سیدنا عبداللہ بن انیس رضی اللہ عنہ بیان کرتے ہیں کہ نبی اکرم صلی اللہ علیہ وسلم نے انہیں بلوایا اور ارشاد فرمایا: ”مجھے یہ اطلاع ملی ہے کہ سفیان بن نبیح ہذلی کے بیٹے نے میرے لیے لوگوں کو اکٹھا کیا ہے تاکہ وہ میرے ساتھ لڑائی کریں، اس وقت وہ (راوی کو شک ہے شاید یہ الفاظ ہیں:) کھجور کے درخت کے پاس موجود ہے یا عرینہ کے پاس موجود ہے، تم اس کے پاس جاؤ۔“ راوی کہتے ہیں: میں نے عرض کی: یا رسول اللہ صلی اللہ علیہ وسلم ! آپ اس کا حلیہ میرے سامنے بیان کر دیں تاکہ میں اسے پہچان لوں۔ نبی اکرم صلی اللہ علیہ وسلم نے ارشاد فرمایا: ”تمہارے اور اس کے درمیان مخصوص نشانی یہ ہے کہ تم اسے دیکھو گے تو اسے دیکھ کر تم پر کپکپی طاری ہو جائے گی۔“ راوی کہتے ہیں: میں اپنی تلوار کھینچ کر روانہ ہو گیا، یہاں تک کہ جب میں اس کے پاس پہنچا تو وہ اس وقت پڑاؤ کی جگہ پر اپنی عورتوں کے ساتھ تھا، یہ عصر کے وقت کی بات ہے۔ جب میں نے اسے دیکھا تو مجھے وہی چیز محسوس ہوئی جو نبی اکرم صلی اللہ علیہ وسلم نے میرے سامنے بیان کی تھی اور مجھ پر کپکپی طاری ہو گئی، میں اس کی طرف بڑھا لیکن پھر مجھے اندیشہ ہوا کہ کہیں میرے اور اس کے درمیان ہونے والی لڑائی مجھے نماز سے مشغول نہ کر دے، تو میں نے نماز ادا کر لی حالانکہ میں اس وقت اس کی طرف چل رہا تھا اور میں سر کے ذریعے اشارہ کرتا تھا۔ میں اس کے پاس پہنچا تو اس نے دریافت کیا: کون ہے؟ میں نے کہا: میں ایک عرب ہوں، میں نے تمہارے بارے میں سنا ہے کہ تم نے ان صاحب کے لیے لوگوں کو اکٹھا کیا ہے تو میں بھی اسی لیے یہاں آیا ہوں۔ راوی کہتے ہیں: اس نے کہا: ”میرا تو یہی مقصد تھا۔“ پھر میں اس کے ساتھ کچھ دیر چلتا رہا یہاں تک کہ جب مجھے موقع ملا تو میں نے اس پر تلوار کا وار کر کے اسے قتل کر دیا، پھر میں وہاں سے نکلا تو اس کی عورتیں اس پر جھکی ہوئی تھیں۔ جب میں نبی اکرم صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم نے مجھے ملاحظہ کیا تو ارشاد فرمایا: ” «أَفْلَحَ الْوَجْهُ» ”یہ چہرہ کامیاب ہو گیا۔““ میں نے عرض کی: میں نے اسے قتل کر دیا ہے یا رسول اللہ صلی اللہ علیہ وسلم ۔ نبی اکرم صلی اللہ علیہ وسلم نے فرمایا: ”تم نے سچ کہا ہے۔“ راوی کہتے ہیں: پھر نبی اکرم صلی اللہ علیہ وسلم میرے ساتھ کھڑے ہوئے، آپ صلی اللہ علیہ وسلم مجھے اپنے ساتھ اپنے گھر میں لے گئے اور آپ صلی اللہ علیہ وسلم نے مجھے ایک عصا عطا کیا۔ آپ صلی اللہ علیہ وسلم نے فرمایا: ”اے عبداللہ بن انیس! اس عصا کو اپنے پاس رکھنا۔“ راوی کہتے ہیں: میں وہ لے کر لوگوں کے پاس آیا تو انہوں نے دریافت کیا: یہ عصا کیسا ہے؟ میں نے کہا: یہ نبی اکرم صلی اللہ علیہ وسلم نے مجھے عطا کیا ہے اور آپ صلی اللہ علیہ وسلم نے مجھے یہ ہدایت کی ہے کہ میں اسے سنبھال کے رکھوں۔ لوگوں نے کہا: کیا تم نبی اکرم صلی اللہ علیہ وسلم کی طرف واپس جا کر آپ صلی اللہ علیہ وسلم سے یہ دریافت نہیں کرتے کہ ایسا کیوں ہے؟ راوی کہتے ہیں: میں واپس نبی اکرم صلی اللہ علیہ وسلم کی خدمت میں حاضر ہوا اور عرض کی: یا رسول اللہ صلی اللہ علیہ وسلم ! آپ صلی اللہ علیہ وسلم نے یہ عصا مجھے کیوں عطا کیا ہے؟ نبی اکرم صلی اللہ علیہ وسلم نے فرمایا: ” «آيَةٌ بَيْنِي وَبَيْنَكَ يَوْمَ الْقِيَامَةِ» ”یہ قیامت کے دن میرے اور تمہارے درمیان مخصوص نشانی ہوگی“، اس دن بہت کم لوگ (ایسے اعزاز کے ساتھ) ٹیک لگائے ہوئے ہوں گے۔“ (راوی کہتے ہیں:) تو سیدنا عبداللہ بن انیس رضی اللہ عنہ نے اسے اپنی تلوار کے ساتھ ملا دیا اور وہ مسلسل ان کے پاس رہا، یہاں تک کہ جب ان کا انتقال ہوا تو ان کے حکم کے تحت وہ عصا ان کے ساتھ ان کے کفن میں رکھ دیا گیا اور ان دونوں کو دفن کیا گیا۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7160]