حدیث حاشیہ:
سائب بن یزید کا بیان ان کی اپنی مصاحبت تک ہے ورنہ کتب احادیث میں ان حضرات سے بھی بہت سی احادیث مروی ہیں۔
یہ ضرور ہے کہ جملہ صحابی کرام رسول کریم صلی اللہ علیہ وسلم سے احادیث بیان کرنے میں کمال احتیا ط برتتے تھے۔
اس خوف سے کہ کہیں غلط بیانی کے مرتکب ہو کر زندہ دوزخی نہ بن جائیں کیونکہ حضور صلی اللہ علیہ وسلم نے فرمایا تھا جو شخص میرا نام لے کر ایسی حدیث بیان کرے جو میں نے نہ کہی ہو وہ زندہ دوزخی ہے۔
پس اس سے منکرین حدیث کا استدلال باطل ہے۔
روایت میں غزوئہ احد کا ذکر ہے۔
باب سے یہی وجہ مطابقت ہے۔
قرآن مجید کے بعد صحیح مرفوع مستند حدیث کا تسلیم کرنا ہر مسلمان کے لیے فرض ہے جو شخص صحیح حدیث کا انکار کرے وہ قرآن ہی کا انکار ی ہے اور یہ کسی مسلمان کا شیوہ نہیں ہے۔

حدیث حاشیہ:
1۔
پہلی حدیث میں "بعض ایام"سے مراد احد کی جنگ ہےمہاجرین میں سے اکابر حضرات غزوات میں ہمیشہ رسول اللہ صلی اللہ علیہ وسلم کےہمرا ہ ہوا کرتے تھےلیکن غزوہ احد میں اس قدر گھمسان کا رن پڑا کہ حضرت طلحہ ؓ اور حضرت سعد ؓ کے علاوہ کوئی دوسرا مہاجر آپ کے ساتھ نہ رہا۔
گزشتہ حدیث کے مطابق حضرت مقداد ؓ ایسے کٹھن حالات میں رسول اللہ صلی اللہ علیہ وسلم کے ہمراہ موجود تھے لیکن وہ سخت حالات کے بعد حاضر ہوئے تھے۔
حدیث میں ان دونوں حضرات کی تخصیص مہاجرین کے اعتبار سے ہے کیونکہ صحیح مسلم میں ہے کہ رسول اللہ صلی اللہ علیہ وسلم غزوہ احد میں ایک مرتبہ ایسے حالات سے دوچار ہوئے کہ آپ کے ہمراہ سات انصار اور دو قریشی تھے۔
(صحیح مسلم، الفضائل، حدیث: 4641۔
(1789)
دو قریشی حضرات سے مراد حضرت طلحہ ؓ اور حضرت سعد ؓ ہیں مہاجرین میں سے صرف حضرت طلحہ اور حضرت سعد آپ کے ہمراہ تھے۔
2دوسری حدیث کے مطابق ان حضرات کے حدیث بیان نہ کرنے کا سبب یہ تھا کہ انھیں سہو و نسیان کا اندیشہ لاحق تھا کہ شاید ان سے غلطی ہو جائے۔
اس بنا پر وہ احادیث بیان کرنے میں احتیاط کرتے تھے نیز مذکورہ بیان حضرت سائب بن یزید ؓ کی اپنی مصاحبت تک ہے ورنہ کتب حدیث میں ان حضرات سے بھی بہت سی احادیث مروی ہیں البتہ یہ حضرات احتیاط ضرور کرتے تھے۔
واللہ اعلم۔