سیدنا عبداللہ (ابن مسعود) رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”مومن نہ تو طعنے دینے والا ہوتا ہے اور نہ لعنتیں کرنے والا، نہ فحش کلامی کرنے والا ہوتا ہے اور نہ گالی گلوچ کرنے والا۔“ [صحيح الادب المفرد/حدیث: 237]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”دو رخے آدمی کے لائق نہیں ہے کہ وہ امانت دار ہو۔“ [صحيح الادب المفرد/حدیث: 238]

سیدنا عبداللہ (ابن مسعود) رضی اللہ عنہ سے روایت ہے کہ انہوں نے کہا: مومن کے اخلاق میں سے سب سے زیادہ قابل ملامت بیہودہ گوئی ہے۔ [صحيح الادب المفرد/حدیث: 239]

سیدنا ابودرداء رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے فرمایا: ”لعنت کرنے والے قیامت کے دن نہ گواہ بنیں گے اور نہ سفارشی بنیں گے۔“ [صحيح الادب المفرد/حدیث: 240]

سیدنا ابوہریرہ رضی اللہ عنہ نے کہا کہ نبی صلی اللہ علیہ وسلم نے فرمایا: ”صدیق کے لائق نہیں ہے کہ وہ لعنت کرنے والا ہو۔“ [صحيح الادب المفرد/حدیث: 241]

سیدنا حذیفہ رضی اللہ عنہ سے مروی ہے کہ انہوں نے کہا کہ جب بھی کوئی قوم لعنت کرتی ہے تو اسی پر لعنت عائد ہو جاتی ہے۔ [صحيح الادب المفرد/حدیث: 242]

سیدہ عائشہ رضی اللہ عنہا سے روایت ہے کہ سیدنا ابوبکر رضی اللہ عنہ نے اپنے کسی غلام پر لعنت کر دی تو نبی صلی اللہ علیہ وسلم نے فرمایا: ”اے ابوبکر! لعنت کرنے والے بھی اور صدیق بھی؟ ہر گز نہیں“، رب کعبہ کی قسم! آپ صلی اللہ علیہ وسلم نے یہ دو یا تین مرتبہ فرمایا۔ اس پر سیدنا ابوبکر رضی اللہ عنہ نے اپنے کسی غلام کو اس دن آزاد کر دیا، اور اس کے بعد نبی صلی اللہ علیہ وسلم کی خدمات میں حاضر ہو کر کہا: میں دوبارہ ایسا نہیں کروں گا۔ [صحيح الادب المفرد/حدیث: 243]

سیدنا ابوہریرہ رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم سے عرض کیا گیا: یا رسول اللہ! مشرکین کے خلاف بددعا کیجئے۔ فرمایا: ”مجھے لعنت کرنے والا بنا کر نہیں بھیجا گیا ہے بلکہ میں تو رحمت بنا کر بھیجا گیا ہوں۔“ [صحيح الادب المفرد/حدیث: 244]

ہمام سے مروی ہے کہ ہم لوگ حذیفہ کے ساتھ تھے، حذیفہ سے کہا گیا کہ ایک آدمی لوگوں کی باتیں سیدنا عثمان رضی اللہ عنہ تک پہنچاتا ہے۔ تو حذیفہ نے کہا کہ میں نے نبی صلی اللہ علیہ وسلم سے سنا ہے آپ صلی اللہ علیہ وسلم فرماتے تھے: ”چغل خور جنت میں داخل نہیں ہو گا۔“ [صحيح الادب المفرد/حدیث: 245]

سیدہ اسماء بنت یزید رضی اللہ عنہا سے روایت ہے انہوں نے کہا کہ نبی صلی اللہ علیہ وسلم نے فرمایا: ”کیا میں تم کو یہ نہ بتاؤں کہ تم میں سے سب سے افضل لوگ کون ہیں؟“ لوگوں نے عرض کیا: جی ہاں، فرمایا: ”وہ لوگ جنھیں دیکھ کر اللہ یاد آ جائے۔“ فرمایا: ”کیا میں تمہیں نہ بتاؤں تم میں سے برے کون ہیں؟“ لوگوں نے کہا: جی ہاں۔ فرمایا: ”چغل خوری کرنے والے، دوستوں میں فساد پھیلانے والے، بری الذمہ لوگوں میں عیب نکالنے والے (گناہوں کے متلاشی)۔“ [صحيح الادب المفرد/حدیث: 246]