سیدنا ابوذر غفاری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”انسان کی ہر ایک سانس کے عوض اس پر ہر اس دن کا صدقہ لازم ہے جس میں سورج نکلتا ہے۔“ عرض کی گئی: ”یا رسول اللہ صلی اللہ علیہ وسلم ! اتنا زیادہ صدقہ دینے کے لیے ہمارے پاس کہاں گنجائش ہے؟“ نبی اکرم صلی اللہ علیہ وسلم نے ارشاد فرمایا: ”بھلائی کے دروازے بہت زیادہ ہیں؛ «سُبْحَانَ اللّٰهِ» ”اللہ پاک ہے“ کہنا، «الْحَمْدُ لِلّٰهِ» ”تمام تعریفیں اللہ ہی کے لیے ہیں“ کہنا، «اللّٰهُ أَكْبَرُ» ”اللہ سب سے بڑا ہے“ کہنا، «لَا إِلٰهَ إِلَّا اللّٰهُ» ”اللہ کے سوا کوئی معبود نہیں“ کہنا، نیکی کا حکم دینا، برائی سے منع کرنا، تکلیف دہ چیز کو راستے سے ہٹا دینا، بہرے شخص کو بات سمجھا دینا، نابینا شخص کی رہنمائی کر دینا، کسی کام کے سلسلے میں رہنمائی مانگنے والے کی رہنمائی کر دینا، اپنی ٹانگوں کی مضبوطی کی وجہ سے مدد مانگنے والے پریشان حال شخص کے لیے کوشش کرنا اور اپنے بازوؤں کی مضبوطی کی وجہ سے کمزور شخص کے لیے وزن اٹھا دینا؛ یہ سب تمہاری طرف سے تمہارے نفس کے لیے صدقہ ہیں۔“ [صحیح ابن حبان/كتاب الزكاة/حدیث: 3377]