اگر قربانی کا جانور گم ہو جائے
قربانی کا جانور گم ہو گیا، اگر استطاعت ہے، تو دوسرا جانور قربان کر دے، ورنہ کوئی حرج نہیں۔
اس حوالے سے ایک ضعیف حدیث بھی آتی ہے، جس کا تعلق ہدی سے ہے، نہ کہ قربانی سے۔ ہدی اور قربانی کے کئی احکام و مسائل میں فرق ہے۔
❀ سیدنا عبداللہ بن عمر رضی اللہ عنہما سے مروی ہے:
”سیدنا عمر بن خطاب رضی اللہ عنہ ہدی کے لیے عمدہ قسم کی اونٹنی خاص کر دی، انہیں اس اونٹنی کی تین سو دینار قیمت مل رہی تھی، تو آپ صلی اللہ علیہ وسلم کے پاس آئے، عرض کیا: اللہ کے رسول! میں نے ایک عمدہ قسم کی اونٹنی ہدی کے لیے رکھی ہے، مجھے اس کے تین سو دینار مل رہے ہیں، کیا میں اسے بیچ سکتا ہوں اور اس کے بدلے میں زیادہ اونٹ خرید لوں؟ فرمایا: نہیں، اونٹنی کو ہی نحر کیجیے۔“ [مسند الإمام أحمد: 6325، سنن أبي داود: 1756]
سند ضعیف و منقطع ہے۔
➊ جہم بن جارود مجہول الحال ہے۔ ➋ جہم بن جارود کا سالم بن عبد اللہ سے سماع نہیں ہے۔
◈ امام بخاری رحمہ اللہ فرماتے ہیں:
«لَا يُعْرَفُ لِجَهْمٍ سَمَاعٌ مِّنْ سَالِمٍ.»
”جہم کا سالم سے سماع معروف نہیں ہے۔“ [التاريخ الكبير: 230/2]

1756. اردو حاشیہ: جب قربانی یا ہدی کے لیے جانور خاص کر دیا گیا ہو تو اسے تبدیل کرنا درست نہیں ہے۔