ابوہریرہ رضی اللہ عنہ سے روایت ہے کسی آدمی نے روزہ دار کے لیے اپنی اہلیہ سے گلے ملنے کے بارے میں نبی صلی ‌اللہ ‌علیہ ‌وآلہ ‌وسلم سے مسئلہ دریافت کیا تو آپ نے اسے رخصت عنایت فرما دی، پھر ایک اور آدمی آیا اور اس نے آپ سے مسئلہ دریافت کیا تو آپ نے اسے روک دیا، جس شخص کو رخصت عنایت فرمائی تھی وہ بوڑھا آدمی تھا اور جسے روک دیا تھا وہ ایک نوجوان شخص تھا۔ اسنادہ حسن، رواہ ابوداؤد۔ [مشكوة المصابيح/كتاب الصوم/حدیث: 2006]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جس شخص کو روزے کی حالت میں قے آ جائے تو اس پر کوئی قضا نہیں اور جو شخص عمداً قے کرے تو وہ (روزہ کی) قضا کرے۔“ ترمذی، ابوداؤد، ابن ماجہ، دارمی اور امام ترمذی رحمہ اللہ نے فرمایا: یہ حدیث غریب ہے، ہم عیسیٰ بن یونس سے مروی حدیث کے حوالے سے ہی اسے جانتے ہیں، جبکہ محمد یعنی امام بخاری رحمہ اللہ نے فرمایا: میں اسے محفوظ نہیں سمجھتا۔ ضعیف۔ [مشكوة المصابيح/كتاب الصوم/حدیث: 2007]

معدان بن طلحہ سے روایت ہے کہ ابودرداء رضی اللہ عنہ نے انہیں حدیث بیان کی کہ ”رسول اللہ صلی ‌اللہ ‌علیہ ‌وآلہ ‌وسلم نے قے کی تو آپ صلی ‌اللہ ‌علیہ ‌وآلہ ‌وسلم نے روزہ افطار کر لیا“، راوی بیان کرتے ہیں، میں دمشق کی مسجد میں ثوبان رضی اللہ عنہ سے ملا تو میں نے کہا کہ ابودرداء رضی اللہ عنہ نے مجھے حدیث بیان کی ہے کہ ”رسول اللہ صلی ‌اللہ ‌علیہ ‌وآلہ ‌وسلم نے قے کی تو آپ صلی ‌اللہ ‌علیہ ‌وآلہ ‌وسلم نے روزہ افطار کر لیا“، انہوں نے کہا: انہوں (یعنی ابودرداء رضی اللہ عنہ) نے ٹھیک کہا ہے، اور میں نے آپ صلی ‌اللہ ‌علیہ ‌وآلہ ‌وسلم کے لیے آپ صلی ‌اللہ ‌علیہ ‌وآلہ ‌وسلم کے وضو کا پانی انڈیلا تھا۔ «إِسْنَادُهُ حَسَنٌ، رَوَاهُ أَبُو دَاوُدَ وَالتِّرْمِذِيُّ وَالدَّارِمِيُّ» ”اس کی سند حسن ہے، اسے ابوداؤد، ترمذی اور دارمی نے روایت کیا ہے“۔ [مشكوة المصابيح/كتاب الصوم/حدیث: 2008]

عامر بن ربیعہ رضی اللہ عنہ بیان کرتے ہیں، میں نے ان گنت مرتبہ نبی صلی ‌اللہ ‌علیہ ‌وآلہ ‌وسلم کو روزہ کی حالت میں مسواک کرتے ہوئے دیکھا ہے۔ ضعیف۔ [مشكوة المصابيح/كتاب الصوم/حدیث: 2009]

انس رضی اللہ عنہ بیان کرتے ہیں کہ ایک آدمی نبی صلی ‌اللہ ‌علیہ ‌وآلہ ‌وسلم کی خدمت میں حاضر ہوا تو اس نے عرض کیا: مجھے آشوبِ چشم ہے، کیا میں روزے کی حالت میں سرمہ ڈال لوں؟ آپ صلی ‌اللہ ‌علیہ ‌وآلہ ‌وسلم نے فرمایا: ”ہاں“۔ امام ترمذی رحمہ اللہ نے فرمایا: اس کی اسناد قوی نہیں، ابوعاتکہ راوی ضعیف ہے۔ (ضعیف)۔ [مشكوة المصابيح/كتاب الصوم/حدیث: 2010]

نبی صلی ‌اللہ ‌علیہ ‌وآلہ ‌وسلم کے کسی صحابی رضی اللہ عنہ سے روایت ہے، انہوں نے کہا: میں نے مقامِ عرج پر نبی صلی ‌اللہ ‌علیہ ‌وآلہ ‌وسلم کو حالتِ روزہ میں پیاس یا گرمی کی وجہ سے سر پر پانی ڈالتے ہوئے دیکھا۔ صحیح، رواہ مالک و ابوداؤد۔ [مشكوة المصابيح/كتاب الصوم/حدیث: 2011]

شداد بن اوس رضی اللہ عنہ سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم بقیع میں ایک آدمی کے پاس سے گزرے جب کہ وہ پچھنے لگوا رہا تھا، آپ میرا ہاتھ تھامے ہوئے تھے اور رمضان کی اٹھارہ تاریخ تھی۔ آپ صلی ‌اللہ ‌علیہ ‌وآلہ ‌وسلم نے فرمایا: ”پچھنے لگانے اور لگوانے والے کا روزہ ٹوٹ گیا۔“ (ابوداؤد، ابن ماجہ، دارمی)۔ الشیخ الامام محی السنہ رحمہ اللہ نے فرمایا: اور جن بعض حضرات نے روزے کی حالت میں پچھنے لگوانے کی اجازت دی ہے، انہوں نے یہ تاویل کی ہے کہ پچھنے لگوانے والا کمزوری کی وجہ سے افطار کے قریب پہنچ جاتا ہے، جب کہ پچھنے لگانے والا اس چوسنے کی وجہ سے پیٹ میں کوئی چیز پہنچنے سے بچ نہیں سکتا۔ (صحیح، رواہ ابوداؤد و ابن ماجہ و الدارمی)۔ [مشكوة المصابيح/كتاب الصوم/حدیث: 2012]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جو شخص کسی رخصت (سفر وغیرہ) اور مرض کے بغیر رمضان کا ایک روزہ چھوڑ دے تو پھر اگر وہ پوری زندگی روزے رکھتا رہے تو وہ اس ایک دن کے روزے کے اجر و ثواب کو نہیں پا سکتا۔“ احمد، ترمذی، ابوداؤد، ابن ماجہ، دارمی اور امام بخاری رحمہ اللہ نے ترجمۃ الباب میں روایت کیا ہے اور امام ترمذی رحمہ اللہ نے فرمایا: میں نے محمد یعنی امام بخاری رحمہ اللہ کو فرماتے ہوئے سنا: میں ابوالمطوس راوی کو اس حدیث کے علاوہ نہیں جانتا کہ اس نے کوئی اور حدیث بھی روایت کی ہو۔ (ضعیف) [مشكوة المصابيح/كتاب الصوم/حدیث: 2013]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”کتنے ہی روزہ دار ہیں جنہیں اپنے روزے سے صرف پیاس حاصل ہوتی ہے اور کتنے ہی قیام کرنے والے ہیں جنہیں اپنے قیام سے جاگنے کے سوا کچھ حاصل نہیں ہوتا۔“ دارمی، اور لقیط بن صبرہ رضی اللہ عنہ سے مروی حدیث، سنن الوضوء کے بیان میں ذکر کی گئی ہے۔ اسنادہ حسن، رواہ الدارمی۔ [مشكوة المصابيح/كتاب الصوم/حدیث: 2014]

ابوسعید خدری رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”تین چیزیں روزہ نہیں توڑتیں: پچھنے، قے اور احتلام۔“ ترمذی۔ اور انہوں نے فرمایا: یہ حدیث محفوظ نہیں، عبدالرحمٰن بن زید راوی حدیث میں ضعیف ہے۔ ضعیف۔ [مشكوة المصابيح/كتاب الصوم/حدیث: 2015]