عوف بن مالک اشجعی رضی اللہ عنہ روایت کرتے ہیں کہ ”میں نے ایک رات رسول اللہ صلی اللہ علیہ وسلم کے ساتھ قیام کیا، آپ صلی اللہ علیہ وسلم نے قیام کیا تو سورہ البقرہ کی تلاوت فرمائی، آپ صلی اللہ علیہ وسلم جس کسی آیتِ رحمت سے گزرتے تو وہاں رکتے اور دعا کرتے اور جس کسی آیتِ عذاب سے گزرتے تو وہاں رکتے اور تعوذ کرتے۔ پھر آپ صلی اللہ علیہ وسلم نے رکوع کیا، اس قدر لمبا جتنا کہ آپ صلی اللہ علیہ وسلم کا قیام تھا۔ آپ صلی اللہ علیہ وسلم اپنے رکوع میں یہ دعا پڑھتے تھے: «سُبْحَانَ ذِي الْجَبَرُوتِ وَالْمَلَكُوتِ وَالْكِبْرِيَاءِ وَالْعَظَمَةِ» ”پاک ہے وہ ذات جو غلبہ و قوت، ملکیت، بڑائی اور عظمت والی ہے۔“ پھر آپ صلی اللہ علیہ وسلم نے سجدہ کیا، اس قدر لمبا جتنا کہ آپ صلی اللہ علیہ وسلم کا قیام تھا۔ اور آپ صلی اللہ علیہ وسلم اپنے سجدے میں بھی وہی دعا پڑھتے رہے۔ پھر کھڑے ہوئے اور سورہ آل عمران کی قرأت فرمائی، پھر ایک سورت پڑھی، (بعد ازاں ایک اور) سورت پڑھی۔“ [سنن ابي داود/أبواب تفريع استفتاح الصلاة /حدیث: 873]