حضرت ابوہریرہ رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”حضرت ابراہیم علیہ السلام نے اپنا ختنہ خود ایک بسولے سے کیا تھا جبکہ آپ اسی (80) برس کے تھے۔“ ایک روایت میں «الْقَدُومِ» کا لفظ دال کی تخفیف کے ساتھ آیا ہے۔ [صحيح البخاري/كتاب أحاديث الأنبياء/حدیث: 3356]

حضرت ابوہریرہ رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”حضرت ابراہیم علیہ السلام نے زندگی میں صرف تین مرتبہ خلاف واقعہ بات کی ہے۔“ [صحيح البخاري/كتاب أحاديث الأنبياء/حدیث: 3357]

حضرت ابوہریرہ رضی اللہ عنہ ہی سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”حضرت ابراہیم علیہ السلام نے صرف تین مرتبہ خلافِ واقعہ بات کی ہے، ان میں سے دو تو اللہ کی ذاتِ ستودہ صفات کے متعلق تھیں۔ پہلا آپ کا یہ کہنا: ﴿ «إِنِّي سَقِيمٌ» ﴾ [سورة الصافات: 89] ”میں بیمار ہوں“، دوسری بات آپ کا یہ کہنا: ﴿ «بَلْ فَعَلَهُ كَبِيرُهُمْ هَذَا» ﴾ [سورة الأنبياء: 63] ”بلکہ یہ ان کے بڑے بت نے کیا ہے“ اور آپ صلی اللہ علیہ وسلم نے فرمایا: ”(تیسری بات یہ ہے کہ) ایک دن وہ اور (ان کی بیوی) حضرت سارہ رضی اللہ عنہا (سفر کرتے کرتے) ایک ظالم بادشاہ کے پاس سے گزرے تو اس (بادشاہ) سے کہا گیا: یہاں ایک مرد آیا ہے، اس کے ساتھ بہت خوبصورت عورت ہے، چنانچہ اس بادشاہ نے ان کے پاس ایک آدمی بھیجا اور حضرت سارہ رضی اللہ عنہا کے متعلق پوچھا کہ وہ کون ہے؟ انہوں نے (حضرت ابراہیم علیہ السلام نے) جواب دیا: یہ میری بہن ہے۔ اس کے بعد آپ حضرت سارہ رضی اللہ عنہا کے پاس تشریف لے گئے اور ان سے فرمایا: اے سارہ! میرے اور تیرے سوا اس سرزمین میں کوئی مومن نہیں ہے، اس ظالم بادشاہ نے مجھ سے پوچھا تھا تو میں نے اسے بتایا کہ تو میری بہن ہے، لہٰذا تو نے مجھے جھٹلانا نہیں۔ اس دوران میں اس ظالم نے حضرت سارہ رضی اللہ عنہا کی طرف آدمی بھیجا، جب وہ اس کے پاس گئیں تو اس نے اپنے ہاتھ سے حضرت سارہ رضی اللہ عنہا کو پکڑنا چاہا تو وہ زمین میں دھنس گیا، اس نے حضرت سارہ رضی اللہ عنہا سے کہا: میرے لیے اللہ سے دعا کرو، میں تجھے کوئی تکلیف نہیں پہنچاؤں گا۔ حضرت سارہ رضی اللہ عنہا نے اللہ سے دعا کی تو اسے نجات مل گئی۔ اس نے دوبارہ حضرت سارہ رضی اللہ عنہا کو پکڑنا چاہا تو پہلے سے زیادہ گرفت میں آگیا، اس نے حضرت سارہ رضی اللہ عنہا سے کہا: میرے لیے اللہ سے دعا کرو، میں تمہیں کوئی بھی نقصان نہیں پہنچاؤں گا۔ چنانچہ انہوں نے دعا کی تو اس کی خلاصی ہو گئی۔ پھر اس نے اپنے خادم کو بلایا اور کہا: تم میرے پاس انسان نہیں بلکہ کوئی شیطان لائے ہو اور حضرت سارہ رضی اللہ عنہا کو بطور خدمت حضرت ہاجرہ رضی اللہ عنہا دے کر واپس بھیج دیا۔ وہ (حضرت سارہ رضی اللہ عنہا ان) حضرت ابراہیم علیہ السلام کے پاس واپس آئیں تو آپ کھڑے نماز پڑھ رہے تھے، انہوں نے ہاتھ سے اشارہ کر کے پوچھا: تمہارا حال کیسا رہا؟ حضرت سارہ رضی اللہ عنہا نے بتایا کہ اللہ تعالیٰ نے کافر یا فاجر کی تدبیر کو الٹا اس کے خلاف کر دیا اور اس نے خدمت کے لیے حضرت ہاجرہ رضی اللہ عنہا بھی دی ہے۔“ حضرت ابوہریرہ رضی اللہ عنہ نے فرمایا: اے آسمانی پانی کی اولاد! تمہاری والدہ یہی حضرت ہاجرہ رضی اللہ عنہا ہیں۔ [صحيح البخاري/كتاب أحاديث الأنبياء/حدیث: 3358]

حضرت ام شریک رضی اللہ عنہا سے روایت ہے کہ رسول اللہ صلی اللہ علیہ وسلم نے چھپکلی کو مار ڈالنے کا حکم دیا تھا کیونکہ ”وہ حضرت ابراہیم علیہ السلام پر پھونکیں مار مار کر آگ تیز کرتی تھی۔“ [صحيح البخاري/كتاب أحاديث الأنبياء/حدیث: 3359]

حضرت عبداللہ بن مسعود رضی اللہ عنہ سے روایت ہے کہ جب درج ذیل آیت کریمہ ﴿الَّذِينَ آمَنُوا وَلَمْ يَلْبِسُوا إِيمَانَهُمْ بِظُلْمٍ أُولَئِكَ لَهُمُ الْأَمْنُ﴾ [سورة الأنعام: 82] ”جو لوگ ایمان لائے اور اپنے ایمان کو ظلم سے آلودہ نہ کیا تو ان کے لیے امن و سلامتی ہے“ نازل ہوئی تو ہم نے عرض کیا: اے اللہ کے رسول صلی اللہ علیہ وسلم ! ہم میں سے کون سا شخص ہے جس نے اپنے آپ پر ظلم نہیں کیا؟ تو آپ صلی اللہ علیہ وسلم نے فرمایا: ”ایسا نہیں جیسا تم نے سمجھ لیا ہے۔ اس آیت سے مراد یہ ہے کہ انہوں نے اپنے ایمان کو شرک سے آلودہ نہ کیا ہو۔ کیا تم نے نہیں سنا کہ حضرت لقمان نے اپنے بیٹے سے کہا تھا: ﴿يَا بُنَيَّ لَا تُشْرِكْ بِاللَّهِ إِنَّ الشِّرْكَ لَظُلْمٌ عَظِيمٌ﴾ [سورة لقمان: 13] ”اے لخت جگر! اللہ کے ساتھ کسی کو شریک نہ بناؤ کیونکہ شرک بہت بڑا ظلم ہے۔“” [صحيح البخاري/كتاب أحاديث الأنبياء/حدیث: 3360]

حضرت ابو ہریرہ رضی اللہ عنہ سے روایت ہے، انہوں نے کہا: نبی صلی اللہ علیہ وسلم کی خدمت میں ایک مرتبہ گوشت پیش کیا گیا تو آپ نے فرمایا: ”اللہ تعالیٰ قیامت کے دن پہلے اور پچھلے لوگوں کو ایک ہموار اور وسیع میدان میں جمع کرے گا، اس طرح کہ پکارنے والا سب کو اپنی بات سنا سکے گا اور دیکھنے والا سب کو ایک ساتھ دیکھ سکے گا اور سورج لوگوں کے بالکل قریب ہو گا۔“ پھر آپ نے پوری حدیثِ شفاعت کا ذکر کیا (اور فرمایا:) ”لوگ حضرت ابراہیم علیہ السلام کی خدمت میں حاضر ہوں گے اور عرض کریں گے کہ آپ روئے زمین پر اللہ کے نبی اور اس کے خلیل تھے، ہمارے لیے اپنے رب کے حضور سفارش کریں تو انہیں اپنی خلافِ واقعہ باتیں یاد آجائیں گی تو وہ فرمائیں گے: آج تو مجھے اپنی فکر ہے، تم لوگ حضرت موسیٰ علیہ السلام کے پاس جاؤ۔“ حضرت انس رضی اللہ عنہ نے نبی صلی اللہ علیہ وسلم سے یہ حدیث بیان کرنے میں حضرت ابو ہریرہ رضی اللہ عنہ کی متابعت کی ہے۔ [صحيح البخاري/كتاب أحاديث الأنبياء/حدیث: 3361]

حضرت ابن عباس رضی اللہ عنہما سے روایت ہے کہ نبی صلی اللہ علیہ وسلم بیان کرتے ہیں کہ آپ صلی اللہ علیہ وسلم نے فرمایا: ”اللہ تعالیٰ حضرت اسماعیل علیہ السلام کی والدہ ماجدہ پر رحم فرمائے! اگر انہوں نے جلدی نہ کی ہوتی تو آج زمزم ایک بہتا ہوا چشمہ ہوتا۔“ [صحيح البخاري/كتاب أحاديث الأنبياء/حدیث: 3362]

حضرت کثیر بن کثیر رحمہ اللہ سے روایت ہے، انہوں نے بیان کیا کہ میں اور عثمان بن ابی سلیمان رحمہ اللہ دونوں حضرت سعید بن جبیر رحمہ اللہ کے ساتھ بیٹھے ہوئے تھے، انہوں نے کہا کہ حضرت عبداللہ بن عباس رضی اللہ عنہما نے مجھ سے اس طرح حدیث بیان نہیں کی تھی بلکہ انہوں نے فرمایا: حضرت ابراہیم علیہ السلام اپنے بیٹے حضرت اسماعیل علیہ السلام اور ان کی والدہ کو لے کر آئے، جبکہ وہ ان کو دودھ پلایا کرتی تھیں، ان کے پاس ایک چھوٹی سی پرانی مشک تھی۔ حضرت عبداللہ بن عباس رضی اللہ عنہما نے اس حدیث کو مرفوع بیان نہیں کیا۔ بہر حال اس حدیث میں ہے کہ حضرت ابراہیم علیہ السلام اپنی بیوی حضرت ہاجرہ رضی اللہ عنہا کو ان کے بیٹے حضرت اسماعیل علیہ السلام سمیت یہاں لے آئے۔ [صحيح البخاري/كتاب أحاديث الأنبياء/حدیث: 3363]