عمرو بن میمون رحمہ اللہ کہتے ہیں کہ میں نے ابوحاضر حمیری رحمہ اللہ کو سنا، وہ میرے والد میمون بن مہران رحمہ اللہ سے بیان کر رہے تھے کہ ”جس سال اہل شام نے مکہ میں ابن زبیر رضی اللہ عنہما کا محاصرہ کیا تھا، میں (ابوحاضر حمیری) عمرے کی غرض سے روانہ ہوا۔ میرے ساتھ قوم کے کچھ افراد نے اپنی قربانیاں بھی بھیجی تھیں۔ جب ہم اہل شام کے پاس پہنچے تو انہوں نے ہمیں حرم میں داخل ہونے سے روک دیا۔ چنانچہ میں نے قربانی اسی جگہ نحر کر دی اور پھر حلال ہو گیا اور واپس لوٹ آیا۔ پھر جب اگلا سال آیا اور میں اپنے عمرے کی قضا کے لیے چلا تو سیدنا ابن عباس رضی اللہ عنہما کے ہاں آیا اور ان سے پوچھا تو انہوں نے کہا: ”اپنی قربانی کا بدل بھی دو۔ بے شک رسول اللہ صلی اللہ علیہ وسلم نے عمرہ قضا میں اپنے صحابہ سے فرمایا تھا کہ حدیبیہ کے سال انہوں نے جو قربانیاں کی تھیں ان کے عوض قربانیاں بھی کریں۔““ [سنن ابي داود/كتاب المناسك /حدیث: 1864]