میں نے سیدنا علی رضی اللہ عنہ سے سنا وہ بیان کرتے تھے کہ ”میں، عباس، فاطمہ اور زید بن حارثہ رضی اللہ عنہم نبی کریم صلی اللہ علیہ وسلم کے ہاں اکٹھے ہوئے۔ میں نے کہا: ”اے اللہ کے رسول! اگر آپ مناسب سمجھیں تو کتاب اللہ کے مطابق جو خمس میں ہمارا حق ہے، آپ اپنی زندگی میں مجھے اس کا والی بنا دیں تاکہ آپ کے بعد کوئی مجھ سے جھگڑا نہ کرے۔“ چنانچہ آپ نے ایسے ہی کر دیا۔ پھر میں آپ کی حیات مبارکہ میں اسے تقسیم کرتا رہا۔ پھر سیدنا ابوبکر رضی اللہ عنہ نے مجھے اس کا والی بنایا۔ حتی کہ جب سیدنا عمر رضی اللہ عنہ کا آخری سال تھا تو ان کے پاس بہت سا مال آیا، تو انہوں نے مجھے اس سے معزول کر دیا۔ پھر انہوں نے مجھے بلا بھیجا، تو میں نے عرض کیا: ”اب کے برس ہمیں اس کی ضرورت نہیں ہے جبکہ دیگر مسلمان اس کے حاجت مند ہیں، آپ یہ انہیں دے دیں۔“ تو انہوں نے اسے مسلمانوں میں تقسیم کر دیا۔ پھر سیدنا عمر رضی اللہ عنہ بعد مجھے کسی نے اس کے لیے نہیں بلایا۔ سیدنا عمر رضی اللہ عنہ کے ہاں سے آنے کے بعد میں سیدنا عباس رضی اللہ عنہ سے ملا تو انہوں نے کہا: ”اے علی! آج تم نے ہمیں ایک حق سے محروم کر دیا ہے جو آئندہ کبھی ہمیں نہیں دیا جائے گا۔“ اور وہ بڑے دانا آدمی تھے۔“ [سنن ابي داود/كتاب الخراج والفيء والإمارة /حدیث: 2983]