری) رحمہ اللہ نے کہا کہ میں نے سلمہ بن اکوع رضی اللہ عنہ کے بیٹے سے پوچھا تو انہوں نے اپنے والد سے اسی (مذکورہ حدیث کی) طرح حدیث بیان کی لیکن یہ بات زیادہ کہی کہ جب میں (سلمہ بن اکوع رضی اللہ عنہ) نے عرض کی کہ لوگ اس کے لیے دعائے مغفرت کرنے سے ڈرتے تھے، تو (یہ سن کر) رسول اللہ صلی اللہ علیہ وسلم نے فرمایا: ”لوگوں نے غلط کہا، وہ تو بڑی تگ و دو (کوشش) سے جہاد کرتے ہوئے مرا ہے، اسے دگنا اجر ملے گا۔“ (یہ فرماتے ہوئے) آپ صلی اللہ علیہ وسلم نے اپنی دو انگلیوں سے اشارہ فرمایا۔ [سنن نسائي/كتاب الجهاد/حدیث: 3152]

حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”اگر یہ خطرہ نہ ہوتا کہ میں اپنی امت پر مشقت ڈال دوں گا تو میں کسی لشکر کے پیچھے نہ رہتا، لیکن وہ سواری کے جانور نہیں پاتے اور میں بھی اتنے جانور نہیں پاتا کہ ان سب کو سواری مہیا کر سکوں۔ اور مجھ سے پیچھے رہنا ان پر شاق گزرتا ہے۔ میری خواہش ہے کہ میں اللہ تعالیٰ کے راستے میں شہید کیا جاؤں، پھر زندہ کیا جاؤں، پھر شہید کیا جاؤں، پھر زندہ کیا جاؤں۔“ تین دفعہ فرمایا۔ [سنن نسائي/كتاب الجهاد/حدیث: 3153]

حضرت ابوہریرہ رضی اللہ عنہ نے فرمایا کہ میں نے رسول اللہ صلی اللہ علیہ وسلم کو فرماتے سنا: ”قسم اس ذات کی جس کے ہاتھ میں میری جان ہے! اگر یہ خدشہ نہ ہوتا کہ مومن مجھ سے پیچھے رہنا گوارا نہیں کریں گے اور میں اتنی سواریاں نہیں پاتا کہ ان سب کو سوار کر سکوں، تو میں جہاد فی سبیل اللہ کے جانے والے کسی لشکر سے بھی پیچھے نہ رہتا۔ قسم اس ذات کی جس کے ہاتھ میں میری جان ہے! میری خواہش ہے کہ میں اللہ تعالیٰ کے راستے میں شہید ہو جاؤں، پھر زندہ کیا جاؤں، پھر شہید ہو جاؤں، پھر زندہ کیا جاؤں، پھر شہید ہو جاؤں۔“ [سنن نسائي/كتاب الجهاد/حدیث: 3154]

حضرت ابن ابی عمیرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”کوئی بھی مسلمان شخص جسے اس کا رب تعالیٰ اپنے پاس بلائے، یہ خواہش نہیں کرے گا کہ وہ تمہارے پاس (دنیا میں) واپس آ جائے، خواہ اسے دنیا کی ہر چیز مل جائے، مگر شہید واپسی کی خواہش کرے گا۔“ حضرت ابن ابی عمیرہ رضی اللہ عنہ نے کہا: رسول اللہ صلی اللہ علیہ وسلم نے فرمایا: ”مجھے اللہ تعالیٰ کے راستے میں شہید ہونا اس بات سے زیادہ پسند ہے کہ سب بدوی اور شہری میرے غلام بن جائیں۔“ [سنن نسائي/كتاب الجهاد/حدیث: 3155]

حضرت جابر رضی اللہ عنہ فرماتے ہیں کہ جنگِ احد کے دن ایک آدمی نے رسول اللہ صلی اللہ علیہ وسلم سے کہا کہ آپ مجھے بتائیں، اگر میں اللہ تعالیٰ کے راستے میں مارا جاؤں تو میں کہاں جاؤں گا؟ (آپ صلی اللہ علیہ وسلم نے) فرمایا: ”جنت میں۔“ اس نے اپنے ہاتھ میں پکڑی ہوئی کھجوریں (جنہیں وہ کھا رہا تھا) پھینک دیں اور (کافروں سے) لڑنے لگا حتیٰ کہ وہ شہید ہو گیا۔ [سنن نسائي/كتاب الجهاد/حدیث: 3156]