حدیث حاشیہ:
(1)
حضرت ابن عباس ؓ سری نمازوں میں قراءت کی نفی کرتے تھے، چنانچہ حدیث میں ہےکہ حضرت ابن عباس کے چند شاگرد ان کے پاس آئے۔
انھوں نے آپ سے دریافت کیا کہ رسول اللہ صلی اللہ علیہ وسلم نماز ظہر اور نماز عصر میں کچھ پڑھا کرتے تھے؟ آپ نے فرمایا:
نہیں۔
انھوں نے دوبارہ عرض کیا:
شاید آپ آہستہ اپنے جی میں پڑھتے ہوں؟ فرمایا:
یہ پہلے موقف سے بھی گھٹیا ہے۔
آپ تو عبد مامور تھے اور اللہ کے احکام لوگوں تک پہنچانے کے پابند تھے۔
(سنن أبي داود، الصلاة، حدیث: 808)
بعض دفعہ آپ قراءت کے متعلق شکوک وشبہات کا اظہار کرتے جیسا کہ ایک روایت میں ہے کہ آپ نے فرمایا مجھے پتہ نہیں کہ رسول الله صلی اللہ علیہ وسلم نماز ظہر اور نماز عصر میں کچھ پڑھا کرتےتھے یا نہیں؟ (سنن أبي داود، الصلاة، حدیث: 809)
اس روايت سے معلوم ہوتا ہے کہ ابن عباس ؓ قراءت کے متعلق شک میں مبتلا تھے، حالانکہ حضرت خباب بن ارت اور حضرت ابو قتادہ ؓ نے ظہر اور عصر کی نماز میں قراءت کرنا نقل فرمایا ہے، اس لیے قراءت کا اثبات اس کی نفی پر مقدم ہے۔
شاید امام بخاری ؒ نے مذکورہ روایت حضرت ابن عباس ؓ کے اختیار کردہ موقف کے جواب میں پیش کی ہے کہ جب رسول اللہ صلی اللہ علیہ وسلم ہمارے لیے نمونہ ہیں تو آپ سے تو قراءت کرنا ثابت ہے، اس لیے ہمیں بھی آپ کی پیروی کرتے ہوئے نماز ظہر اور عصر میں قراءت کرنی چاہیے۔
بعض روایات سے معلوم ہوتا ہے کہ حضرت ابن عباس ؓ بھی ان نمازوں میں قراءت کے قائل تھے۔
جیسا کہ ابو العالیہ ؒ کہتے ہیں:
میں نے ان سے سوال کیا کہ آیا مجھے نماز ظہر اور نماز عصر میں قراءت کرنی چاہیے؟تو انھوں نے فرمایا:
قرآن تیرا امام ہے، اس سے تھوڑا بہت ضرور پڑھنا چاہیے۔
(فتح الباري: 330/2) (2)
علامہ خطابی ؒ فرماتے ہیں کہ اگر اللہ چاہتا تو نماز کے متعلق جملہ کیفیات وحالات کو قرآن میں بیان کردیتا اور اللہ تعالیٰ نے اسے سہو و نسیان سے نظر انداز نہیں کیا بلکہ رسول اللہ صلی اللہ علیہ وسلم کے بیان پر چھوڑ دیا گیا ہے، کیونکہ قرآن کا بیان آپ کے فرائض منصبی میں شامل تھا اور آپ نے اپنے عمل سے اسے بیان کردیا ہے، اس لیے قرآن کے اجمال کی وضاحت کے لیے رسول اللہ صلی اللہ علیہ وسلم کے افعال کی پیروی ضروری ہے۔
(فتح الباري: 330/2)
اس وضاحت سے معلوم ہوا کہ رسول اللہ صلی اللہ علیہ وسلم پر قرآن کے علاوہ بھی وحی آتی تھی جسے قرآن کریم نے سورۂ قیامہ میں "بیان" سے تعبیر کیا ہے، لہٰذا ان حضرات کو غور کرنا چاہیے جو دینی احکام میں صرف قرآن پر اعتماد کرتے ہیں اور رسول اللہ صلی اللہ علیہ وسلم کا بیان، یعنی احادیث مبارکہ ان کے نزدیک ناقابل اعتبار ہیں بلکہ یہ حضرات ان احادیث کو عجمی سازش قرار دیتے ہیں۔
أعاذنا الله من الزيغ والضلال