ابن عباس رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم اپنی نماز ( «بِسْمِ اللَّهِ الرَّحْمَنِ الرَّحِيمِ» ”بسم اللہ الرحمن الرحیم“) سے شروع کیا کرتے تھے۔ ترمذی، اور انہوں نے فرمایا: اس حدیث کی سند قوی نہیں۔ حسن، رواہ الترمذی۔ [مشكوة المصابيح/كتاب الصلاة/حدیث: 844]

وائل بن حجر رضی اللہ عنہ بیان کرتے ہیں، میں نے رسول اللہ صلی ‌اللہ ‌علیہ ‌وآلہ ‌وسلم کو سنا کہ آپ نے ﴿غَيْرِ الْمَغْضُوبِ عَلَيْهِمْ وَلَا الضَّالِّينَ﴾ [سورة الفاتحة: 7] پڑھا تو بلند آواز سے «آمِيْن» ”آمین“ کہا۔ (صحیح، رواہ الترمذی و ابوداؤد و الدارمی و ابن ماجہ) [مشكوة المصابيح/كتاب الصلاة/حدیث: 845]

ابوزہیر نمیری رضی اللہ عنہ بیان کرتے ہیں، ہم ایک رات رسول اللہ صلی ‌اللہ ‌علیہ ‌وآلہ ‌وسلم کے ساتھ نکلے تو ہم ایک آدمی کے پاس سے گزرے جو بڑی عاجزی کے ساتھ اللہ سے دعا کر رہا تھا، نبی صلی ‌اللہ ‌علیہ ‌وآلہ ‌وسلم نے فرمایا: ”اگر اس نے دعا ختم کی تو (جنت و مغفرت) واجب کر لی۔“ لوگوں میں سے کسی آدمی نے عرض کیا: وہ کس چیز کے ساتھ ختم کرے؟ فرمایا: ” «آمِيْن» کے ساتھ۔“ ضعیف۔ [مشكوة المصابيح/كتاب الصلاة/حدیث: 846]

عائشہ رضی اللہ عنہا بیان کرتی ہیں کہ رسول اللہ صلی ‌اللہ ‌علیہ ‌وآلہ ‌وسلم نے نمازِ مغرب کی دو رکعتوں میں سورۂ اعراف تلاوت فرمائی۔ (صحیح، رواہ النسائی) [مشكوة المصابيح/كتاب الصلاة/حدیث: 847]

عقبہ بن عامر رضی اللہ عنہ بیان کرتے ہیں، میں دورانِ سفر رسول اللہ صلی ‌اللہ ‌علیہ ‌وآلہ ‌وسلم کی اونٹنی کی مہار تھام کر آگے آگے چلا کرتا تھا، آپ صلی ‌اللہ ‌علیہ ‌وآلہ ‌وسلم نے فرمایا: ”عقبہ! کیا میں تمہیں پڑھی جانے والی دو بہترین سورتیں نہ سکھاؤں؟“ آپ نے سورۃ الفلق اور سورۃ الناس مجھے سکھائیں، راوی بیان کرتے ہیں، آپ صلی ‌اللہ ‌علیہ ‌وآلہ ‌وسلم نے ان سورتوں کی وجہ سے مجھے زیادہ خوش نہ دیکھا، پس جب آپ نمازِ صبح کے لیے تشریف لائے تو آپ نے نمازِ فجر پڑھاتے ہوئے یہی دو سورتیں تلاوت فرمائیں، جب نماز سے فارغ ہوئے تو میری طرف توجہ کرتے ہوئے فرمایا: ”عقبہ! تم نے (ان سورتوں کی عظمت کو) کیسے دیکھا؟“ اسنادہ حسن، رواہ احمد و ابوداؤد و النسائی۔ [مشكوة المصابيح/كتاب الصلاة/حدیث: 848]

جابر بن سمرہ رضی اللہ عنہ بیان کرتے ہیں کہ نبی صلی ‌اللہ ‌علیہ ‌وآلہ ‌وسلم جمعہ کی رات نماز مغرب میں سورۃ الکافرون اور سورۃ الاخلاص تلاوت کیا کرتے تھے۔ (ضعیف)۔ [مشكوة المصابيح/كتاب الصلاة/حدیث: 849]

ابن ماجہ نے اسے ابن عمر رضی اللہ عنہما سے روایت کیا ہے، لیکن انہوں نے جمعہ کی رات کا ذکر نہیں کیا۔ ضعیف۔ [مشكوة المصابيح/كتاب الصلاة/حدیث: 850]

عبداللہ بن مسعود رضی اللہ عنہ بیان کرتے ہیں، میں نے رسول اللہ صلی ‌اللہ ‌علیہ ‌وآلہ ‌وسلم کو مغرب کے بعد دو رکعتوں میں اور فجر سے پہلے دو رکعتوں میں سورۃ الکافرون اور سورۃ الاخلاص اتنی مرتبہ پڑھتے ہوئے سنا کہ میں شمار نہیں کر سکتا۔ (ضعیف) [مشكوة المصابيح/كتاب الصلاة/حدیث: 851]

امام ابن ماجہ رحمہ اللہ نے ابوہریرہ رضی اللہ عنہ سے روایت کیا ہے، لیکن انہوں نے ”مغرب کے بعد“ کا ذکر نہیں کیا ہے۔ [صحیح] [مشكوة المصابيح/كتاب الصلاة/حدیث: 852]

سلیمان بن یسار رحمہ اللہ ابوہریرہ رضی اللہ عنہ سے روایت کرتے ہیں، انہوں نے فرمایا: میں نے فلاں شخص کے سوا کسی کے پیچھے ایسی نماز نہیں پڑھی جو رسول اللہ صلی ‌اللہ ‌علیہ ‌وآلہ ‌وسلم کی نماز کے بہت مشابہ ہو، سلیمان رحمہ اللہ بیان کرتے ہیں کہ میں نے اس (فلاں شخص) کے پیچھے نماز پڑھی تو وہ ظہر کی پہلی دو رکعتیں لمبی اور آخری دو رکعتیں ہلکی پڑھا کرتے تھے، اور نمازِ عصر ہلکی پڑھا کرتے تھے، جبکہ نمازِ مغرب میں قصارِ مفصل (سورۃ البینہ سے آخر تک)، عشاء میں اوساطِ مفصل (البروج سے البینہ تک) اور فجر میں طوالِ مفصل (سورۃ الحجرات سے البروج تک) پڑھا کرتے تھے۔ نسائی اور ابنِ ماجہ نے ”نمازِ عصر ہلکی پڑھا کرتے تھے“ تک روایت کیا ہے۔ صحیح۔ [مشكوة المصابيح/كتاب الصلاة/حدیث: 853]