امام مکحول رحمہ اللہ فرماتے ہیں: میں مصر میں قبیلہ ہذیل کی ایک عورت کا غلام تھا، اس نے مجھے آزاد کر دیا، میں جب مصر سے نکلا تو وہاں کا جتنا بھی علم (حدیث) تھا وہ میں نے اپنے اندر سمو لیا تھا، پھر میں شام آیا اور وہاں کے علم کو بھی چھانا، میں ہر جگہ ”نفل“ (غنیمت میں زائد انعام) کے بارے میں سوال کرتا تھا لیکن مجھے کوئی کچھ بتانے والا نہیں ملا، یہاں تک کہ میری ملاقات زیاد بن جاریہ تمیمی نامی ایک بزرگ سے ہوئی، میں نے ان سے پوچھا: کیا آپ نے نفل کے بارے میں کچھ سنا ہے؟ انہوں نے کہا: ہاں، میں نے حبیب بن مسلمہ فہری رضی اللہ عنہ کو یہ کہتے ہوئے سنا ہے کہ میں رسول اللہ صلی اللہ علیہ وسلم کے پاس موجود تھا جب آپ صلی اللہ علیہ وسلم نے غزوے کی ابتداء میں (غنیمت کا) چوتھائی (1/4) حصہ اور واپسی کے وقت تہائی (1/3) حصہ بطور نفل عطا فرمایا تھا۔ [المستدرك على الصحيحين/كتاب قسم الفيء/حدیث: 2631]