سیدنا ابن عباس رضی اللہ عنہما فرماتے ہیں: جب یہ آیت: (والذین یکنزون الذھب والفضۃ) نازل ہوئی تو مسلمان بہت پریشان ہو گئے، سیدنا عمر رضی اللہ عنہ نے فرمایا: میں آج تمہارے لیے کشادگی کروا لوں گا، پھر وہ رسول پاک صلی اللہ علیہ وسلم کی طرف چل دئیے، آپ صلی اللہ علیہ وسلم کے پاس آ کر انہوں نے عرض کی: یا نبی اللہ صلی اللہ علیہ وسلم ! آپ کے اصحاب رضی اللہ تعالیٰ عنہم پر یہ آیت بہت بھاری پڑی ہے۔ تو رسول اللہ صلی اللہ علیہ وسلم نے فرمایا: اللہ تعالیٰ نے تو تمہارے مال کے باقی ماندہ سے زکوۃ فرض کی ہے۔ اللہ تعالیٰ نے تو وراثت فرض کی ہے اور ایک ایسا کلمہ ذکر کیا جو تم سے بعد والے لوگوں کے لیے ہے۔ ابن عباس رضی اللہ عنہما فرماتے ہیں: سیدنا عمر رضی اللہ عنہ نے ” اللہ اکبر “ کہا: پھر رسول اللہ صلی اللہ علیہ وسلم نے فرمایا: کیا میں تمہیں اس بات کی خبر نہ دوں کہ ایک نیک خاتون کی اصل کمائی کیا ہوتی ہے۔ (1) جب اس کا شوہر اس کی طرف دیکھے تو وہ اس کو خوش کرے۔ (2) جب اس کو کسی کام کا حکم دے تو اس کی اطاعت کرے۔ (3) اور شوہر کی غیر موجودگی میں اس (کی امانت) کی حفاظت کرے۔ ٭٭ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ [المستدرك على الصحيحين/كتاب الزكاة/حدیث: 1503]