سیدنا مغیرہ رضی اللہ عنہ کے کاتب وراد بیان کرتے ہیں کہ سیدنا معاویہ رضی اللہ عنہ نے سیدنا مغیرہ بن شعبہ رضی اللہ عنہ کو خط لکھا: مجھے ایسی چیز لکھ کر بھیجیں جو آپ نے رسول اللہ صلی اللہ علیہ وسلم سے سنی ہو۔ تو سیدنا مغیرہ رضی اللہ عنہ نے انہیں لکھ بھیجا۔ (اور ایک روایت میں ہے، وزاد نے کہا: انہوں نے مجھے لکھوایا اور میں نے اپنے ہاتھ سے لکھا۔) بیشک رسول اللہ صلی اللہ علیہ وسلم (اور دوسری روایت میں ہے میں نے آپ صلی اللہ علیہ وسلم سے سنا آپ صلی اللہ علیہ وسلم ) «قيل و قال» (فضول باتوں) سے، مال کو ضائع کرنے سے، زیادہ سوال کرنے سے، (لوگوں کے حقوق) روکنے اور ناجائز مانگنے سے (جس کا حق نہیں بنتا اس کو طلب کرنا یعنی ناجائز مطالبے کرنا)، ماؤں کی نافرمانی سے اور لڑکیوں کو زندہ دفن کرنے سے منع کرتے تھے۔ [صحيح الادب المفرد/حدیث: 228]

سیدنا عمرو بن عاص رضی اللہ عنہ کہتے ہیں کہ نبی صلی اللہ علیہ وسلم نے میرے پاس پیغام بھیجا تو مجھے حکم دیا کہ میں پورا لباس زیب تن کر کے اور ہتھیار پہن کر آپ کے پاس آؤں، چنانچہ میں نے تعمیل کی اور جب میں آپ صلی اللہ علیہ وسلم کے پاس آیا اس وقت آپ صلی اللہ علیہ وسلم وضو فرما رہے تھے۔ آپ صلی اللہ علیہ وسلم نے میری طرف نظر اٹھائی اور پھر نظر کو جھکا لیا۔ اس کے بعد فرمایا: ”اے عمرو! میں چاہتا ہوں کہ تمہیں ایک لشکر کا سردار بنا کر بھیجوں تو اللہ تمہیں مال غنیمت عطا فرمائے گا اور میں تیرے لیے تیرے حلال مال میں رغبت رکھتا ہوں“، میں نے عرض کیا: یا رسول اللہ! میں مال کی طلب میں اسلام نہیں لایا ہوں۔ میں تو اسلام کی طلب میں مسلمان ہوا ہوں کہ میں رسول اللہ صلی اللہ علیہ وسلم کے ساتھ رہوں گا۔ فرمایا: ”اے عمرو! نیک آدمی کے لیے رزق حلال بہت ہی اچھا ہے۔“ [صحيح الادب المفرد/حدیث: 229]

سیدنا عبیداللہ بن محصن انصاری رضی اللہ عنہ نبی صلی اللہ علیہ وسلم سے روایت کرتے ہیں آپ صلی اللہ علیہ وسلم نے فرمایا: ”جس نے اس حال میں صبح کی کہ اس کا نفس امن والا ہو، اور اسے جسم میں بیماریوں سے بچایا گیا ہو، اور اس کے پاس ایک دن کا کھانا ہو، تو گویا اس کے لیے پوری دنیا کو جمع کر دیا گیا۔“ [صحيح الادب المفرد/حدیث: 230]

عبداللہ بن خبیب جہنی اپنے چچا سے روایت کرتے ہیں کہ رسول اللہ صلی اللہ علیہ وسلم ان کے پاس تشریف لائے تو آپ پر نہانے کی نشانات تھے اور آپ بہت ہی خوش خوش تھے۔ ہم نے گمان کیا کہ آپ صلی اللہ علیہ وسلم اپنے اہل کے پاس گئے۔ تو ہم نے کہا: یا رسول اللہ! ہم آپ کو بہت خوش طبیعت دیکھتے ہیں؟ پھر جب دولت کا ذکر کیا گیا تو رسول اللہ صلی اللہ علیہ وسلم نے فرمایا: ”جو آدمی پرہیزگار ہو اس کے لیے دولت کا ہونا کوئی گناہ نہیں اور جو آدمی پرہیزگار ہو اس کے لیے تندرستی دولت سے بہتر ہے اور خوش طبیعت ہونا بھی اللہ کی نعمتوں میں سے ہے۔“ [صحيح الادب المفرد/حدیث: 231]

سیدنا انس رضی اللہ عنہ سے مروی ہے انہوں نے کہا کہ نبی صلی اللہ علیہ وسلم سب لوگوں سے زیادہ حسین، سب سے بڑھ کر سخی اور سب سے زیادہ بہادر تھے۔ ایک رات مدینہ والے خوفزدہ ہو گئے تو لوگ (جدھر سے شور بلند ہوا اس) آواز کی طرف چلے، نبی صلی اللہ علیہ وسلم ان کے سامنے سے آ رہے تھے وہ آواز کی طرف سبقت لے گئے۔ آپ صلی اللہ علیہ وسلم فرماتے جاتے تھے: ”گھبراؤ نہیں، گھبراؤ نہیں۔“ آپ صلی اللہ علیہ وسلم اس وقت ابوطلحہ کے گھوڑے پر بغیر زین ہی کھلی پیٹھ پر سوار تھے۔ آپ صلی اللہ علیہ وسلم کی گردن میں تلوار لٹک رہی تھی۔ تو فرمایا: ”میں نے اس کو سمندر پایا، یا کہا کہ بیشک یہ سمندر کی طرح ہے (یعنی برق رفتار ہے)۔“ [صحيح الادب المفرد/حدیث: 232]

سیدنا جابر رضی اللہ عنہ سے مروی ہے، انہوں نے کہا کہ رسول اللہ صلی اللہ علیہ وسلم نے فرمایا: ”ہر نیکی صدقہ ہے اور نیکی میں سے یہ بھی ہے کہ تم اپنے بھائی سے خندہ پیشانی سے ملو، اور اپنے ڈول سے اپنے بھائی کے برتن میں (پانی) انڈیل دو۔“ [صحيح الادب المفرد/حدیث: 233]

یزید بن بابنوس سے روایت کہ ہم سیدہ عائشہ رضی اللہ عنہا کے پاس گئے ہم نے پوچھا: اے ام المؤمنین! رسول اللہ صلی اللہ علیہ وسلم کا اخلاق کیا تھا؟ عائشہ رضی اللہ عنہا نے کہا: آپ صلی اللہ علیہ وسلم کا اخلاق قرآن تھا۔ [صحيح الادب المفرد/حدیث: 234]

سالم بن عبداللہ سے مروی ہے، انہوں نے کہا: میں نے سیدنا عبداللہ (ابن عمر) رضی اللہ عنہما کو انسان تو کیا کسی چیز پر لعنت کرتے نہیں سنا۔ سالم کہتے ہیں کہ سیدنا عبداللہ بن عمر رضی اللہ عنہما نے بیان کیا کہ رسول اللہ صلی اللہ علیہ وسلم نے فرمایا: ”کسی مومن کے شایان شان نہیں ہے کہ وہ لعنت کرنے والا ہو۔“ [صحيح الادب المفرد/حدیث: 235]

سیدہ عائشہ رضی اللہ عنہا سے مروی ہے کہ یہودی آپ صلی اللہ علیہ وسلم کے پاس آئے اور انہوں نے «السام عليكم» (تم پر تباہی آئے) کہا:۔ اس پر سیدہ عائشہ رضی اللہ عنہا نے کہا: اور تم پر بھی تباہی، اور اللہ تم پر لعنت کرے، اور اللہ کا غضب تم پر ہو۔ اس پر آپ صلی اللہ علیہ وسلم نے فرمایا: ”ٹھہرو عائشہ! تمہیں نرمی اختیار کرنی چاہئے، سختی اور فحش کلامی سے پرہیز کرو۔“ عائشہ رضی اللہ عنہا نے کہا: کیا آپ نے سنا نہیں جو ان لوگوں نے کہا:؟ آپ صلی اللہ علیہ وسلم نے فرمایا: ”اور کیا تم نے نہیں سنا جو میں نے کہا:؟ میں نے ان پر لوٹا دیا ہے میری بات تو ان کے حق میں قبول ہو جائے گی اور ان کی بددعا میرے حق میں قبول نہ ہو گی۔“ [صحيح الادب المفرد/حدیث: 236]