ابورافع رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے میمونہ رضی اللہ عنہا سے شادی کی تو آپ حالتِ احرام میں نہیں تھے، اور جب آپ نے ان سے خلوت کی تب بھی آپ حالتِ احرام میں نہیں تھے، اور میں دونوں کے درمیان قاصد و واسطہ تھا۔ احمد، ترمذی۔ اور فرمایا: یہ حدیث حسن ہے۔ صحیح، رواہ احمد و الترمذی۔ [مشكوة المصابيح/كتاب المناسك/حدیث: 2695]

صعب بن جثامہ رضی اللہ عنہ سے روایت ہے کہ انہوں نے مقامِ ابواء یا مقامِ ودان پر ایک جنگلی گدھا رسول اللہ صلی ‌اللہ ‌علیہ ‌وآلہ ‌وسلم کی خدمت میں پیش کیا، آپ نے اسے قبول نہ فرمایا، جب آپ صلی ‌اللہ ‌علیہ ‌وآلہ ‌وسلم نے ان کے چہرے پر افسردگی کے آثار دیکھے تو فرمایا: ”ہم نے اس لیے تمہیں واپس کیا ہے کہ ہم حالتِ احرام میں ہیں۔“ متفق علیہ۔ [مشكوة المصابيح/كتاب المناسك/حدیث: 2696]

ابوقتادہ رضی اللہ عنہ سے روایت ہے کہ وہ (حدیبیہ کے سال) رسول اللہ صلی ‌اللہ ‌علیہ ‌وآلہ ‌وسلم کے ساتھ روانہ ہوئے تو وہ اپنے بعض ساتھیوں کے ساتھ پیچھے رہ گئے، وہ حالتِ احرام میں تھے جبکہ وہ خود حالتِ احرام میں نہیں تھے، انہوں نے میرے دیکھنے سے پہلے ایک جنگلی گدھا دیکھا، جب انہوں نے اسے دیکھا تو انہوں نے اسے چھوڑ دیا حتیٰ کہ ابوقتادہ رضی اللہ عنہ نے اسے دیکھ لیا، وہ اپنے گھوڑے پر سوار ہوئے اور ان (اپنے ساتھیوں) سے مطالبہ کیا کہ وہ انہیں ان کا کوڑا پکڑا دیں لیکن انہوں نے انکار کر دیا، انہوں نے خود اسے لیا اور اس پر حملہ کر دیا اور اسے زخمی کر دیا، پھر انہوں نے اور ان کے ساتھیوں نے اسے کھایا، لیکن انہیں ندامت و پریشانی ہوئی، جب وہ رسول اللہ صلی ‌اللہ ‌علیہ ‌وآلہ ‌وسلم کے پاس پہنچے تو انہوں نے آپ صلی ‌اللہ ‌علیہ ‌وآلہ ‌وسلم سے مسئلہ دریافت کیا، آپ صلی ‌اللہ ‌علیہ ‌وآلہ ‌وسلم نے فرمایا: ”کیا اس کا کوئی حصہ تمہارے پاس ہے؟“ انہوں نے عرض کیا: اس کا ایک پاؤں ہمارے پاس ہے، نبی صلی ‌اللہ ‌علیہ ‌وآلہ ‌وسلم نے اسے لیا اور اسے کھایا۔ اور صحیح بخاری اور صحیح مسلم کی دوسری روایت میں ہے: جب وہ رسول اللہ صلی ‌اللہ ‌علیہ ‌وآلہ ‌وسلم کے پاس آئے تو آپ صلی ‌اللہ ‌علیہ ‌وآلہ ‌وسلم نے فرمایا: ”کیا تم میں سے کسی نے اسے کہا تھا کہ اس پر حملہ کرے؟ یا اس کی طرف اشارہ کیا ہو؟“ انہوں نے عرض کیا: نہیں، آپ صلی ‌اللہ ‌علیہ ‌وآلہ ‌وسلم نے فرمایا: ”اس کا جو گوشت باقی بچا ہے اسے کھاؤ۔“ متفق علیہ۔ [مشكوة المصابيح/كتاب المناسك/حدیث: 2697]

ابن عمر رضی اللہ عنہما نبی صلی ‌اللہ ‌علیہ ‌وآلہ ‌وسلم سے روایت کرتے ہیں، آپ صلی ‌اللہ ‌علیہ ‌وآلہ ‌وسلم نے فرمایا: ”پانچ چیزیں ایسی ہیں جنہیں حرم میں اور حالت احرام میں قتل کر دینے پر کوئی گناہ نہیں: چوہیا، کوا، چیل، بچھو اور کاٹنے والا کتا۔“ متفق علیہ۔ [مشكوة المصابيح/كتاب المناسك/حدیث: 2698]

عائشہ رضی اللہ عنہا نبی صلی ‌اللہ ‌علیہ ‌وآلہ ‌وسلم سے روایت کرتی ہیں، آپ صلی ‌اللہ ‌علیہ ‌وآلہ ‌وسلم نے فرمایا: ”پانچ قسم کے جانور فاسق (نقصان دہ) ہیں، انہیں حل و حرم ہر حالت میں قتل کیا جائے گا: سانپ، کوّا جو سیاہ و سفید ہو، چوہیا، کاٹنے والا کتا اور چیل۔“ متفق علیہ۔ [مشكوة المصابيح/كتاب المناسك/حدیث: 2699]

جابر رضی اللہ عنہ سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”اس شکار کا گوشت تمہارے لیے حالت احرام میں حلال ہے جسے نہ تم نے خود شکار کیا ہو اور نہ وہ تمہاری خاطر شکار کیا گیا ہو۔“ «إِسْنَادُهُ ضَعِيفٌ، رَوَاهُ أَبُو دَاوُدَ وَالتِّرْمِذِيُّ وَالنَّسَائِيُّ» ”اس کی سند ضعیف ہے، اسے ابوداؤد، ترمذی اور نسائی نے روایت کیا ہے۔“ [مشكوة المصابيح/كتاب المناسك/حدیث: 2700]

ابوہریرہ رضی اللہ عنہ نبی صلی ‌اللہ ‌علیہ ‌وآلہ ‌وسلم سے روایت کرتے ہیں کہ آپ صلی ‌اللہ ‌علیہ ‌وآلہ ‌وسلم نے فرمایا: ”ٹڈی (مکڑی) سمندری شکار کے زمرے میں ہے۔“ یہ حدیث حسن ہے، اسے ابوداؤد اور ترمذی نے روایت کیا ہے۔ [مشكوة المصابيح/كتاب المناسك/حدیث: 2701]

ابوسعید خدری رضی اللہ عنہ نبی کریم صلی ‌اللہ ‌علیہ ‌وآلہ ‌وسلم سے روایت کرتے ہیں کہ آپ صلی ‌اللہ ‌علیہ ‌وآلہ ‌وسلم نے فرمایا: ”مُحرم چیر پھاڑ کرنے والے درندے کو مار سکتا ہے۔“ اسنادُہٗ ضعیف، رواہ ابوداؤد وابن ماجہ۔ [مشكوة المصابيح/كتاب المناسك/حدیث: 2702]

عبدالرحمٰن بن ابی عمار بیان کرتے ہیں، میں نے جابر بن عبداللہ رضی اللہ عنہما سے بجو کے بارے میں سوال کیا: کیا وہ شکار ہے؟ انہوں نے کہا: ہاں، میں نے کہا: کیا وہ کھایا جاتا ہے؟ انہوں نے کہا: ہاں، میں نے کہا: کیا آپ نے اسے رسول اللہ صلی ‌اللہ ‌علیہ ‌وآلہ ‌وسلم سے سنا ہے؟ انہوں نے کہا: ہاں۔ (ترمذی، نسائی، شافعی) اور امام ترمذی رحمہ اللہ نے فرمایا: یہ حدیث حسن صحیح ہے۔ صحیح، «رَوَاهُ التِّرْمِذِيُّ وَالنَّسَائِيُّ» ”اسے ترمذی اور نسائی نے روایت کیا ہے“۔ [مشكوة المصابيح/كتاب المناسك/حدیث: 2703]

جابر رضی اللہ عنہ بیان کرتے ہیں، میں نے بجو کھانے کے بارے میں رسول اللہ صلی ‌اللہ ‌علیہ ‌وآلہ ‌وسلم سے دریافت کیا، آپ صلی ‌اللہ ‌علیہ ‌وآلہ ‌وسلم نے فرمایا: ”وہ شکار ہے، اور جب محرم اس کا شکار کرے تو اس کے بدلے اس پر ایک مینڈھا ہے۔“ «إِسْنَادُهُ صَحِيحٌ»، رواہ ابوداؤد و ابن ماجہ و الدارمی۔ [مشكوة المصابيح/كتاب المناسك/حدیث: 2704]