سیدنا انس رضی اللہ عنہ سے روایت ہے کہ سیدنا ابو طلحہ رضی اللہ عنہ غزوہ احد کے دن رسول اللہ صلی اللہ علیہ وسلم کے سامنے کھڑے ہو کر تیر اندازی کر رہے تھے اور آپ صلی اللہ علیہ وسلم ان کے پیچھے تھے، ابو طلحہ ماہر تیر انداز تھے، جب وہ تیر چلاتے تو نبی کریم صلی اللہ علیہ وسلم اپنا سر مبارک اٹھا کر دیکھتے کہ ان کا تیر کہاں جا کر لگا ہے، تب ابو طلحہ اپنا سینہ تان لیتے اور عرض کرتے: اے اللہ کے رسول! میرے ماں باپ آپ پر قربان ہوں، آپ (سر مبارک بلند نہ کریں) کہیں کوئی تیر آپ کو نہ لگ جائے، میرا سینہ آپ کے سینے کے سامنے ڈھال ہے، ابو طلحہ خود کو رسول اللہ صلی اللہ علیہ وسلم کے سامنے پیش کر دیتے اور عرض کرتے: اے اللہ کے رسول! میں توانا اور مضبوط ہوں، آپ مجھے جو چاہیں حکم دیں۔
یہ حدیث امام مسلم کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب : الجهاد/حدیث: 2579]