سیدہ عائشہ رضی اللہ عنہا سے مروی انہوں نے کہا: رسول اللہ صلی اللہ علیہ وسلم کو جب کبھی دو کاموں میں سے کسی ایک کے اختیار کرنے کا موقع دیا گیا تو آپ صلی اللہ علیہ وسلم نے ان دونوں میں سے جو زیادہ آسان تھا اسے اختیار کیا بشرطیکہ وہ گناہ نہ ہو۔ اور اگر وہ گناہ ہوتا تو پھر آپ صلی اللہ علیہ وسلم تمام لوگوں سے زیادہ اس سے دور ہوتے تھے اور رسول اللہ صلی اللہ علیہ وسلم نے اپنی ذات کے لئے تو کبھی انتقام نہیں لیا، مگر یہ کہ اللہ تعالیٰ کی کسی حرمت کو چاک کیا جائے تو آپ اللہ عزوجل کے لیے اس کا انتقام لیتے تھے۔ [صحيح الادب المفرد/حدیث: 208]

سیدنا عبدللہ رضی اللہ عنہ سے مروی ہے انہوں نے کہا: بیشک اللہ تعالیٰ نے تمہارے درمیان اخلاق کی یوں تقسیم کی ہے جیسے تمہارے درمیان رزق کی تقسیم کی ہے اور اللہ تعالیٰ انہیں بھی مال دیتا ہے جن سے محبت کرتا ہے اور (انہیں بھی) جن سے محبت نہیں کرتا اخلاق کو بھی تمہارے مابین تقسیم فرمایا جیسے تمہارے رزق کو تقسیم کیا، اور ایمان صرف ان کو دیتا ہے جن سے محبت کرتا ہے، جو مال کو خرچ کرنے میں بخیلی سے کام لے اور دشمن سے جہاد کرنے سے ڈرے اور رات کی مشقت جھیلنے سے ڈرے تو اسے چاہیے کثرت سے یہ کلمات پڑھا کرے: ل «اَ إِلَهَ إِلاَّ اللَّهُ، وَسُبْحَانَ اللهِ، وَالْحَمْدُ لِلَّهِ، وَاللَّهُ أَكْبَرُ» ‏۔ ‏ [صحيح الادب المفرد/حدیث: 209]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”غنا زیادہ سامان کی وجہ سے نہیں ہوتا لیکن اصلی غنا، دل کا غنی ہونا ہوتا ہے۔“ [صحيح الادب المفرد/حدیث: 210]

سیدنا انس رضی اللہ عنہ سے روایت ہے، انہوں نے کہا کہ میں نے دس سال تک نبی صلی اللہ علیہ وسلم کی خدمت کی ہے لیکن آپ صلی اللہ علیہ وسلم نے کبھی بھی مجھے اف تک نہ کہا اور جو چیز میں نے نہ کی اس کے متعلق کبھی نہ کہا کہ تم نے کیوں نہ کیا؟ اور جو کام میں نے کر لیا اس کے متعلق یہ نہیں فرمایا تم نے یہ کیوں کیا؟ [صحيح الادب المفرد/حدیث: 211]

سیدنا انس بن مالک رضی اللہ عنہ کہتے ہیں کہ نبی صلی اللہ علیہ وسلم بڑے رحم دل تھے۔ جب کوئی آپ صلی اللہ علیہ وسلم کے پاس (اپنی ضرورت کے لیے) آتا تو آپ صلی اللہ علیہ وسلم اس سے وعدہ کر لیتے اور اسے پورا کرتے، بشرطیکہ آپ صلی اللہ علیہ وسلم کے پاس ہوتا۔ (ایک بار) نماز کی اقامت کہی گئی اور ایک اعرابی آپ صلی اللہ علیہ وسلم کے پاس آیا اور آپ کا کپڑا پکڑ لیا اور کہا: میری ایک تھوڑی سی ضرورت باقی رہ گئی ہے، مجھے ڈر ہے کہ کہیں میں اسے بھول نہ جاؤں۔ آپ صلی اللہ علیہ وسلم اسکے ساتھ چلے گئے یہاں تک کہ اس کی ضرورت پوری کر دی اور اس کے بعد آ کر نماز پڑھائی۔ [صحيح الادب المفرد/حدیث: 212]

سیدنا جابر رضی اللہ عنہ سے روایت ہے کہ نبی صلی اللہ علیہ وسلم نے کسی سوال کے جواب میں ”نہیں“ کبھی نہیں فرمایا۔ [صحيح الادب المفرد/حدیث: 213]

سیدنا عبداللہ بن زبیر رضی اللہ عنہ سے روایت ہے، انہوں نے کہا: میں نے کوئی دو عورتیں ایسی نہیں دیکھیں جو سیدہ اسماء رضی اللہ عنہا اور سیدہ عائشہ رضی اللہ عنہا سے زیادہ سخاوت کرنے والی ہوں۔ ان کی سخاوت کا حال مختلف تھا۔ سیدہ عائشہ رضی اللہ عنہا مال کو جمع کرتی رہتی تھیں، جب ان کے پاس کچھ مال جمع ہو جاتا تو تقسیم کر دیا کرتی تھیں، اور اسماء رضی اللہ عنہا کا طریقہ یہ تھا کہ وہ کل کے لئے کچھ اٹھا نہیں رکھتی تھیں (یعنی روز کا روز خرچ کر دیتی تھیں)۔ [صحيح الادب المفرد/حدیث: 214]

سیدنا ابوہریرہ رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”اللہ کے راستے میں پڑنے والی دھول اور جہنم کا دھواں کسی بندے کے پیٹ میں کبھی بھی اکھٹے نہیں ہو ں گے۔ اور (اسی طرح) کسی بندے کے دل میں کنجوسی اور ایمان کبھی بھی جمع نہیں ہو سکتے۔“ [صحيح الادب المفرد/حدیث: 215]

عبداللہ بن ربیعہ سے مروی ہے کہتے ہیں، ہم سیدنا عبداللہ بن مسعود رضی اللہ عنہ کے پاس بیٹھے تھے، تو انہوں نے ایک آدمی کا ذکر کیا اور اس کے اخلاق و عادات بیان کیے۔ عبدللہ نے کہا: بتاؤ اگر تم اس شخص کا سر قلم کر دو تو کیا تم پھر اسے جوڑ بھی سکو گے؟ لوگوں نے کہا: نہیں۔ کہا: اچھا اگر اس کے ہاتھ کاٹ دو تو؟ لوگوں نے کہا: نہیں۔ کہا: اور اس کا پیٹ؟ لوگوں نے کہا: نہیں۔ انہوں نے کہا: پھر تم اس کی عادات بھی تب تک تبدیل نہیں کر سکتے یہاں تک کہ اس کی جسمانی ساخت کو تبدیل نہ کر دو۔ بیشک نطفہ رحم میں چالیس دنوں تک ٹھہرتا ہے، پھر خون بن کر نیچے اترتا ہے، پھر جما ہوا خون بن جاتا ہے، پھر گوشت کا ٹکڑا بن جاتا ہے، پھر اللہ ایک فرشتہ بھیج دیتا ہے تو وہ اس کا رزق، اس کا اخلاق اور (اس كا) خوش نصیب ہونا یا بد نصیب ہونا لکھ دیتا ہے۔ [صحيح الادب المفرد/حدیث: 216]

سیدنا ابوہریرہ رضی اللہ عنہ سے مروی ہے، انہوں نے کہا: رسول اللہ صلی اللہ علیہ وسلم نے فرمایا: ”بیشک آدمی اخلاق حسنہ کے سبب رات کو قیام کرنے والے کا مقام حاصل کر لیتا ہے۔“ [صحيح الادب المفرد/حدیث: 217]