حدیث حاشیہ:
مسنداحمد کی روایت میں ہے کہ نبی کریم صلی اللہ علیہ وسلم عائشہ ؓ کی اس بات پر اس قدرخفا ہو گئے کہ چہرئہ مبارک غصہ سے سرخ ہو گیا اور فرمایا، اس سے بہترکیا چیز مجھے ملی ہے؟ حضرت عائشہ ؓ کھڑی ہو گئیں اور اللہ کے حضورانہوں نے توبہ کی اور پھر کبھی اس طرح کی گفتگو آنحضرت صلی اللہ علیہ وسلم کے سامنے نہیں کی۔
عورتوں کی یہ فطرت ہے کہ وہ اپنی سوکن سے ضرور رقابت رکھتی ہیں حضرت ہاجرہ و حضرت سارہ ؑ کے حالات بھی اس پر شاہد ہیں پھر ازواج مطہرات بھی بنات حوا تھیں لہٰذا یہ محل تعجب نہیں ہے۔
اللہ پاک ان کی کمزوریوں کو معاف کرنے والا ہے۔

حدیث حاشیہ:
1۔
متعدد بیویوں کا ایک دوسری پر غیرت کرنے میں کوئی حرج نہیں کیونکہ یہ ان کی فطرت ہے۔
یہی وجہ ہے کہ رسول اللہ صلی اللہ علیہ وسلم نے حضرت عائشہ ؓ کو ڈانٹ ڈپٹ نہیں فرمائی۔
2۔
اس حدیث سے یہ بھی معلوم ہوا کہ رسول اللہ صلی اللہ علیہ وسلم کو حضرت خدیجہ ؓ سے بہت محبت تھی اور گزشتہ عہد محبت کو یاد کرکے ان کی حیات وممات میں رفاقت کی حرمت کا خیال رکھتے تھے۔
ایک روایت میں ہے حضرت عائشہ ؓ نے کہا:
اللہ تعالیٰ نے ایک بڑی عمر والی کے عوض آپ کو ایک نوخیز لڑکی عطا کردی ہے۔
یہ بات سن کررسول اللہ صلی اللہ علیہ وسلم خفا ہوئے تو حضرت عائشہ ؓ نے کہا:
اللہ کی قسم! میں آئندہ حضرت خدیجہ ؓ کا ذکر بھلائی سے کروں گی۔
(المعجم الکبیر للطبراني: 14/7۔
15)
ایک دوسری روایت میں ہے کہ آپ نے فرمایا:
”اللہ تعالیٰ نے مجھے اس کا بدل نہیں دیا کیونکہ وہ اس وقت ایمان لائیں جب لوگوں نے میری نبوت کا انکار کیا تھا۔
“ (مسند أحمد: 118/6۔
و فتح الباري: 176/7)