سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم ہمارے درمیان وعظ کرنے کے لیے کھڑے ہوئے اور آپ نے ارشاد فرمایا: اے لوگو! تم لوگوں کو برہنہ جسم، برہنہ پاؤں، ختنوں کے بغیر (قیامت کے دن) اٹھایا جائے گا (ارشاد باری تعالیٰ ہے) ”جس طرح ہم نے پہلے تخلیق کیا تھا اس طرح ہم دوبارہ تخلیق کریں گے۔ یہ ہمارا وعدہ ہے۔ ہم ایسا ضرور کریں گے۔“
(نبی اکرم صلی اللہ علیہ وسلم نے فرمایا:) خبردار! مخلوق میں سب سے پہلے سیدنا ابراہیم علیہ السلام کو لباس پہنایا جائے گا۔ خبردار! میری امت کے کچھ افراد کو لایا جائے گا اور انہیں پکڑ کر بائیں طرف لے جایا جائے گا، تو میں یہ کہوں گا: اے میرے پروردگار! یہ میرے ساتھی ہیں یہ میرے ساتھی ہیں، تو یہ کہا: جائے گا: تم نہیں جانتے کہ تمہارے بعد انہوں نے کیا کیا تھا، تو میں وہی کہوں گا جو ایک نیک بندے نے کہا: تھا (جس کا ذکر قرآن میں ہے) ”جب تک میں ان کے درمیان رہا میں ان پر گواہ تھا اور جب تو نے مجھے موت دے دی تو تُو ان کا نگران تھا اور تو ہر چیز پر گواہ ہے۔“ یہ آیت یہاں تک ہے ”غالب اور حکمت والا ہے۔“ تو یہ کہا: جائے گا: یہ ایڑیوں کے بل مرتد ہو گئے تھے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7347]