سیدنا ابن عباس رضی اللہ عنہما سے مروی ہے انہوں نے کہا: نعمتوں کی ناشکری کی جاتی ہے، اور رشتہ داریاں توڑی جاتی ہیں اور ہم نے دلوں کی قربت کے مثل کوئی چیز نہیں دیکھی۔ [صحيح الادب المفرد/حدیث: 198]

سیدنا انس بن مالک رضی اللہ عنہ سے مروی ہے انہوں نے کہا: نبی صلی اللہ علیہ وسلم اپنی کسی اہلیہ کے پاس تشریف لائے تو ان کے پاس ام سلیم بھی تھیں۔ اور ایک دوسری سند میں ہے: براء بن مالک مردوں کے ساتھ حدی خوانی کر رہا تھا اور انجشہ عورتوں کے ساتھ حدی خوانی کر رہا تھا، اور انجشہ خوش آواز تھے۔ تو نبی صلی اللہ علیہ وسلم نے فرمایا:”اے انجشہ! ان بوتلوں کو نرمی کے ساتھ چلاؤ۔“ ابوقلابہ نے کہا: نبی صلی اللہ علیہ وسلم نے ایسا لفظ بولا: اگر تم میں سے کوئی آدمی بولتا تو تم اس پر عیب لگاتے۔ آپ صلی اللہ علیہ وسلم کے یہ الفاظ: ”شیشے کی بنی ہوئی بوتلوں کو ہانکنا اور چلانا۔“ (حدی خوانی: اونٹوں کو تیز چلانے کے لیے ایک ترانہ گایا جاتا ہے۔) [صحيح الادب المفرد/حدیث: 199]

سیدنا ابوہریرہ رضی اللہ عنہ سے مروی ہے کہ لوگوں عرض کیا: یا رسول اللہ! آپ تو ہم سے مزاح بھی کرتے ہیں؟ آپ صلی اللہ علیہ وسلم نے فرمایا: ”بیشک میں حق کے سوا کچھ نہیں کہتا۔“ [صحيح الادب المفرد/حدیث: 200]

بکر بن عبداللہ سے مروی ہے کہ انہوں نے کہا: نبی صلی اللہ علیہ وسلم کے صحابہ ایک دوسرے پر(مزاح کرتے ہوئے) تربوز (کے ٹکڑے) پھینکتے تھے مگر جب حقائق کا سامنا ہوتا تھا تو پھر وہ مرد میدان ہوتے۔ [صحيح الادب المفرد/حدیث: 201]

سیدنا انس بن ملک رضی اللہ عنہ سے مروی ہے انہوں نے کہا: ایک شخص نبی صلی اللہ علیہ وسلم کی خدمت میں حاضر ہوا۔ اس نے آپ صلی اللہ علیہ وسلم سے سواری کی درخواست کی تو آپ صلی اللہ علیہ وسلم نے فرمایا: ”میں تو تمہیں اونٹنی کے بچے پر سوار کروں گا۔“ اس نے عرض کیا: یا رسول اللہ! اونٹنی کے بچے کا میں کیا کروں گا؟ اس پر رسول اللہ صلی اللہ علیہ وسلم نے فرمایا: ”اور اونٹوں کو اونٹنیاں ہی جنم دیتی ہیں۔“ [صحيح الادب المفرد/حدیث: 202]

سیدنا انس بن مالک رضی اللہ عنہ کہتے ہیں: بیشک نبی صلی اللہ علیہ وسلم ہم میں گھل مل جاتے تھے۔ یہاں تک کہ میرے چھوٹے بھائی سے کہتے: اے ابوعمیر! بلبل نے کیا کِیا۔ [صحيح الادب المفرد/حدیث: 203]

سیدنا ابودرداء رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”ترازو میں حسن اخلاق سے زیادہ وزنی اور کوئی چیز نہیں۔“ [صحيح الادب المفرد/حدیث: 204]

سیدنا عبدللہ بن عمرو رضی اللہ عنہ سے روایت ہے انہوں نے کہا: نبی صلی اللہ علیہ وسلم نہ فحش گوئی کرنے والے تھے نہ تکلف سے فحش کلامی کرنے والے تھے اور آپ صلی اللہ علیہ وسلم فرماتے تھے: ”تم میں سے بہترین لوگ وہ ہیں جو اخلاق میں سب سے اچھے ہیں۔“ [صحيح الادب المفرد/حدیث: 205]

عمرو بن شعیب اپنے والد اور وہ اپنے دادا سے روایت کرتے ہیں کہ انہوں نے نبی صلی اللہ علیہ وسلم کو فرماتے ہوئے سنا: ”میں تمہیں بتا دیتا ہوں کہ تم میں سے کون مجھے سب سے زیادہ عزیز ہے اور کس کا مقام قیامت کے دن مجھ سے قریب ترین ہو گا؟“ تمام لوگ اس پر خاموش رہے۔ آپ صلی اللہ علیہ وسلم نے دو یا تین بار ا س بات کو دہرایا، لوگوں نے عرض کیا: جی ہاں یا رسول اللہ۔ فرمایا: ”تم میں جس کے اخلاق سب سے اچھے ہوں۔“ [صحيح الادب المفرد/حدیث: 206]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”مجھے اس لیے بھیجا گیا ہے تاکہ میں اخلاق حسنہ کی تکمیل کروں۔“ [صحيح الادب المفرد/حدیث: 207]