حضرت ام شریک رضی اللہ عنہا سے روایت ہے، انہوں نے بتایا کہ نبی کریم صلی اللہ علیہ وسلم نے ”چھپکلی کو مار ڈالنے“ کا حکم فرمایا ہے۔ [صحيح البخاري/كتاب بدء الخلق/حدیث: 3307]

حضرت عائشہ رضی اللہ عنہا سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”دو دھاری سانپ کو مار ڈالو کیونکہ وہ انسان کو اندھا کر دیتا ہے اور حاملہ عورت کا حمل گرا دیتا ہے۔“ ابو اسامہ کے ساتھ اس کو حماد بن سلمہ نے بھی روایت کیا ہے۔ [صحيح البخاري/كتاب بدء الخلق/حدیث: 3308]

حضرت عائشہ رضی اللہ عنہا ہی سے روایت ہے، انہوں نے کہا کہ نبی کریم صلی اللہ علیہ وسلم نے ”دُم کٹے سانپ کو قتل کر دینے کا حکم دیا کیونکہ وہ اندھا کر دیتا ہے اور حمل ساقط کر دیتا ہے“۔ [صحيح البخاري/كتاب بدء الخلق/حدیث: 3309]

حضرت ابن عمر رضی اللہ عنہما سے روایت ہے کہ وہ سانپوں کو قتل کیا کرتے تھے، پھر منع کرنے لگے اور کہا: (ایک مرتبہ) نبی کریم صلی اللہ علیہ وسلم نے اپنی دیوار گرائی تو اس میں سانپ کی کینچلی ملی تو آپ نے فرمایا: ”دیکھو سانپ کہاں ہے؟“ صحابہ کرام رضی اللہ عنہم نے دیکھ لیا تو آپ نے فرمایا: ”اسے مار ڈالو۔“ اس لیے میں انہیں مارا کرتا تھا۔ [صحيح البخاري/كتاب بدء الخلق/حدیث: 3310]

لیکن اس کے بعد میں جب حضرت ابولبابہ رضی اللہ عنہ سے ملا تو انہوں نے مجھے بتایا کہ نبی کریم صلی اللہ علیہ وسلم نے فرمایا: ”سفید سانپوں کو مت مارو، ان کے علاوہ ہر دم کٹا اور دو دھاری والا سانپ مار ڈالو کیونکہ وہ حمل گرا دیتا ہے اور بینائی کو ختم کر دیتا ہے۔“ [صحيح البخاري/كتاب بدء الخلق/حدیث: 3311]

حضرت ابن عمر رضی اللہ عنہما سے روایت ہے کہ وہ سانپوں کو مارا کرتے تھے۔ [صحيح البخاري/كتاب بدء الخلق/حدیث: 3312]

انھیں حضرت ابولبابہ رضی اللہ عنہ نے بتایا کہ نبی کریم صلی اللہ علیہ وسلم نے ”گھروں میں رہنے والے سانپوں کو قتل کرنے سے منع فرمایا ہے“ تو وہ ان کے قتل کرنے سے رُک گئے۔ [صحيح البخاري/كتاب بدء الخلق/حدیث: 3313]

حضرت عائشہ رضی اللہ عنہا سے روایت ہے، وہ نبی کریم صلی اللہ علیہ وسلم سے بیان کرتی ہیں کہ آپ نے فرمایا: ”پانچ جانور موذی ہیں، انھیں حرم میں بھی مارا جا سکتا ہے: چوہا، بچھو، چیل، کوا اور باؤلا کتا۔“ [صحيح البخاري/كتاب بدء الخلق/حدیث: 3314]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”پانچ جانور ایسے ہیں جنھیں اگر کوئی شخص حالت احرام میں بھی مار ڈالے تو اس پر کوئی گناہ نہیں: وہ بچھو، چوہا، باؤلا کتا، کوا اور چیل ہیں۔“ [صحيح البخاري/كتاب بدء الخلق/حدیث: 3315]

حضرت جابر بن عبداللہ رضی اللہ عنہما سے روایت ہے، انہوں نے اس حدیث کو مرفوع ذکر کیا کہ رسول اللہ صلی اللہ علیہ وسلم نے فرمایا: ”(شام کے وقت) برتنوں کو ڈھانک دو، مشکیزوں کے منہ باندھ لیا کرو، دروازے بند کرلو، اور بچوں کو باہر جانے سے منع کرو کیونکہ شام کے وقت جن پھیلتے اور اچک لیتے ہیں، نیز سونے کے وقت چراغ گل کردیا کرو کیونکہ موذی چوہا بعض اوقات جلتی بتی کھینچ لاتا ہے اور سارے گھر کو جلادیتا ہے۔“ ابن جریج اور حبیب نے عطاء رحمہ اللہ سے جنات کی بجائے شیاطین کے الفاظ ذکر کیے ہیں۔ [صحيح البخاري/كتاب بدء الخلق/حدیث: 3316]