سیدنا ابوذر غفاری رضی اللہ عنہ بیان کرتے ہیں: میں مسجد میں داخل ہوا، تو وہاں نبی اکرم صلی اللہ علیہ وسلم تنہا تشریف فرما تھے آپ نے ارشاد فرمایا: اے ابوذر! مسجد کے لئے ایک نفلی (نماز) ہوتی ہے اور اس کی نفلی (نماز) دو رکعات ہے۔ تم اٹھ کر انہیں ادا کر لو سیدنا ابوذر رضی اللہ عنہ بیان کرتے ہیں: میں نے ان دو رکعات کو ادا کر لیا پھر میں واپس آ کر نبی اکرم صلی اللہ علیہ وسلم کے پاس بیٹھ گیا۔ میں نے عرض کی: یا رسول اللہ! آپ نے مجھے نماز کا حکم دیا نماز کیا ہے؟ نبی اکرم صلی اللہ علیہ وسلم نے فرمایا: یہ ایک بھلائی رکھ دی گئی ہے۔ (اب تمہاری مرضی ہے) کہ تم زیادہ حاصل کرتے ہو یا کم حاصل کرتے ہو۔ میں نے عرض کی: یا رسول اللہ! کون سا عمل زیادہ فضیلت رکھتا ہے۔ نبی اکرم صلی اللہ علیہ وسلم نے فرمایا:اللہ تعالیٰ پر ایمان رکھنا اور اللہ کی راہ میں جہاد کرنا میں نے عرض کی: یا رسول اللہ! اہل ایمان میں سے ایمان کے اعتبار سے سب سے زیادہ کامل کون شخص ہے؟ نبی اکرم صلی اللہ علیہ وسلم نے فرمایا: جس کے اخلاق زیادہ اچھے ہوں۔ میں نے عرض کی: یا رسول اللہ! اہل ایمان میں سے سب سے زیادہ سلامتی والا کون شخص ہے۔ نبی اکرم صلی اللہ علیہ وسلم نے فرمایا: جس کی زبان اور ہاتھ سے لوگ سلامت ہوں۔ میں نے عرض کی: یا رسول اللہ! کون سی نماز زیادہ فضیلت رکھتی ہے۔ نبی اکرم صلی اللہ علیہ وسلم نے فرمایا: جس میں قیام طویل ہو۔ میں نے عرض کی: یا رسول اللہ! کون سی ہجرت زیادہ فضیلت رکھتی ہے۔ نبی اکرم صلی اللہ علیہ وسلم نے فرمایا: جو شخص گناہوں سے لاتعلق ہو جائے میں نے عرض کی: یا رسول اللہ! روزہ کیا چیز ہے۔ نبی اکرم صلی اللہ علیہ وسلم نے فرمایا: یہ ایک فرض ہے، جو کافی ہو جاتا ہے اوراللہ تعالیٰ کے ہاں (اس کا اجر و ثواب) کئی گنا ہوتا ہے۔ میں نے عرض کی: یا رسول اللہ! کون سا جہاد زیادہ فضیلت رکھتا ہے۔ نبی اکرم صلی اللہ علیہ وسلم نے فرمایا: جس میں (گھوڑے کے) پاؤں کاٹ دیئے جائیں اور اس کا خون بہا دیا جائے۔ میں نے عرض کی: یا رسول اللہ! کون سا صدقہ زیادہ فضیلت رکھتا ہے۔ نبی اکرم صلی اللہ علیہ وسلم نے فرمایا: جس شخص کے پاس پیسے کم ہوں اور جسے یہ اندیشہ ہو کہ وہ غریب ہو جائے گا۔ میں نے عرض کی: یا رسول اللہ!اللہ تعالیٰ نے آپ پر جو کچھ بھی نازل کیا ہے۔ اس میں سب سے عظیم چیز کیا ہے۔ نبی اکرم صلی اللہ علیہ وسلم نے فرمایا: آیت الکرسی، پھر آپ نے ارشاد فرمایا: (اللہ تعالیٰ کی) کرسی کے مقابلے میں سات آسمان اس طرح ہیں، جیسے کسی بے آب و گیاہ جگہ کے اوپر ایک چھلہ (انگوٹھی) ہو اور عرش کو کرسی پر وہی فضیلت حاصل ہے۔ جس طرح اس آب و گیاہ جگہ کو اس چھلے (انگوٹھی) پر فضیلت حاصل ہے۔ میں نے عرض کی: یا رسول اللہ! انبیاء کتنے ہیں؟ نبی اکرم صلی اللہ علیہ وسلم نے فرمایا: ایک لاکھ بیس ہزار میں نے عرض کی: اس میں سے رسول کتنے ہیں؟ نبی اکرم صلی اللہ علیہ وسلم نے فرمایا: تین سو تیرہ کا گروہ ہے۔ میں نے عرض کی: ان میں سب سے پہلے کون سے ہیں؟ آپ نے فرمایا: سیدنا آدم علیہ السلام میں نے عرض کی: یا رسول اللہ! کیا وہ رسول نبی ہیں؟ نبی اکرم صلی اللہ علیہ وسلم نے فرمایا: جی ہاں۔اللہ تعالیٰ نے انہیں اپنے دست قدرت کے ذریعے پیدا کیا اور ان میں اپنی روح کو پھونکا اور سامنے آ کر ان سے کلام کیا۔ نبی اکرم صلی اللہ علیہ وسلم نے فرمایا: اے ابوذر! چار حضرات سریانی ہیں۔ سیدنا آدم علیہ السلام، سیدنا شیث علیہ السلام، سیدنا اخنوخ علیہ السلام یہ سیدنا ادریس علیہ السلام اور یہ وہ پہلے شخص ہیں، جنہوں نے قلم کے ذریعے لکھا تھا، اور سیدنا نوح علیہ السلام چار حضرات کا تعلق عرب سے ہے۔ سیدنا ہود علیہ السلام، سیدنا شعیب علیہ السلام، سیدنا صالح علیہ السلام اور تمہارے نبی سیدنا محمد صلی اللہ علیہ وسلم ۔ میں نے عرض کی: یا رسول اللہ!اللہ تعالیٰ نے کتنی کتابیں نازل کی ہیں؟ نبی اکرم صلی اللہ علیہ وسلم نے فرمایا: ایک سو چار کتابیں سیدنا شیث علیہ السلام پر پچاس صحیفے نازل ہوئے۔ سیدنا اخنوخ علیہ السلام پر تیس صحیفے نازل ہوئے۔ سیدنا ابراہیم علیہ السلام پر دس صحیفے نازل ہوئے۔ سیدنا موسیٰ علیہ السلام پر تورات سے پہلے دس صحیفے نازل ہوئے پھر تورات، انجیل، زبور اور قرآن نازل ہوئے۔ میں نے عرض کی: یا رسول اللہ! سیدنا ابراہیم علیہ السلام کا صحیفہ کیا تھا؟ نبی اکرم صلی اللہ علیہ وسلم نے فرمایا: وہ سارے کا سارا مثالوں والا تھا، لیکن اس میں یہ تحریر تھا۔ ”اے بادشاہ! جسے اقتدار عطا کیا گیا ہے اور آزمائش میں مبتلا کیا گیا ہے اور غلط فہمی کا شکار کیا گیا میں نے تمہیں اس لئے نہیں بھیجا تاکہ تم ایک دوسرے کے مقابلے میں دنیا جمع کرو، میں نے تمہیں اس لئے بھیجا ہے، تاکہ تم مظلوم کی بددعا کو مجھ تک نہ آنے دو، کیونکہ میں مظلوم کی دعا کو مسترد نہیں کرتا۔ خواہ وہ کوئی کافر ہی کیوں نہ ہو اور عقلمند شخص پر یہ بات لازم ہے کہ جب تک اس کی عقل مغلوب نہیں ہوتی وہ اپنے وقت کو مختلف حصوں میں تقسیم کرے کچھ وقت میں وہ اپنے پروردگار کی بارگاہ میں مناجات کرتا رہے۔ کچھ وقت میں وہ اپنے نفس کا محاسبہ کرتا ہے کچھ وقت میں وہاللہ تعالیٰ کی تخلیق پر غور و فکر کرتا رہے اور کچھ وقت وہ اپنے کھانے پینے کی تیاری کے لئے مخصوص رکھے۔ عقلمند شخص پر یہ بات لازم ہے کہ وہ تین چیزوں کی تیاری رکھے۔ اپنے انجام (یعنی آخرت) کے لئے زادراہ کی، اپنی زندگی گزارنے کے لئے ضروریات زندگی کی، یا پھر ایسی لذت کی جو حرام نہ ہو اور عقلمند شخص پر یہ بات لازم ہے کہ وہ اپنے زمانے کی بصیرت رکھتا ہوا اپنے حال کی طرف متوجہ رہے۔ اپنی زبان کی حفاظت کرے اور جو شخص اپنے عمل کے مقابلے میں اپنے کلام کا حساب رکھتا ہے اس کا کلام کم ہوتا ہے اور صرف وہی کلام ہوتا ہے، جو انتہائی ضروری ہو۔“ میں نے عرض کی: یا رسول اللہ! سیدنا موسی علیہ السلام کے صحیفوں میں کیا تھا؟ نبی اکرم صلی اللہ علیہ وسلم نے ارشاد فرمایا: وہ ساری کی ساری عبرت آمیز باتیں تھیں۔ (جن میں سے کچھ باتیں یہ ہیں) ”مجھے اس شخص پر حیرانگی ہوتی ہے، جو موت پر یقین رکھتا ہے اور پھر بھی وہ خوش رہتا ہے۔ مجھے اس شخص پر بھی حیرانگی ہوتی ہے، جو جہنم پر بھی یقین رکھتا ہے اور پھر بھی وہ ہنستا ہے مجھے اس شخص پر بھی حیرانگی ہوتی ہے، جو تقدیر پر یقین رکھتا ہے اور پھر بھی وہ نصب کر لیتا ہے۔ مجھے اس شخص پر حیرانگی ہوتی ہے، جو دنیا اور اہل دنیا کی حالات کی تبدیلی کو دیکھتا ہے اور پھر بھی وہ دنیا سے مطمئن ہوتا ہے۔ مجھے اس شخص پر بھی حیرانگی ہوتی ہے، جو حساب پر یقین رکھتا ہے اور پھر بھی عمل نہیں کرتا۔“ میں نے عرض کی: یا رسول اللہ! آپ مجھے کوئی نصیحت کیجئے۔ نبی اکرم صلی اللہ علیہ وسلم نے فرمایا: میں تمہیںاللہ تعالیٰ کے تقویٰ کی نصیحت کرتا ہوں، کیونکہ یہ تمام معاملے کی بنیاد ہے۔ میں نے عرض کی: یا رسول اللہ! مزید کیجئے۔ نبی اکرم صلی اللہ علیہ وسلم نے فرمایا: تم پر قرآن کی تلاوت کرنا اوراللہ تعالیٰ کا ذکر کرنا لازم ہے اور کیونکہ یہ زمین میں تمہارے لئے نور ہو گا اور آخرت میں تمہارے لئے ذخیرہ ہو گا۔ میں نے عرض کی: یا رسول اللہ! آپ مزید عطا کیجئے۔ نبی اکرم صلی اللہ علیہ وسلم نے فرمایا: تم پر لازم ہے کہ زیادہ ہنسنے سے بچو، کیونکہ یہ چیز دل کو مردہ کر دیتی ہے اور چہرے کے نور کو رخصت کر دیتی ہے۔ میں نے عرض کی: یا رسول اللہ! مزید عطا کیجئے۔ نبی اکرم صلی اللہ علیہ وسلم نے فرمایا: تم پر خاموشی اختیار کرنا لازم ہے، البتہ بھلائی کی بات کا حکم مختلف ہے، کیونکہ یہ چیز تم سے شیطان کو پرے کر دے گی اور تمہارے دین کے معاملے میں تمہارے لئے مددگار ہو گی۔ میں نے عرض کی: یا رسول اللہ! مزید عطا کیجئے۔ نبی اکرم صلی اللہ علیہ وسلم نے ارشاد فرمایا: تم پر جہاد کرنا لازم ہے، کیونکہ یہ میری امت کی رہبانیت ہے۔ میں نے عرض کی: یا رسول اللہ صلی اللہ علیہ وسلم ! مزید عطا کیجئے۔ نبی اکرم صلی اللہ علیہ وسلم نے ارشاد فرمایا: تم اپنے سے نیچے والے کی طرف دیکھو اپنے سے اوپر والے کی طرف نہ دیکھو، کیونکہ اس طرح تم اپنے پاس موجوداللہ تعالیٰ کی نعمتوں کو کم تر نہیں سمجھو گے۔ میں نے عرض کی: یا رسول اللہ! مزید عطا کیجئے نبی اکرم صلی اللہ علیہ وسلم نے ارشاد فرمایا: تم حق بات کہو اگرچہ وہ کڑوی ہو۔ میں نے عرض کی: یا رسول اللہ! مزید عطا کیجئے۔ نبی اکرم صلی اللہ علیہ وسلم نے ارشاد فرمایا: ہونا یہ چاہئے کہ وہ چیز تمہیں لوگوں سے پرے کر دے، جسے تم اپنی ذات کے حوالے سے جانتے ہو اور جو کام تم خود کرتے ہو اس کی وجہ سے لوگوں کے خلاف جذبات نہ رکھو۔ اور تمہارے عیب دار ہونے کے لئے یہ کافی ہے کہ تم لوگوں کے حوالے سے اس چیز کی شناخت رکھو جس سے تم اپنے حوالے سے ناواقف ہو یا لوگوں کے خلاف اس حوالے سے جذبات رکھو جو تم خود کرتے ہو۔ پھر نبی اکرم صلی اللہ علیہ وسلم اپنا دست مبارک میرے سینے پر مار کر ارشاد فرمایا: ”اے ابوذر! تدبیر کی مانند کوئی عقلمندی نہیں ہے اور رکنے کی مانند کوئی ورع (پرہیز) نہیں ہے اور اچھے اخلاق کی مانند کوئی حسب نہیں ہے۔“
(امام ابن حبان رحمہ اللہ فرماتے ہیں:) ابوادریس خولانی نامی یہ راوی عائذ الله بن عبداللہ ہے یہ نبی اکرم صلی اللہ علیہ وسلم کی زندگی میں غزوہ حنین کے سال پیدا ہوئے تھے اور سن 80ھ میں ان کا شام میں انتقال ہوا تھا۔ یحیی بن یحییٰ غسانی نامی راوی کا تعلق کندہ سے ہے، اور یہ دمشق کا رہنے والا ہے۔ یہ شام کے علم فقہ اور علم قرأت کے ماہرین میں سے ایک ہے انہوں نے ابوادریس خولانی سے احادیث کا سماع پندرہ سال کی عمر میں کیا تھا ان کی پیدائش راہط کے دن معاویہ بن یزید کے دور خلافت میں 64ھ میں ہوئی تھی۔ سلیمان بن عبدالملک نے انہیں موصل کا قاضی مقرر کیا تھا۔ انہوں نے سعید بن مسیب اور اہل حجاز سے احادیث کا سماع کیا ہے یہ وہاں قاضی کے منصب پر اس وقت تک فائز رہے، جب تک عمر بن عبدالعزیز خلیفہ نہیں بن گئے پھر حکم نے انہیں برقرار رکھا اور اس کے عہد خلافت میں یہ مسلسل اسی عہدے پر فائز رہے ان کی عمر طویل ہوئی تھی یہاں تک کہ ان کا انتقال 133ھ میں دمشق میں ہوا۔ [صحیح ابن حبان/كتاب البر والإحسان/حدیث: 361]