سیدنا عمرو بن شعیب اپنے والد سے، (شعیب) اپنے دادا رضی اللہ عنہ سے اس واقعہ کے سلسلے میں بیان کرتے ہیں کہ پھر رسول اللہ صلی اللہ علیہ وسلم نے فرمایا: ”ان لوگوں کی عورتیں اور بچے انہیں لوٹا دو اور جو کوئی بلا عوض واپس نہ کرنا چاہے تو ہمارا اس سے وعدہ ہے کہ پہلی پہلی غنیمت جو اللہ تعالیٰ ہمیں عنایت فرمائے گا اس میں سے چھ اونٹ اسے دیے جائیں گے۔“ پھر آپ صلی اللہ علیہ وسلم اپنے اونٹ کے قریب ہوئے اور اس کے کوہان سے کچھ بال لیے اور فرمایا: ”لوگو! اس غنیمت میں سے میرے لیے خمس (پانچویں حصے) کے سوا کچھ نہیں ہے، اس قدر (بال) بھی نہیں۔“ اور آپ صلی اللہ علیہ وسلم نے اشارہ کرتے ہوئے اپنی انگلی بلند فرمائی اور فرمایا: ”یہ خمس بھی تم لوگوں ہی میں تقسیم ہو گا، لہٰذا سوئی اور دھاگے تک واپس کر دو۔“ چنانچہ ایک آدمی کھڑا ہوا، اس کے ہاتھ میں بالوں کا ایک گچھا سا تھا، وہ بولا: ”میں نے یہ بال لیے ہیں تاکہ پالان کے نیچے کی گدی درست کر لوں۔“ رسول اللہ صلی اللہ علیہ وسلم نے فرمایا: ”جو میرا ذاتی حصہ ہے یا بنی عبدالمطلب کا، وہ تم لے سکتے ہو (دوسروں کا نہیں)۔“ اس نے کہا: ”اگر اس کا اتنا گناہ ہے جو میں دیکھ رہا ہوں تو مجھے اس کی کوئی ضرورت نہیں“ اور اس نے گچھا پھینک دیا۔ [سنن ابي داود/كتاب الجهاد /حدیث: 2694]