سلیمان بن بریدہ رضی اللہ عنہ اپنے والد سے نقل کرتے ہیں کہ نبی کریم صلی اللہ علیہ وسلم جب کسی لشکر یا مہم کے امیر کو روانہ فرماتے تو آپ صلی اللہ علیہ وسلم اسے بطورِ خاص اس کی اپنی ذات کے بارے میں اللہ تعالیٰ سے ڈرتے رہنے اور اپنے ساتھ موجود مسلمانوں کے ساتھ بھلائی کرتے رہنے کی تلقین فرمایا کرتے تھے، پھر آپ صلی اللہ علیہ وسلم یہ ارشاد فرماتے تھے: ”اللہ کے نام سے مدد حاصل کرتے ہوئے اللہ کی راہ میں جنگ کرو اور ان لوگوں کے ساتھ لڑائی کرو جنہوں نے اللہ تعالیٰ کا انکار کیا، تم جہاد کرو اور خیانت نہ کرو، وعدہ خلافی نہ کرو، لاشوں کی بے حرمتی نہ کرو اور کسی نابالغ بچے کو قتل نہ کرو۔ جب تمہارا دشمن مشرکین سے سامنا ہو تو انہیں تین خصلتوں میں سے کسی ایک کو قبول کرنے کی دعوت دو، ان میں سے وہ جس چیز کو بھی اختیار کرنا چاہیں تو اسے ان کی طرف سے قبول کر لو اور ان پر حملہ کرنے سے رک جاؤ؛ تم سب سے پہلے انہیں اسلام کی دعوت دو، اگر وہ تمہاری بات مان لیں تو اسے ان کی طرف سے قبول کر لو اور ان سے جنگ کرنے سے رک جاؤ، یا پھر انہیں اس بات کی دعوت دو کہ وہ اپنے علاقے کو چھوڑ کر مہاجرین کے علاقے کی طرف منتقل ہو جائیں، اگر وہ منتقل ہونے سے انکار کریں تو تم انہیں بتاؤ کہ اگر وہ ایسا کر لیتے ہیں تو ان کی مثال دیہاتی مسلمانوں کی طرح ہوگی اور ان پر بھی وہ تمام احکامات لاگو ہوں گے جو اللہ تعالیٰ نے مومنین پر لاگو کیے ہیں، اگر وہ تمہاری اس بات کو قبول کر لیتے ہیں تو تم ان کی طرف سے اس بات کو قبول کرو اور اگر وہ انکار کرتے ہیں تو ان کے خلاف اللہ تعالیٰ سے مدد حاصل کرو اور پھر ان کے ساتھ جنگ شروع کر دو۔ اور تم لوگ جب کسی قلعے کا محاصرہ کرو اور وہ لوگ یہ چاہیں کہ تم ان کو اللہ کی پناہ اور اس کے رسول کی پناہ دو تو تم انہیں اللہ اور اس کے رسول کی پناہ نہ دو بلکہ تم انہیں اپنی پناہ دو، اپنے باپ دادا کی اور اپنے ساتھیوں کی پناہ دو، کیونکہ اگر تم اپنی دی ہوئی پناہ کی یا اپنے باپ دادا کی پناہ کی خلاف ورزی کرتے ہو تو یہ تمہارے لیے اس سے زیادہ آسان ہوگا کہ تم اللہ اور اس کے رسول کی پناہ کی خلاف ورزی کرو، اور جب تم نے کسی قلعے کا محاصرہ کیا ہوا ہو اور وہ لوگ یہ چاہیں کہ تم ان کے ساتھ اللہ کے حکم کے مطابق صلح کر لو تو تم انہیں اللہ کے حکم پر نہ اتارو بلکہ اپنے حکم پر اتارو، کیونکہ تم نہیں جانتے کہ تم ان کے بارے میں اللہ تعالیٰ کے حکم کے مطابق درست فیصلہ کر سکو گے یا نہیں۔“ راوی بیان کرتے ہیں کہ میں نے یہ حدیث مقاتل بن حیان کو سنائی تو انہوں نے فرمایا کہ علقمہ بن مرثد نے سیدنا نعمان بن مقرن رضی اللہ عنہ کے حوالے سے نبی کریم صلی اللہ علیہ وسلم سے اسی کے مانند حدیث مجھے بیان کی ہے۔ [صحیح ابن حبان/كتاب السير/حدیث: 4739]